1 Petro 3 - KITABU KITAKATIFU

¹ Kandi ndiyo, mwinye avakali, mwegehidze ku vasatsa venyu avene; ni va veye ho ava vula kuhulira likuva, va duke kuhulira kigira ligenda lyavakali vavo bugira likuva lyene;

² va lolanga ligenda lyenyu lilahi halala nobutii.

³ Lyesiaha lyenyu, li ta va lyesiaha lyokwigulu kuli linava amasu, nokwivika vindu vyethahabu, kinga kwivika tsingubo tsyobung'olang'ole;

⁴ navutswa li ve lyomundu mwevisu womwoyo, mu lyevika li vula kwoneka, livola li veye, ni lya roho gwobuhokya nobuhooma, ogu veye nobuguli bunene imbiri wa Nyasaye.

⁵ Kigira avakali vata katifu va kale ava suuvira Nyasaye, ni ndiyo visiahanga, nokwegehidza ku vasatsa vavo avene.

⁶ Kuli Sara ya hulira Abrahamu na a mu langa mwami, wa mu veye avana veve kalunu, ni mu kola bulahi, nokuvula kutihidzwa nelitihidza lyosi.

⁷ Mwinye avasatsa, ndiyo kandi mu menye navakali venyu kuli limanya lyenyu, nokuha mukali lidzominywa li mu dukanga, kuli kiju ki ta li netsingulu kuleng'ana nemwinye kuli mu veye ava nyola halala miyandu gyetsimbabasi tsyelivamwoyo; lisaala lyenyu li vule kwigalirwa.

⁸ Agekiheri, mu ve nomwoyo mulala, ava koleranira tsimbabasi, ava yanzana kuli avamwavo navamwavo, nayetsimbabasi tsyomugati, navemyoyo myegehidzu:

⁹ ava ta tungana ubudamano ku budamano, kinga manyego ku manyego; navutswa lyavukana na yago mu gasidzane; kigira mwa langirwa yaga, mu duke kulia miyandu gyobugasu.

¹⁰ Kigira, Uyu u li yanza livamwoyo, Nokulola madiku malahi A gaye lulimi lwilwe ku budamano, Kandi minwa gyigye ku livola ubugadi:

¹¹ Yiyahule ku budamano nokukola bulahi; Yenye mirembe, nokugyilonda tsimbiru.

¹² Kigira tsimoni tsyo Mwami tsi henza ku avalungi, Kandi amatu gege ga yeki ku lisaala lyavo: Navutswa mumoni mwo Mwami mu veye ku yavo avakola budamano.

¹³ Kigira yaga mu bohe vikenge vyemyoyo gyenyu, mu ve nobugeeri, mu vike lisuuvira lyenyu ligali ku tsimbabasi tsya mu li leterwa mu lilang'aminywa lya Yesu Kristo

¹⁴ Navu tswa ni mu va ni mu saliridzwa kigira ubulungi, mu veye nobugasu: kandi mu ta tia litihidza lyavo, kandi mu ta henda myoyo;

¹⁵ navutswa mu takase Kristo a ve Mwami mu myoyo gyenyu: mwetegeke madiku gosi kutivulira mundu sa mulala u mu teva ku lisuuvira lya mu veye nalyo, navutswa mu kole nobuhooma nobutii:

¹⁶ mu veye nomwoyo mulahi; mu likuva lya mu hudziridzwa, va duke kuva netsisoni yavo ava nyega ligenda lyenyu lilahi li veye mu Kristo.

¹⁷ Kigira nu bulahi kuvita kusaliridzirwa ku likola bulahi, ubulaliri bwa Nyasaye ni bu va ni bu lalira, kuvita kusaliridzirwa ku likola ubudamano.

¹⁸ Kigira Kristo kandi ya salira kigira ubwoni inyinga indala, mulungi ya salirira ava ta li avalungi, a duke kukuleta ku Nyasaye; wiiteywi ku mubiri, nokukolwa mwoyo ku roho.

¹⁹ Kigira yaga ya tsia kwilwadzira roho gya li mu buhambe,

²⁰ gya vula kuhulira ku matsyambiri, inyinga yobwikudziri bwa Nyasaye bwa li ndagira mu madiku ga Nuhu, inyinga liato lya li mu lilombwa, lya vakekeke, avandu vatano na vavaka va honera ku madzi:

²¹ aga honnya mwinye kalunu ku lugano zana libatidza, si ga li kya twulidza liko lyomubiri, navutswa ga veye ku lyenya litivula lyomwoyo mulahi ku Nyasaye, kigira lisimugukidzwa lya Yesu Kristo;

²² u veye ha mukono mulungi gwa Nyasaye, kigira u viti kutsia kuduka migulu; vi mali kukolwa vikekeke kuye, tsingelosi, navobunene, navetsingulu.