1 Avami 16 - KITABU KITAKATIFU

¹ Likuva lya Yahova lya duka lu ku Jehu mwana wa Hanani ku Baasha, ni li vola,

² Kigira nda kunenehidza kutwula ku lugukyi, nokukukola u ve mwimiriri ku vandu vange Israeli, na ive wa genda mu inzira ya Jeroboam, na wa gotidza avandu vange Israeli, nokumbihiri ridza nobwoni bwavo;

³ henza, nda mu kuuta, nokutwulidza Baasha ligali nenyumba yeye; na nda kola inyumba yoyo i ve lugano lulala nenyumba ya Jeroboam mwana wa Nebati.

⁴ Mundu wa Baasha u kudzera mu lidala tsimbwa tsi la mu lia; na uyu u kudzera kyova manyonyi gegulu ga la mu lia.

⁵ Na vikolwa vyosi vya Baasha vya tigala, nevyosi vya ya kola, ne tsingulu tsitsye, si vya ng'odwa mkitabu kyetsinyinga tsyavami va Israeli?

⁶ Na Baasha ya gona halala navaguga veve na ya tebwa ha Tiriza; nomwana wewe Ela yameha mbugono bwibwe.

⁷ Halala na yaga, likuva lya Yahova ku Baasha noku inyumba yeye, muprofeti Jehu mwana wa Hanani ya li leta, kigira budamano bwosi bwa ya kola imbiri wa Yahova, kumuvihiriridza nevikolwa vyama kono gege, vya li lugano lulala nenyumba ya Jeroboam, kandi kigira ya mu kuya.

⁸ Ku muhiga gwa makumi gaviri na gyitano na mulala gwelyameha lya Asa mwami wa Yuda, hene yaho Ela mwana wa Baasha ya tanga kwameha ku Israeli mu Tiriza, na yameha mi higa gyiviri.

⁹ Nomutumekiri wewe Zimri, munyampara wenusu ya ma gari gege gobulwani, ya kola hwe baali kuye. Na ya li mu lidala lya Tiriza, naye a nwedzanga kuduka kuhambika mu inyumba ya Ariza, wa li munene ku inyumba yomwami mu Tiriza:

¹⁰ na Zimri yingira na ya mu kuya, nokumwiita, mu muhiga gwa makumi gaviri na gyitano na gyiviri gwelyameha Iva Asa mwami wa Yuda, naye yameha mbugono bwibwe.

¹¹ Na ga duka, lwa ya tanga kwameha, nonoho lwa yikala ku intebe yobwami, ya kuya avandu vosi avenyumba ya Baasha: si ya leka mwana muyai kali mulala mba, kinga ku aviko veve, kinga ku avalina veve.

¹² Na ndiyo Zimri ya dividza inyumba yosi ya Baasha, kuli likuva lya Yahova, ya vola ku Baasha, no munwa gwa Jehu muprofeti,

¹³ kigira ubwoni bwosi bwa Baasha, nobwoni bwomwana wewe Ela, bwa va kola, nobwa va gotidzira ku Israeli, kuvihiriridza Yahova, Nyasaye wa Israeli, nevyavutswa vyavo.

¹⁴ Vi kolwa vyosi vya Ela vya tigala, na vyosi vya ya kola, si vya ng'odwa mu kitabu kyetsinyinga tsyavami va Israeli?

¹⁵ Mu muhiga gwa makumi gaviri ne gyitano negyiviri gwelyameha lya Asa mwami wa Yuda, Zimri yameha madiku gatano na gaviri mu Tiriza. Na inyinga yeyo avandu va li ni va veye mu lihe ha Gibethon, lidala lya Vafilisiti.

¹⁶ Navandu va li mu lihe va hulira, Zimri u koli ubwebaali, nokwiita mwami: kigira yaga avandu va Israeli vamehidza Omri, wa li munene welihe, va mu kola mwami ku Israeli lidiku yilyo mu hokusosa.

¹⁷ Omri yanegira kutwula ha Gibethon, na Israeli vosi halala naye, va kumbiridza lidala lya Tiriza.

¹⁸ Na ga duka, lwa Zimri ya lola lidala li gumeywi, yingira mu impinga yenyumba yobwami, na ya samba inyumba yobwami, no mwene ya hiira mu, na a kudza,

¹⁹ kigira ubwoni bwibwe bwa ya kola bwa li budamano imbiri wa Yahova, mu ligenda ku inzira ya Jeroboam, nomu bwoni bwa ya kola, kugotidza ku Israeli.

²⁰ Vikolwa vyosi vya Zimri vya tigala, nekirage kikye kya ya kola, si vya ng'odwa mu kitabu kyetsinyinga tsyavami va Israeli?

²¹ Inyinga yeyo avandu va Israeli vavukana vidieli viviri: avoluvega lulala va londa Tibini mwana wa Ginathu, va duke kumukola mwami, na voluvega lundi va londa Omri.

²² Navutswa ava londa Omri va guuta ava londa Tibini mwana wa Ginathu: ma Tibini ya kudza, na Omri yameha.

²³ Mu muhiga gwa makumi gavaka na mulala gwelya meha lya Asa mwami wa Yuda, hene yaho Omri ya tanga kwameha ku Israeli, na yameha mihiga likumi na gyiviri: yameha mihiga gyitano na mulala mu Tiriza.

²⁴ Na ya gula kigulu kya Samaria ku Shemeru netsitalenta tsiviri tsyefetha; naye yombaka ku kigulu, na ya gulika lidala lya yombaka lieta Samaria, ku lieta lya Shemeru mwene wekigulu zana.

²⁵ Omri ya kola budamano imbiri wa Yahova, ya kola ubuda mano kuvita bwa yavo avimira imbi ri wewe.

²⁶ Kigira ya genda mu inzira yosi ya Jeroboam mwana wa Nebati, nomu bwoni bwibwe bwa ya gotidzira ku Israeli, kuvihiriridza Ya hova, Nyasaye wa Israeli, ku vyavu tswa vyavo.

²⁷ Vikolwa vyosi vya Omri vya tigala, netsingulu tsitsye tsya ya li natsyo, si vya ng'odwa mu kitabu kyetsinyinga tsyavami va Israeli?

²⁸ Omri ya gona halala navaguga veve, na ya tebwa mu Samaria, na Ahabu mwana wewe yameha mbugono bwibwe.

²⁹ Mu muhiga gwa makumi ga vaka na gyitano na gyivaka gyelya meha lya Asa mwami wa Yuda, hene yaho Ahabu mwana wa Omri ya tanga kwameha ku Israeli: na Ahabu mwana wa Omri yameha ku Israeli mu Samaria mihiga makumi gaviri na gyiviri.

³⁰ Na Ahabu mwana wa Omri ya kola budamano imbiri wa Yahova kuvita yavo vosi ava li imbiri wewe.

³¹ Ni ga va, kuli ki veye kindu kikekeke kuye kugenda mubwoni bwa Jeroboam mwana wa Nebati, ya kwa Jezebeli mukana wa Ethibaali mwami wa Vasidon, na ya tsia na a tumekira Baal, na ya mu sigamira.

³² Naye yombakira Baal ubwali mu inyumba ya Baal, ya yombaka mu Samaria.

³³ Ahabu ya lomba misala gyemisambwa; na Ahabu ya kira kuvihiriridza Yahova, Nyasaye wa Israeli, kuvita avami va Israeli vosi a va li imbiri wewe.

³⁴ Mmadiku gege Hieli Mubetheli yombaka lidala lya Yeriko: ya tema muse gwalyo nelikudza lyomwana wewe wambiri Abiram, naye ya singeridza viribwa vyalyo nelikudza lyomwana wewe mukekeke, Segubu, kuli likuva lya Yahova ya vola nomunwa gwa Joshua mwana wa Nun.