1 Petro 4 - KITABU KITAKATIFU

¹ Kunangwa kigira Kristo ya salira mu mubiri, kandi mwinye ndiyo mwivike mwoyo gwokukola ndiyo kigira uyu wa saliridzwa mu mubiri gwigwe u lakuye ubwoni;

² kunangwa kutwula kalunu tsinyinga tsyenyu tsi tigaye mu mubiri, mu ta menya mu likayirwa lyavandu, navutswa mu bulaliri bwa Nyasaye.

³ Kigira tsinyinga tsya vita tsi hereridzi kukola yaga aga Vetsihiri venyanga, nokugenda mu kifwabwi, nomu likayirwa, nomu lihambika, nomu lisyeva, nomu linwa, nomu lisalisa misambwa gyekivihiri:

⁴ muvyo va lolanga ligenya kigira mwinye mu vula kunyagula navo kuduka mu kivihiri kinene kya zana, ni va mu nyega:

⁵ ava li letera uyu, vya va kola, wetegeki kukalagira ava veye mwoyo navakudzi.

⁶ Kigira ku yaga ivangeli yilwadzwa ku ava kudza, va duke kukalagirwa kuli avandu va veye mu mubiri, navutswa va menye kuli Nyasaye yenyanga mu roho.

⁷ Navutswa kiheri kyevindu vyosi ki veye himbi: kigira yaga mu ve nobugeeri ubulamu, nokulindidza myoyo kuduka mu lisaala:

⁸ kuvita vindu vyosi mu ve neliyanzana ligali avene navene; kigira ubuyanzi bu kunika ubwoni bunyingi.

⁹ Mwingiridzane avene navene bugira limonya:

¹⁰ kuli mundu sa mulala ya nyola kihaanwa, ni mu ki tumekira hagati henyu, kuli avalindi avalahi vetsimbabasi tsya Nyasaye tsi veye tsing'ano tsinyingi.

¹¹ Mundu na a va na a vola, a role kuli livola lya Nyasaye; mundu na a va na a tumeka a fumeke kuli mu tsingulu tsya Nyasaye a mu leteye: kuduka mu vindu vyosi Nyasaye yidzominyirwe ku Yesu Kristo, wobukumi bu veye bwibwe halala netsingulu mihiga nemihiga. Amini.

¹² Avayanze, mu ta genya ku ligeridza lyomuliru li mu geridza li veye hagati henyu kumugeridza, kuli kindu kigeni kya mu gwira:

¹³ navutswa kuli mu veye avasangi mu busaliri bwa Kristo, mu sangale; mu lilang'aminya lyobukumi bwi bwe mu duke kusangala nobusangali ubunene.

¹⁴ Ni mu va ni mu nyegwa kigira lieta lya Kristo, mu veye nobugasu; kigira Roho wobukumi kandi Roho wa Nyasaye a menya ku mwinye.

¹⁵ Kigira i ta va mundu kali mulala a saliridzwe kuli na a veye mwiiti, kinga mwivi, kinga mukoli wobudamano, kinga wevika mu makuva gavandu vandi;

¹⁶ navutswa na a va na a saliridzwa kigira a veye Mukristayo, a ta va isoni; navutswa yidzominye Nyasaye mu lieta yilyo.

¹⁷ Kigira inyinga i duki yelikalaga li tanga mu inyumba ya Nyasaye: ni li va ni li tanga ku kwinye kiheri kyavo ava ta hulira ivangeli ya Nyasaye ki la va ndi?

¹⁸ Kandi niva wobulungi a lola ubudinyu kuhonnywa, uyu u ta tia Nyasaye nomwoni va la loleka haliha?

¹⁹ Kigira yaga yava ava saliridzangwa kuli ubulaliri bwa Nyasaye mu likola bulahi, va vike myoyo gyavo ku Mulombi musuuvirifu.