1 Avami 3 - KITABU KITAKATIFU

¹ Na Solomoni yehambannya na Farao mwami wa Egepeti, ya kwa mukana wa Farao, na a mu leta kumuvika mu lidala lya Daudi, ku duka inyinga ya yombaka inyumba yeye, nenyumba ya Yahova, nelidigi lya Yerusalemi lya kumbiridza tsi mbega tsyosi.

² Navutswa avandu vosi va li ni va haananga vihaanwa vyavo hosi ha diguluku, kigira si ha li nenyumba yombakirwa lieta lya Yahova, kuduka madiku yago.

³ Na Solomoni ya yanza Yahova, na a genda mu amalago ga Daudi dada wewe, navutswa ya haana vihaanwa na a samba vimuli ha diguluku.

⁴ Na mwami ya tsia Gibeon kuhaana vihaanwa yo; kigira ha zana ha veye ha diguluku hanene: Solomoni ya haana vihaanwa elfu vyokusambwa ku bwali zana.

⁵ Na Yahova ya loleka ku Solomoni ha Gibeon mmaloto inyinga yobudiku; na Nya saye ya vola, Teva ga wenyanga nda ku ha.

⁶ Na Solomoni ya tivula, na a vola, Ive wa kolera Daudi dada wange, mutumekiri wowo, ubulahi bunyingi, kuli ya genda imbiri wowo mu geligali, nombulungi, nomubulahi bwomwoyo halala nive; na ive wa mu vikira ubulahi yibu bunyingi, kigira wa mu ha mwana kwikala ku intebe yeye yobwami, kuli ga veye lero.

⁷ Na kalunu, O Yahova Nyasaye wange, wamehidze mutumekiri wowo mbugono bwa Daudi dada wange: na inze mbeye mwana mudoto vutswa; si manya kuli ga ndukira kutwula kinga kwingira.

⁸ Kandi mutumekiri wowo a veye hagati ha avandu vovo va wa tovola, navo va veye avandu vanene, ava ta nyala kuvalidzwa, kinga ava ta nyala kuvolerwa bunyingi bwavo.

⁹ Kigira yaga u he mutumekiri wowo mwoyo gwelimanya nduke kukalagira avandu vovo, nduke kumanya hagati hobu lahi nobudamano; kigira ni bwaha u nyala kukalagira avandu vovo ava nene.

¹⁰ Mwami ya yanza makuva yago, aga Solomoni ya tevera kindu yiki.

¹¹ Na Nyasaye ya mu volera, Kigira wenyanga inkuva yiyi, na si wenyanga ubuhindiri bwamadiku manyingi, kandi si weyenyeranga ubutugi, kandi si wenyanga livamwoyo lyavasigu vovo, navutswa wesaaliranga limanyeridza u duke kuhulira likalaga;

¹² henza, nkoli kuli livola lilyo: na mali kukuha mwoyo gwobugeeri nogwokumanyeridza; kuduka si ha veye nomundu wemira imbiri wowo wa li kuli ive, kinga inyima wowo si a la singira yo wundi kali mulala weliva kuli lilyo.

¹³ Kandi halala na yaga mali kukuha kya u vula ku sava, ubutugi nelidzomwinywa, kuduka si ha la va nomulala ku avami u leng'ana nive, madiku gogo gosi.

¹⁴ Nu u va nu u genda mu tsinzira tsyange, kugumira miima gyange namalago gange, kuli dada wowo Daudi ya genda, hene yaho nda kola madiku gogo kuva manyingi.

¹⁵ Ma Solomoni ya vuka; na, henza, lya li liloto: na ya duka Yerusalemi, na a singira imbiri welisanduku lyamalago ga Yahova, na a haana vihaanwa vyokusambwa, nevihaanwa vyemirembe, na a lombera avatumekiri veve vosi lilia.

¹⁶ Inyinga yeyo vakali vaviri vadza ku muami, navo va li avamalaya, na va singira imbiri wewe.

¹⁷ Mukali mulala ya vola, O, munene wange, inze nomukali uyu ku menya mu inyumba indala, ma inze ndivula mwana lwa nda li naye mu inyumba.

¹⁸ Na ga duka ku lidiku l lya kavaka inyima welivula, uyu naye yivula kandi; na kwinye kwa li halala; si ha li nomundu wundi halala na kwinye mu inyumba, ni ku ta li kwinye vaviri kweng'ine mu inyumba.

¹⁹ Nomwana womukali uyu ya kudza mbudiku, kigira ya gona kuye.

²⁰ Naye ya vuka budiku hagati, na ya vugula mwana wange hambalu hange, lwa inze mukana mutugwa wowo nda li ni ngonanga tsindolo, na ya mu vika ku kiritu kyikye, na ya vika mwana wewe mukudzu ku kiritu kyange.

²¹ Na lwa nda vuka mugamba ku nyunya mwana wange, nda lola u kudzi; navutswa mugamba lwa, nda henzeridza, henza, si a li mwana wange wa ndivula mba.

²² Nomu kali wundi uyu ya vola, Auwa; navutswa uvu u veye mwoyo nomwana wange, na uyu u kudzi nomwana wowo. Na uyu ya vola, Auwa; navutswa uyu u kudzi nomwana wowo, nomwana wange nu uyu u veye mwoyo. Va vola ndina imbiri womwami.

²³ Hene yaho mwami ya vola, Mulala a vola, Uyu u veye mwoyo nomwana wange, na mwana wowo u kudzi: nowundi a vola, Auwa; mwana wowo u kudzi, na mwana wange nuyu u veye mwoyo.

²⁴ Nomwami ya vola, Ndeteri kivavi. Navo va leta kivavi imbiri womwami.

²⁵ Mwami ya vola, Watannye mwana u veye mwoyo uyu hagati, u he mukali mu lala inusu, nowundi inusu.

²⁶ Hene yaho mukali mwene mwana u veye mwoyo ya volera mwami, kigira tsimbabasi tsitsye tsya samba mwoyo kigira mwana wewe, ya vola, O, munene wange, ha uyu mwana u veye mwoyo, u ta mwiita mba. Navutswa wundi uyu ya vola, Si a la va wange kinga wowo; yatanywe.

²⁷ Hene yaho mwami ya tivula, Ha uyu wokutanga mwana u veye mwoyo, u ta miita mba: uyu a veye mama wewe.

²⁸ Na Israeli vosi va hulira makuva gelikalaga lyomwami ya kalaga; navo va mu tia: kigira va lola ubugeeri bwa Nyasaye bu veye halala naye, a duke kukola likalaga.