1 Avami 14 - KITABU KITAKATIFU

¹ Inyinga yeyo Abija mwana wa Jeroboam ya tanga kulwala.

² Jeroboam ya volera mukali wewe, Mwadza, singira, wegirunkanye, u vule kumanyekana u veye mukali wa Jeroboam: u tsie Shilo: henza, a veyo Ahija muprofeti, wa vola ku makuva gange nda duka kuva mwami kwameha ku avandu yava.

³ Vugula tsimango likumi, nevipagaga, nechupa yobwuki, na u tsie kuye: uyu a la ku volera kuli makuva gomwana uyu ga la duka kuva.

⁴ Nomukali wa Jeroboam ya kola ndiyo, na a singira, na a tsia Shilo, na a duka mu inyumba ya Ahija. Inyinga yeyo Ahija si ya nyala kulola, kigira tsimoni tsitsye tsya li tsimbakulu kigira ubusakulu bwibwe.

⁵ Yahova ya volera Ahija, Henza, mukali wa Jeroboam yadza kukuteva makuva gomwana wewe; kigira a lwala: na ive u la mu volera ndi na ndi; kigira ga la va, lwa yingira ku ive, a lekola kuva mukali wowundi.

⁶ Ga duka ndiyo, Ahija lwa ya hulira muliviti gwevirenge vivye, lwa yingira mmuliango, hene yaho ya vola, Hamba mu inyumba, ive mukali wa Jeroboam; kigira ki wekola kuva mukali wowundi? Kigira ntumeywi ku ive kuleta makuva madinyu.

⁷ Tsia u volere Jeroboam, Yahova, Nyasaye wa Israeli a vola yaga: Kigira mali kunenehidza ive kutwula hagati ha avandu, nokukola ive u ve mwimiriri igulu ku avandu vange Israeli,

⁸ na nda tandula ubwami kutwula ku inyumba ya Daudi, nokubuha ive; navutswa ive si u va kuli mutumekiri wange Daudi, wa gumira lilagana lyange, nokulonda inze nomwoyo gwigwe gwosi, kukola ubulungi mu tsimoni tsyange, yaga geng'ine,

⁹ navutswa u mali kukola budamano kuvita vosi avimira imbiri wowo, na ive wa tsi? Kwelombera avanyasaye vandi, nevifwananyi vyokutulwa, kuduka kumbihiriridza, na wa nta inyima womugongo gugwo:

¹⁰ kunangwa, henza, nda leta buda mano ku inyumba ya Jeroboam, na nda twulidza ku Jeroboam avana vosi vayai, uyu wa bofwa na uyu wa lekerwa bwiyangu mu Israeli, na nda twulidza ligali inyumba ya Jeroboam, kuli mundu a kuutanga isingu, kuduka i fwera ligali.

¹¹ Uyu wa Jeroboam u kudzira mu lidala tsi mbwa tsi la mu lia; na uyu u kudzira kyova, manyonyi ga la mu lia: kigira ni Yahova wa vola.

¹² Kuna ngwa, singira u tsie yengo: na lwa virenge vivyo vingira mu lidala, mwana a la kudza.

¹³ Na Israeli vosi va la mu syomera, nokumuta; kigira ni uyu yeng'ine wa Jeroboam u la tebwa mu kilindwa, kigira muye kya nyoleka mu kindu kilahi kya lungika ku Yahova, Nyasaye wa Israeli, mu inyumba ya Jeroboam.

¹⁴ Kuvita yaga Yahova a lesingeridzira mwami yamehe ku Israeli, u li twulidza inyumba ya Jeroboam lidiku yilyo: ni kindu ki? Kali kalunu.

¹⁵ Kigira Yahova a la kuya Israeli, kuli kidundu ki hunzulanyangwa mmadzi; na a liha Israeli kumutwulidza mu kivala kilahi yiki kya ya ha vaguga vavo, na a la va salanya engereka wo Mugera, kigira va lomba misala gyemisambwa gyavo, kuvihiriridza Yahova.

¹⁶ Naye a la leka Israeli kulwang'amira kigira ubwoni bwa Jeroboam ya kola, kigira yibu u koli Israeli a avoni.

¹⁷ Na mukali wa Jeroboam ya singira, na ya tsia, na ya duka Tiriza: na lwa ya duka ho kwingira mu inyumba, mwana ya kudza.

¹⁸ Na Israeli vosi va mu ta, nokumusyomera, kuli likuva lya Yahova, lya ya vola nomunwa gwomutumekiri wewe Ahija muprofeti.

¹⁹ Na vikolwa vindi vya Jeroboam vya tigala, kuli ya lwana bulwani, na kuli yameha, Henza, vya ng'odwa mkitabu kyetsinyinga tsyavami va Israeli.

²⁰ Na madiku gelyameha lya Jeroboam ga li mihiga makumi gaviri na gyiviri: na ya gona nava guga veve, nomwana wewe Nadabu yameha mbugono bwibwe.

²¹ Na Rehoboam mwana wa Solo moni yameha mu Yuda. Rehoboam ya li nemihiga makumi gane na mulala lwa ya tanga kwameha, na yameha mihiga likumi na gyitano na gyiviri mu Yerusalemi, lidala lya Yahova ya tovola mu tsihiri tsyosi tsya Israeli, a duke kuvika lieta lilye mu: nelieta lya mama wewe lya li Naama makana wa Muamon.

²² Avandu va Yuda va kola budamano imbiri wa Yahova, na va mu kendekidza nobwoni bwavo bwa va kola, kuvita bwosi bwa vaguga vavo va kola.

²³ Kigira veyombakira hadiguluku, neminara, nemisala gyemisambwa, ku vigulu vitambi vyosi ne isi we misala gyosi gyamatu mavisi;

²⁴ kandi va veye avasatsa vobuheyi mu kivala: ni va kola kuli livihiriridza lyosi lyetsihiri tsya Yahova ya kunga kutwula imbiri wavana va Israeli.

²⁵ Na ga duka inyinga yomuhiga gu kola gyitano gwelyameha lyo mwami Rehoboam, Shishaka mwami wa Egepeti yanegira kulwana ne Yerusalemi;

²⁶ ya vugula ubutugi bwosi bwenyumba ya Yahova, nobwenyuma yomwami; ya vugula vindu vyosi, na a tsia navyo: na ya vugula tsingavo tsyethahabu tsyosi tsya Solomoni ya lomba.

²⁷ Mwami Re hoboam ya lomba tsingavo tsyomugasa mbugono bweyitsi, na ya tsi vika mmakono gavanene vavalindi, ava lindanga kiliango kyenyumba yomwami.

²⁸ Na ga duka, lwa mwami yingira mu inyumba ya Yahova, avalindi va tsi ginga, noku tsiranya kandi mu inyumba ya valindi.

²⁹ Na vikolwa vya Rehoboam vya tigala, na vyosi vya ya kola, si vya ng'odwa mu kitabu kyetsinyinga tsyavami va Yuda?

³⁰ Ha li nobulwani hagati ha Rehoboam na Jero boam madiku gosi.

³¹ Rehoboam ya gona halala navaguga veve, na ya tebwa halala navaguga veve mu lidala lya Daudi: nelieta lya mama wewe lya langwa Naama mukana Muamon. Na Abijam mwana wewe yameha mbugono bwibwe.