1 Petro 1 - KITABU KITAKATIFU

¹ Petro, mutumwa wa Yesu Kristo, ibaruu a yange yiyi i duke ku Avelisalana ava veye avamenya mu Ponto, nomu Galatia, nomu Kapadokia nomu Asia, nomu Bithinia

² kuli litanga kumanya lya Nyasaye Dada, mu litakasa lya Roho, ku lihulira noku Iyuhirwa masahi ga Yesu Kristo: Tsimbabasi tsi ve ku mwinye, nemirembe gyi medeke.

³ A gasidzwe Nyasaye Dada wo Mwami wetu Yesu Kristo, u kwivuye hali kaviri, kuli tsimbabasi tsitsye tsinene, ku duke ku lisuuviridzwa li veye mwoyo, ku lisimugukidzwa lya Yesu Kristo kutwula mu vakudzu,

⁴ noku miyandu gyi ta li neliyoneka, gyi ta li nobudamano, gyi ta li neligalula, gya mu lindirangwa migulu,

⁵ ava lindangwa netsingulu tsya Nyasaye, kigira lisuuvira kuduka ku buhonnyi, bwetegeki kulang'aminywa mu inyinga yekiheri.

⁶ Mu sangala ligali mu makuva yaga, kali ni i veye inyinga inkekeke kalunu, niva ni ga mu dukira, mu vereridzangwa mu ligeridzwa tsing'ano tsinyingi,

⁷ ligeridzwa lyelisuuvira lyenyu li veye lilahi kuvita ithahabu i gotanga, kali ni i geridzwa nomuliru, li lolwe kuduka ku lidzominya noku bukumi noku lidzominywa mu lilang'aminywa lya Yesu Kristo.

⁸ Wa mu yanza kali ni mu ta mu lola; wa mu suuvira kalunu, kali ni mu ta mu lola, nokusangala nobusangali obu ta volwa, nobwizula ubukumi:

⁹ nokunyola ubudukiru bwelisuuvira lyenyu, livola li veye ubuhonnyi bwemyoyo gyenyu.

¹⁰ Mu makuva gobuhonnyi yibu, avaprofeti va teveridza nokwenya ligali, ava profeta ku tsimbabasi tsi li duka ku mwinye:

¹¹ venya i veye inyinga ki, kandi i veye inyinga yolugano ki ya Roho wa Kristo wa li muvo ya mannya, inyinga ya tanga kulang'aminya ubusaliri bwa Kristo, nobukumi bu li va ho inyima.

¹² Aga lang'aminywa kuvo, si ga li kuvo avene, navutswa ku mwinye va tumekiranga mu vindu yivi vilwadzeywi kalunu na yavo ku mwinye, avilwadza ivangeli mu Roho Mutakatifu wa tumwa kutwula migulu; amakuva getsingelosi venyanga kuteveridza.

¹³ Kigira yaga mu bohe vikenge vyemyoyo gyenyu, mu ve nobugeeri, mu vike lisuuvira lyenyu ligali ku tsimbabasi tsya mu li leterwa mu lilang'aminywa lya Yesu Kristo;

¹⁴ kuli avana avahuliri, mu tefwanannya nelikayirwa lyenyu lya kale lyenyinga yobusiru:

¹⁵ navutswa kuli uyu wa mu langa a veye muta katifu, kandi mwinye mu ve avatakatifu mu vindu vyosi mu liva lyenyu lyosi;

¹⁶ kigira ga ng'odwa, Mu la va avatakatifu; kigira inze mbeye mutakatifu.

¹⁷ Kandi ni mu va ni mu mwaniranga kuli a veye Dada, u kalagira mundu sa mulala kuli miyinzi gyigye, bugira lyeridza mu ve neliva lyenyu lyobumenya mu butii:

¹⁸ kigira mu manya mwa honnywa, si bwa li ku vindu vyonekanga kuli ifetha kinga ithahabu, kutwula ku limenya lyenyu lya vutswa lya mwa nyola ku vaguga venyu;

¹⁹ navutswa ku masahi malahi kuli agomwana weligondi, u ta li nekindu kuye kidamano, u ta li nembala, ga veye ga Kristo:

²⁰ wa tanga kumanyekana ligali inyinga lirova lya li li kikiri kutemwa muse, navutswa ya lang'aminywa ku kiheri kyetsinyinga kigira mwinye,

²¹ ava mu vereye kuye, avasuuviri Nyasaye, wa mu simugukidza kutwula mu vakudzu, nokumuha ubukumi; lisuuvira lyenyu nelihenzerera vi duke kuva ku Nyasaye.

²² Kigira mu mali kwitakasa myoyo gyenyu mu lihulira ageligali, kuduka ku liyanza avamitu li ta li nobugadi, mu yanzane avene navene ligali mu mwoyo.

²³ Mwivuywi hali kaviri, si li veye ku tsinzoli tsyonekanga, navutswa ku tsi toneka, ku likuva lya Nyasaye, li veye mwoyo nokuhindira.

²⁴ Kigira, Mibiri gyosi gyi veye kuli ubunyasi, Kandi ubukumi bwagyo bu veye kuli kimuli kyobunyasi. Ubunyasi bwumanga, nekimuli kyabwo ki vunguluka:

²⁵ Navutsua likuva lyo Mwami li hindira kuduka mihiga nemihiga. Kandi yili li veye likuva lilahi lilwadzwa ku mwinye.