1 Kyetsinyinga 5 - KITABU KITAKATIFU

¹ Navana va Rubeni wa tanga kwivulwa wa Israeli (kigira niye wa tanga kwivulwa; navutswa, kigira yononya vigonero vya dada wewe, ubunene bwibwe bwelivulwa bwa haanwa ku avana va Yosefa mwana wa Israeli; na visukululwi si vya validzwa kulonda bunene bwelivulwa.

² Kigira Yuda ya li nobukumi igulu ku vamwavo veve, nomwami ya twula kuye; navutswa ubunene bwelivulwa bwa li bwa Yosefa),

³ avana va Rubeni wokutanga kwivulwa wa Israeli ni yava: Hanoku, na Palu, Heziron, na Karmi.

⁴ Avana va Joeli: Shemaia mwana wewe, Goga mwana wewe, Shimei mwana wewe,

⁵ Mika mwana wewe, Reaia mwana wewe, Baal mwana wewe,

⁶ Beera mwana wewe, wa Tiligathupilineseri mwami wa Asuria ya hila muhambe: uyu ya li munene wa Varubeni.

⁷ Na avamwavo veve ku bwiko bwavo, lwa ameta gevisukululwi vyavo ga validzwa: munene ya li Jeieli, na Zekaria,

⁸ na Bela mwa na wa Azazi, mwana wa Shema, mwana wa Joeli, wa menya ha Aroeri, kali kuduka Nebo na Baalmeon;

⁹ noku luvega lwevugwi ya menya kuduka ha bwingiriru bwekyanga langwi kutwula ku mugera gwa Farati, kigira mitugu gyavo gya medeka ligali mu kivala kya Gileadi.

¹⁰ Nomu madiku ga Saulo, va lwana na Vahagari, ava gwa kigira makono ga yavo; na va menya mmahema gavo mu kivalo kyosi ku luvega lwevugwi wa Gileadi.

¹¹ Na avana va Gadi va menya kuhenzana na yavo, mu kivala kya Bashan kuduka Saleka:

¹² munene wavo ya li Joeli, na wa kaviri Shafam, na Janai, na Shafatu mu Bashan.

¹³ Navamwavo vavo avetsinyumba tsyavaguga vavo: Mikaeli, na Meshulam, na Sheha, na Jorai, na Jakani, na Zia, na Eberi, avandu vatano na vaviri.

¹⁴ Yava nivo avana va Abihaili, mwana wa Huri mwana wa Jaroa, mwana wa Gileadi mwana wa Mikaeli, mwana wa Jeshishai, mwana wa Jehado, mwanawa Buzu,

¹⁵ Ahi mwana wa Abidieli, mwana wa Guni, avanene vetsinyumba tsyavaguga vavo.

¹⁶ Na va menya mu Gileadi mu Bashan, nomu madala gakyo, nomu tudala twosi twa Sharon, kuduka ku lwako lwavo.

¹⁷ Yavo vosi va validzwa kuli visukululwi vyavo mmadiku ga Jotham mwami wa Yuda, nomu madiku ga Jeroboam, mwami wa Israeli.

¹⁸ Avana va Rubeni, navana va Gadi, na inusu yehiri ya Manase, avasatsa avoluviriri, avasatsa avobunyali kuginga tsingavo nekivavi, nokulasa nobuta, avasidza ku bulwani, va li avandu tsielfu makumi gane na tsine netsimia tsitano na tsiviri navandu makumi gatano neli lala, ava nyala kutwula kutsia ku lwana.

¹⁹ Na va lwana na Vahagari, na Jeturu, na Nafishi, na Nodabu.

²⁰ Na va konnywa kulwana navo, na Vahagari va vikwa mmakono gavo, halala navosi ava li halala navo; kigira vanira Nyasaye ni va veye mbulwani, naye ya bugirira lisaala lyavo; kigira va vika lisuuvira lyavo muye.

²¹ Na va vugula tsing'ombe tsyavo; ku tsing'amia tsyavo tsielfu makumi gatano, ku magondi gavo tsielfu tsimia tsiviri na makumi gatano, noku tsisukiri tsyavo tsielfu tsimia tsiviri, noku avandu tsielfu mia.

²² Kigira va gwa avanyingi ligali aviitwa, kigira ubulwani bwa li bwa Nyasaye. Navo va menya mbugono bwavo kuduka ku lilanywa.

²³ Avana va inusu yehiri ya Manase va menya mu kivala: va medeka kutwula Bashan kuduka Baalherimon na Seniru, nomu kigulu kya Herimon.

²⁴ Nemitwe gyetsinyumba tsyavaguga vavo ni yava: Eferi, na Ishi, na Elieli, na Azirieli, na Jeremia, na Hodavia, na Jadieli, avandu avetsingulu avaluviriri, na vandu velidzominywa, mitwe gyetsi nyumba tsyavaguga vavo.

²⁵ Na va tinguha ku Nyasaye wavaguga vavo, ni va tsia kuheya ku lilonda avanyasaye vavandu vekivala yikyo, ava Nyasaye ya dividza va twula imbiri wavo.

²⁶ Na Nyasaye wa Israeli ya vukidza roho wa Pulu mwami wa Asuria, na roho wa Tiligathupilineseri mwami wa Asuria, naye ya va hila mbuhambe, nivo Varubeni, na Vagadi, na inusu yehiri ya Manase, naye ya va leta kuduka Hala, na Haboru, na Hara, noku mugera gwa Gozan, kuduka lero.