1 Avami 19 - KITABU KITAKATIFU

¹ Ahabu ya volera Jezebeli vindu vyosi vya Elija ya kola, na kuli yiita vaprofeti vosi nekivavi.

² Hene yaho Jezebeli ya tuma mutumwa kutsia ku Elija, na a vola, Avanyasaye va nkolere ndiyo, nokuvita yaga, ni mba ni mbula kukola mwoyo gugwo kuling'ana nomulala ku mwoyo gwavo, mugamba inyinga kuli yiyi.

³ Na lwa ya lola yaga, ya singira, na a tsia kwehonnya mwoyo gwigwe, na ya duka Beersheba, li veye lidala lya Yuda, na ya leka yo mutumekiri wewe.

⁴ Navutswa mwene ya tsia lugendo lwelidiku lilala mmigendanyama, na yadza ni yikala isi womusala gwomurutemu: na yesaalira likudza, na a vola, Ga duki; kalunu, O Yahova, vugula mwoyo gwange; kigi ra inze si mbeye mulahi kuvita vagu ga vange mba.

⁵ Na ya gona hasi, na a gona tsindolo isi womurutemu; na, henza, ingelosi ya mu dira, na a mu volera, Vuka u lie.

⁶ Na ya henza, na lola ha mutwe gwigwe ubu kima bwominywa ku amanda, neki muga kyamadzi. Na a lagira na a nwa na a gona hasi kandi.

⁷ Na ingeiosi wa Yahova yadza kuye hali kaviri, na a mu dira, na a vola, Vuka u lie, kigira lugendo lu veye lunene ligali ku ive.

⁸ Naye ya vuka, na a lia na a nwa, na a genda mu tsingulu tsye vyokulia yivyo lugendo lwamadiku makumi gane nobudiku makumi gane kuduka Horebu kigulu kya Nyasaye.

⁹ Na ya duka yo mu luhangaywa, na gona yo; na, henza, likuva lya Yahova lya duka kuye, na a mu teva Wenyaki hano, Elija?

¹⁰ Naye ya tivula, Nda li nelikendeka ligali kigi ra Yahova, Nyasaye wa mahe; kigira avana va Israeli va leki amalago gogo, nokutsoma hasi ubwali bubwo, navaprofeti vovo viitwa nekivavi: na inze, ntigaye inze tsyeng'ine; navo venyanga mwoyo gwange va duke kugutwulidza.

¹¹ Naye ya mu volera, Tsia kyova, u singire mu kigulu imbiri wa Yahova. Na, henza, Yahova ya vita ha zana, nekihudzudzi kinene kyetsingulu kya tandula vigulu, na kwatanya tsinyanda imbiri wa Yahova; navutswa Yahova si ya li mu kihudzudzi zana mba: inyima weki hudzudzi yikyo lidegera lyekivala lya li ho, navutswa Yahova si ya li mu lidegera zana yilyo mba:

¹² na inyima welidegera muliru gwa li ho; navutswa Yahova si ya li mu muliru mba: nenyima womuliru mwoyo gwa li ho munyerere nomukiring'anu.

¹³ Kunangwa ga duka, lwa Elija ya hulira mwoyo yigwo, ya boha mmoni mwimwe mu tsingubo tsitsye, na a tsia kyova, na a singira ha bwingiriru bwoluhangaywa. Na, he nza, mwoyo gwadza kuye ni gu vola U kola ki hano, Elijai

¹⁴ Naye ya tivula, Nda li nelikendeka ligali kigira Yahova, Nyasaye wamahe; kigira avana va Israeli va leki malago gogo, nokutsoma hasi ubwali bubwo, nokwiita vaprofeti vovo nekivavi; na inze, ntigaye inze tsyeng'ine; navo venyanga mwoyo gwange va duke kugutwulidza.

¹⁵ Na Yahova ya mu volera, Tsia, wiranire ku inzira yomukyangalangwi kuduka Damasko: lwa u duka yo, u vake Hazaeli a ve mwami wa Siria;

¹⁶ na Jehu mwana wa Nimshi u la mu vaka maguta a ve mwami ku Israeli; na Elisha mwana wa Shafatu wa Abelimehola, u mu vake maguta a ve muprofeti mbugono bubwo.

¹⁷ Kunangwa ga la va, uyu u li hona ku kivavi kya Hazaeli, Jehu a la mwiita; na uyu u li hona ku kivavi kya Jehu Elisha a la mwiita.

¹⁸ Halala na yaga va tigala ku inze mu Israeli, avandu tsielfu tsitano na tsiviri, amasigamo yago gosi ga vula kwinamira Baal, neminwa gyosi gya vula kumubusa.

¹⁹ Ma ya twula ha zana, na ya nyola Elisha mwana wa Shafatu, wa li na a limanga naye ya li netsinira tsyetsing'ombe iikumi na tsiviri, nomwene ya li halala na inira i kola likumi na tsiviri: na Elija ya vita na a tsia ahimbi naye, na a mu sikisira ingubo yeye.

²⁰ Naye ya leka tsing'ombe, na a londa Elija tsimbiru, nokuvola, Mwadza, mbe munwa, ntsie kubusa dada na mama, na nda ku londa. Naye ya mu volera, Yirana; kigira nku koleye ki?

²¹ Naye yirana na a leka kumulonda, na vugula inira yetsing'ombe, na a tsiita, na a deka inyama neviju vyetsing'ombe, na a ha avandu, ni va lia. Hene yaho ya singira, na a londa Elija, na a mu tumekira.