Zacarias 5 - Samarenyo Meaning-Based Bible (1984)

Ginpakita an Panan-awon hiunong han Nalupad nga Linikid nga Basahan

¹ Sinmiplat na liwat ako, ngan hini nga takna hinkit-an ko in usa nga linikid nga basahan.

² Ginpakianhan ako han anghel kon ano an akon hinkit-an. Binmaton ako, “Usa nga nalupad nga linikid nga basahan; siyam ka metros an kahilaba hini ngan upat ug tunga ka metros an kahilapad.”

³ Niyan nagsiring hiya ha akon, “Iginsurat dida hini an mga panhimaraot nga magawas ngadto han bug-os nga tuna. Dida han usa nga bayhon han linikid nga basahan nahisurat ini nga kukuhaon tikang han tuna an tagsa nga kawatan; ngan ha luyo nga bayhon nahisurat ini nga kukuhaon liwat an ngatanan nga nanunumpa hin buwa.

⁴ Nasiring an Ginoo nga Labi Kamakagarahum nga pagagawason niya ini nga mga panhimaraot ngan masulod ini han balay han tagsa nga kawatan ngan han balay ha tagsa nga nanunumpa hin buwa. Magpapabilin ini dida han ira mga balay ngan ira gud pupukanon an ira mga balay.”

Ginpakita an Panan-awon hiunong han Babaye dida han Alat

⁵ Pinmakita na liwat an anghel ngan nagsiring, “Tan-awa! May-ada pa lain nga tiabot!”

⁶ “Ano man ini?” nagpakiana ako. Binmaton hiya, “Usa ini nga alat, ngan natindog ini para han mga sala han bug-os nga tuna.”

⁷ May takop nga timga an alat. Samtang nagkikinita ako, gin-alsa an takop, ngan didto ha sakob han alat nalingkod in babaye!

⁸ Nagsiring an anghel, “Tinitindogan hini nga babaye an mga pagraogdaog.” Niyan iya idinuso an babaye ngadto ha sakob han alat ngan gintakpan.

⁹ Hinmangad ako ngan hinkit-an ko in duha nga kababayen-an nga nalupad tipakadi ha akon, nga may gamhanan nga mga pako nga sugad hin kanan talabong. Gin-alsa nira an alat ngan idinagit nira.

¹⁰ Ginpakianhan ko an anghel, “Ngain man nira dadad-a adto?”

¹¹ Binmaton hiya, “Ngadto ha Babilonia diin magtitindog hira hin templo para hini. Kon mahuman na an templo, ibubutang didto an alat basi pagsingbahon.”