Zacarias 3 - Samarenyo Meaning-Based Bible (1984)

Ginpakita an Panan-awon hiunong han Labaw nga Padi

¹ Dida hin lain nga panan-awon iginpakita ha akon han Ginoo hi Josue nga Labaw nga Padi nga natindog ha atubangan han anghel han Ginoo. Ngan didto natindog ha sapit ni Josue hi Satanas nga andam hin pagsumbong ha iya.

² Nagsiring an anghel han Ginoo kan Satanas, “Satanas, pagsirotan ka unta han Ginoo! Pagsirotan ka unta han Ginoo nga nahigugma han Jerusalem. Sugad ini nga tawo hin lipak nga sungo nga inagaw ha kalayo.”

³ Natindog hi Josue didto, nga nakakasul-ot hin mahugaw nga bado.

⁴ Ginsiring han anghel an langitnon niya nga mga kabulig, “Huboa an mahugaw nga bado hini nga tawo.” Niyan nagsiring hiya kan Josue, “Ginkuha ko na an imo sala ngan tatagan ko ikaw hin bag-o nga bado.”

⁵ Ginsugo niya an mga kabulig pagbutang hin malinis nga pudong ha ulo ni Josue. Ginbuhat nira ini ngan iginsul-ot nira ha iya an bag-o nga bado samtang natindog didto an anghel han Ginoo.

⁶ Niyan ginsumatan hi Josue han anghel nga

⁷ nagsiring an Ginoo nga Labi Kamakagarahum: “Kon pagsugton mo an akon mga balaod ngan pagtumanon mo an akon mga katungdanan nga iginhatag ko ha imo, magpapadayon ka hin pagkatinaporan han akon Templo ngan han mga bungsaran hini, ngan pamamatian ko an imo mga pag-ampo, sugad nga pinamamatian ko an mga pag-ampo han mga anghel nga aadi ha akon atubangan.

⁸ Sanglit pamati, Josue, ikaw nga amo an Labaw nga Padi; ngan pamati, kamo nga igkasi niya nga mga padi, kamo nga amo an tigaman hin maupay nga kabubwason: igpapadayag ko an akon surugoon nga tinatawag An Sanga!

⁹ Ibubutang ko ha atubangan ni Josue in usa la nga bato nga pipito an bayhon. Titigiban ko ini hin sinurat, ngan sakob la hin usa ka adlaw kukuhaon ko an sala hini nga tuna.

¹⁰ Kon umabot na ito nga adlaw, an kada usa ha iyo madapit han iya amyaw hin pagkanhi ngan pagpahimulos hin kalinaw ngan kahimyangan ha ubos han iyo mga tanom nga ubas ngan igos.”