1 Samweli 1 - KITABU KITAKATIFU

¹ Ha li nomundu mulala wa Ramathaim-zofim, wekivala kyevigulu vya Efiraim, we lieta lilye lya langwa Elikana, mwana wa Jeroham, mwana wa Elihu mwana wa Tohu mwana wa Zufu ya li Muefiraim

² naye ya li navakali vaviri; lieta lyomulala lya langwa Hana, nelieta lyowundi lya langwa Penina; Penina ya li navana, navutswa Hana si ya li navana mba.

³ Ma mundu uyu yanegira kutwula mu lidala lilye muhiga nomuhiga kusigamira nokuhaana ku Yahova wamahe vihaanwa mu Shilo. Navana vaviri va Eli, Hofini na Finehasi, avasalisi va Yahova va li yo.

⁴ Na lwa lya duka lidiku lya Elikana ya haana kihaanwa kikye, ya ha Penina mukali wewe kidieli, navana veve vosi avayai navakana, ya va ha kandi vidieli:

⁵ navutswa ya ha Hana vidieli viviri; kigira ya yanza Hana, navutswa Yahova ya li ni ya boha inda yeye.

⁶ Na muhalikwa wewe ya mbihiriridza ligali, a duke kumukola a vihirirwe, kigira Yahova ya li na a bohi inda yeye.

⁷ Nomusatsa ya kola ndiyo muhiga nomuhiga, lwa yanegira kutsia mu inyumba ya Yahova, na ndiyo ya mu vihiriridza; kigira yaga ya lira, na ya vula kulia.

⁸ Na Elikana musatsa wewe ya mu teva, U lilira ki, Hana? Kigira ki u vula kulia kyokulia? Kigira ki mwoyo gugwo gu veye nobuvereri? Inze si mbeye mulahi kuive kuvita avana vayai likumi?

⁹ Kunangwa Hana ya singira inyima welilia lyavo mu Shilo, inyima we linwa lyavo. Na Eli umusalisi ya li ni yikaye ku intebe yeye himbi neliliva lyomuliango gwelitempeli ya Yahova.

¹⁰ Nomukali uyu lya li nobululu bwomwoyo ligali, na ya saala ku Yahova nokulira ligali.

¹¹ Na ya vika lilagana, na a vola, O Yahova wamahe, ive nu u va nu u henza ligali ubuvereri bwomukana mutugwa wowo a veye nabwo, nokunzidzulira, na u vule kunzivirira inze mukana mutugwa wowo, na u haane ku inze mukana mutugwa wowo umwana muyai, hene yaho inze nda mu haana ku Yahova madiku gosi gelimenya lilye, nolugembe lu la vula kuduka ku mutwe gwigwe ligali.

¹² Na ga duka, lwa ya hongera kusaala imbiri wa Yahova, Eli ya mu henza ku munwa gwigwe.

¹³ Na Hana, ya li na a volera mmwoyo gwigwe; neminwa gyigye gya loleka kuli gyi volanga, navutswa mwoyo gwigwe si gwa hulirika: kigira yaga Eli ya ganagana u hambiki.

¹⁴ Na Eli ya mu volera, u la va muhambiki kuduka inyinga ki? U leke iwaini yoyo.

¹⁵ Na Hana ya tivula na a mu volera, Si ga veye ndiyo, mwami wange, inze mbeye mukali womwoyo gwobuverereri ligali: si nweye iwaini, kinga kyokunwa kihambikidzanga, navutswa nda tsuka mwoyo gwange imbiri wa Yahova.

¹⁶ U ta validza inze mukana mutugwa wowo ku va mukali mudamano; kigira ku bunyingi bwobuvereri bwange, nelivihiridzwa lyange nivyo vya mbolanga kuduks kalunu.

¹⁷ Hene yaho Eli ya mu tivulira, na a mu volera, U tsie nemirembe; na Nyasaye wa Israeli a ku he lisaala lilyo lya u saaye kuye.

¹⁸ Naye ya vola, Inze mutugwa wowo nnyole tsimbabasi mu tsimoni tsitsyo. Kunangwa mukali uyu ya tsia, na a lia vyokulia; mumoni mwimwe mwa vula kuva nobuvereri kandi.

¹⁹ Na va vuka mugamba mabwebwe, ni va sigamira imbiri wa Yahova, ni virana, na va duka mu inyumba yavo ha Rama. Na Elikana ya manya Hana mukali wewe; na Yahova ya mwidzulira;

²⁰ na ga duka, lwa inyinga ya duka, Hana ya vereka, na yivula mwana muyai; na ya mu gulika lieta lilye Samweli, ya vola, Kigira nda mu saalira ku Yahova.

²¹ Nomusatsa uyu Elikana, navandu venyumba yeye vosi, vanegira kuhaana kihaanwa kyomuhiga ku Yahova, nelilagana lilye.

²² Navutswa Hana ya vula kwanegira; kigira ya volera musatsa wewe, Inze si ndanegira mba kuduka lwa mwana uyu a luguhira, hene yaho nda mu leta, a duke kuloleka imbiri wa Yahova, nokumenya yo madiku gosi.

²³ Na Elikana musatsa wewe ya mu volera, U kole kuli u lola kuva bulahi; u menye kuduka lwa u luguhidza; navutswa Yahova a singeridze likuva lilye. Kunangwa mukali ya menya nokunyunya mwana wewe, kuduka lwa ya luguhira.

²⁴ Na lwa ya luguhira, ya tsia naye, na ya vugula tsigiriki tsivaka, efa indala yobusie, nechupa indala yewaini, na ya mu leta kuduka ha inyumba ya Yahova ha Shilo: nomwana ya li mudoto.

²⁵ Na viita igiriki, nokuginga mwana kutsia naye ku Eli.

²⁶ Nomukali uyu ya mu volera, O, mwami wange, kuli ive u veye mwoyo, mwami wange, inze mbeye mukali wa singira imbiri wowo hano, lwa nda saalanga Yahova.

²⁷ Mwana uyu niye wa nda saalanga; na Yahova u mali kumpa lisaala lyange lya nda saala kuye:

²⁸ kunangwa mbaananga ku Yahova mwana uyu; inyinga a la va mwoyo u haaniywi ku Yahova. Na ya sigamira yo Yahova.