1 Avami 5 - KITABU KITAKATIFU

¹ Na Hiram mwami wa Turo ya tuma vatumekiri veve ku Solomoni; kigira ya hulira amakuva va mu vaki maguta a veye mwami mbugono bwa dada wewe: kigira Hiram ya li muyanzi wa Daudi kazozo.

² Na Solomoni ya tuma avatumwa va hile makuva ku Hiram, na a vola,

³ Ive u manya kuli dada wange Daudi ya vula kunyala kwombakira lieta lya Yahova Nyasaye wewe inyumba, kigira bulwani bwa mu kumbiridza tsimbega tsyosi, ku duka Yahova ya bu vika isi wetsindu vitiru tsitsye.

⁴ Navutswa kalunu Yahova Nyasaye wange u mbeye mirembe tsimbega tsyosi; si ha veye nobusigu, kinga ubudamano buduka ku inze.

⁵ Na, henza, nsaavira kwombakira lieta lya Yahova Nyasaye wange inyumba, kuli Yahova ya volera Daudi dada wange, na a vola, Mwana wowo, wa ndi vika ku intebe yoyo yobwami mbugono bubwo, uyu a lombakira lieta lyange inyumba.

⁶ Kunangwa kalunu ive u lage va ntemere mitaragwa ha Lebanon; navatumekiri vange va la va halala navatumekiri vovo; na nda ku ha amadanyi ga vatumekiri vovo vyosi vya u vola: kigira ive u manya si ha veye nomundu hagati hetu u manyi ku teme misala kuli Avasidone.

⁷ Na ga duka, Hiram lwa ya hulira makuva ga Solomoni, ya yanza ligali, na a vola, Yahova a santidzwe lero, wa ha Daudi mwana wobugeeri igulu wavandu avanene yava.

⁸ Na Hiram ya tuma avandu ku Solomoni, na a vola, Mbuliye aga u leti ku inze: nda kola lyenya lilyo yili lyosi ku misala gyemitaragwa, nemisala gyindi kuli yigyi.

⁹ Na vatumekiri vange va la gyi sulungutidza kutwula Lebanon kuduka ku inyanza; na nda gyi boha halala gyi tsie ku inzira yomunyanza kuduka ha u li ndaga, na nda gyi bohololera ho, na ive u la gyi vugula; na ive u la dukidza lyenya lyange, mu lihaana vyokulia vyenyumba yange.

¹⁰ Ma Hiram ya ha Solomoni misala gyemitaragwa nemisala gyindi kuli yigyi kuli lyenya lilye lyosi.

¹¹ Na Solomoni ya ha Hiram vigero tsielfu makumi gaviri vyengano vyokulia vyenyumba yeye, nevigero amakumi gaviri vvamaguta amalahi: ni ndiyo Solomoni ya ha Hiram muhiga nomuhiga.

¹² Na Yahova ya ha Solomoni ubugeeri kuli ya mu laga; na ha li nemirembe hagati ha Hiram na Solomoni; vombi va kola lilagana halala.

¹³ Na mwami Solomoni ya solola mu Israeli mwosi; nekiduma yikyo kya li kyavandu avasatsa tsielfu makumi gavaka.

¹⁴ Na ya va tuma Lebanon, mweli sa mulala avandu tsielfu likumi ku bulohidzi bwelitovoka; mweli mulala va li mu Lebanon, na myeli gyiviri va li engo: na Adoniram ya li igulu wa yavo ava kola myinzi.

¹⁵ Na Solomoni ya li navandu tsielfu makumi gatano na gaviri avagingi, vemisigo, netsielfu makumi gatano na gavaka ava temaga misala mu vigulu;

¹⁶ noku vita yava avanyampara va Solomoni ava singirira miyinzi, va li tsielfu tsivaka netsimia tsivaka, avameha ku yava avayinzira.

¹⁷ Nomwami ya laga, navo va vadza magina manene, magina gobuguli budinyu, a duke kutema muse gwenyumba namagina ga vadzwa.

¹⁸ Na vo mbaki va Solomoni na vombaki va Hiram va Vagebali va vadza magina, navo va lomba misala na magina kwombakira inyumba.