1 Petro 2 - KITABU KITAKATIFU

¹ Kunangwa ku li vika ha luvega ubudamano bwosi, nobusyemi bwosi nobugadi, nembodoka, nelivola lyosi lidamano,

² kuli avana vadoto avivuywi kalunu, mwenye ligali amaveere ageligali aga ta li nobusyemi, mu duke kuviruka kugo kuduka ku buhonnyi;

³ ni mu va ni mu tsatsama Mwami a veye netsimbabasi

⁴ Mwa tsia kuye, ligina li veye mwoyo, lya vandu vambakana ligali, navutswa lya Nyasaye a tovoye, lyobukumi,

⁵ kandi mwinye, kuli amagina ga veye mwoyo, mwombakeywi kuva inyumba ya roho, kuva ubusalisi butakatifu, mu haane visyuviriru vya roho, vi bugirirangwa ku Nyasaye kigira Yesu Kristo.

⁶ Kigira livoia yili li veye mu mang'oda, Henza, mbika mu Zioni ligina linene lyolwiga, litovole, lyobukumi: Kandi u mu suuvira si a la legannywa.

⁷ Kunangwa ubukumi bu veye bwenyu avasuuviranga: navutswa ku ava ta suuvira, Ligina lyavombaki va sula, Lya zana li gwiye mutwe gwolwiga;

⁸ Kandi, Ligina lyokwikigitalidza, nolwanda lwokwikigitalidza; Kigira vikigitala ku likuva kigira va vula kubugirira: ava vikwa va duke ku likuva yilyo.

⁹ Navutswa mwinye mu veye likula li tovoleywi ubusalisi bwobwami, ihiri intakatifu, avandu va veye ava Nyasaye mwene mu duke kulang'aminya ubulahi bwibwe, uyu wa mu langa mu twule mu kisundi mu duke mu bulavu bwibwe obweligenya:

¹⁰ mwinye ava vula kuva vandu mu matsyambiri, navutswa kalunu mu veye avandu va Nyasaye: ava vula ku verererwa, navutswa kalunu mu verereywi.

¹¹ Avayanze, ng'oonya mwinye avamenyi kandi avageni, mwiyahule ku likayirwa lyomubiri, li hing'ana nomwoyo;

¹² ligenda lyenyu li ve lilahi mu Tsihiri; mu yaga ga va vola ku mwinye kuli mu veye ava kola ubudamano, ga ve kuvo, kigira vikolwa vyenyu vilahi vya va lola vidzominye Nyasaye ku lidiku lyokuhenzwa.

¹³ Mwegehidze ku malago gosi gavandu kigira Mwami: kaliva mwami kuli na a veye munene;

¹⁴ kinga ku vagovana kuli va ya tuma kigira isira ya va kola ubudamano, kandi kigira lidzominya lya yava va kola bulahi.

¹⁵ Kigira ubulaliri bwa Nyasaye bu veye ndiyo, ku likola bulahi mu duke kukiring'anya livula kumanya lyavandu avasiru.

¹⁶ Kuli avaboholole navutswa mu vuli kutumekira libohololwa bwenyu bu ve kikuniko kyobudamano, navutswa kuli avatagwa va Nyasaye.

¹⁷ Mwidzominye avandu vosi. Mu yanze avobumitu. Mu tie Nyasaye. Mwidzominye mwami.

¹⁸ Mwinye avatugwa vomunyumba, mwegehidze ku va mu tuga nobutii bwosi; si ku li ku valahi navahooma veng'ine, navutswa kandi ku valulu.

¹⁹ Kigira yaga ga veye malahi, niva mundu, kigira mwoyo gwigwe ku Nyasaye, a nyola ubuvereri ku busaliri bu ta li bwobulungi.

²⁰ Kigira inyinga mu kola ubwoni, ni mu va ni mu kuywa ni mwikudzira, mu la nyola lidzominywa ki? Navutswa inyinga mu kola bulahi ni mu va ni mu nyola ubusaliri, ni mwikudzira, yaga ga veye malahi ku Nyasaye.

²¹ Kigira mwa langirwa yaga: kigira Kristo kandi ya mu salirira, na a mu lekera kyokuhenzera ku, mu duke kulonda tsinduvatiru tsitsye:

²² wa vula kukola ubwoni, kandi wa vula kunyoleka ubugadi mu munwa gwigwe:

²³ inyinga ya nyegwa si yirannya linyega; inyinga ya saliridzwa ya vula kwihalavannya; navutswa yihaana ku uyu u kala ganga bulungi.

²⁴ Mwene ya ginga ubwoni bwetu mu mubiri gwigwe ku musala, kuduka kwinye ku mali kukudza ku bwoni, ku ve mwoyo ku bulungi; wa mwa honnyirwa ku likuywa lilye.

²⁵ Kigira mwa li mwa gota kuli magondi; navutswa kalunu mwirani ku Mwayi no Muhenzi wemyoyo gyenyu.