Zacarias 4 - Samarenyo Meaning-Based Bible (1984)

Ginpakita an Panan-awon hiunong han Burutangan hin Suga

¹ Binmalik na liwat an anghel nga nakighimangraw ha akon ngan ginpukaw ako sugad hin nakaturog ako.

² “Ano an imo hinkikit-an?” pinmakiana hiya. “Usa nga burutangan hin suga nga bulawan,” binmaton ako. “Ha igbaw nga kataposan may-ada makaong para han lana ngan dida hini may pito nga mga suga ngan kada suga may-ada pito nga pabilohan para hin pito nga pabilo.

³ May duha nga mga kahoy nga olibo paluyo han burutangan hin suga.”

⁴ Niyan ginpakianhan ko an anghel, “Mano, ano an kahulogan hini nga mga butang?”

⁵ “Diri ka ba maaram?” nagpakiana hiya ha akon. Binmaton ako, “Diri, Mano; diri ako maaram.”

^10b Nagsiring ha akon an anghel: “An pito nga mga suga amo an pito nga mga mata han Ginoo nga nakakakita han bug-os nga tuna.”

¹¹ Niyan ginpakianhan ko hiya, “Ano man an kahulogan han duha nga mga kahoy nga olibo paluyo han burutangan hin suga?

¹² Ngan ano an kahulogan han duha nga mga sanga hin olibo ha ligid han duha nga mga tubo nga bulawan nga inaawasan han lana hin olibo?”

¹³ Ginpakianhan ako niya, “Diri ka ba maaram?” “Diri ako maaram,” binmaton ako.

¹⁴ Niyan nagsiring hiya, “Amo ini an duha nga mga tawo nga ginpili ngan gindihogan han Dyos hin pag-alagad ha iya nga Ginoo han bug-os nga tuna.”

Nagsaad kan Sorobabel an Dyos

⁶ Ginsiring ako han anghel nga ihatag ko kan Sorobabel ini nga mensahe tikang han Ginoo: “Magmamalinamposon ka diri pinaagi han kusog hin kasondalohan o pinaagi han imo kalugaringon nga kusog, kundi pinaagi han akon espiritu.

⁷ Mapapara ha imo atubangan in mga makaurulang nga sugad hin kabukiran ka dagko. Pagtitindogon mo na liwat an Templo, ngan samtang ibubutang mo an kataposan nga bato, magoliat an mga tawo, ‘Kamatahom, kamatahom gayod han Templo!’”

⁸ Inmabot ha akon in lain nga mensahe tikang han Ginoo.

⁹ Nagsiring hiya, “Iginpahimutang ni Sorobabel an patukoranan han Templo, ngan huhumanon gud ini niya. Kon mahinabo na ini, mahibabaro an akon mga tawo nga amo ako an nagsugo ha imo ngadto ha ira.

^10a Nabibido hira kay mahinay an trabaho. Kundi kon kumita hira kan Sorobabel nga magpapadayon hin pagtindog han Templo, malilipay hira.”