Zacarias 2 - Samarenyo Meaning-Based Bible (1984)

Ginpakita an Panan-awon han Isurukol nga Lubid

¹ Dida hin lain nga panan-awon hinkit-an ko an tawo nga may dara nga isurukol nga lubid.

² “Tikain ka?” nagpakiana ako. “Magsusukol ako han Jerusalem,” binmaton hiya, “basi hisabotan kon ano an kahilaba ngan kahiluag han syudad.”

³ Niyan hinkit-an ko nga hinmirani ha akon an anghel nga nakighimangraw ha akon, ngan gintapo hiya hin lain nga anghel.

⁴ Nagsiring an syahan nga anghel ngadto han ikaduha, “Lanata an batan-on nga lalake nga may isurukol nga lubid ngan sumati nga magkakamay-ada damo hin duro nga mga tawo ngan kahayopan didto ha Jerusalem nga diri na ini kapapaderan.

⁵ Nagsaad an Ginoo nga hiya ngahaw an magigin pader nga kalayo palibot han syudad ha pagpanalipod hini, ngan mag-uokoy hiya didto ha bug-os niya nga gahom.”

Ginpauli an mga Bihag

^6-7 Nagsiring an Ginoo han iya mga tawo, “Ginpasarang ko kamo ha ngatanan nga mga dapit. Kundi yana, kamo nga ginhalin nga mga bihag, palagiw kamo tikang ha Babilonia ngan balik kamo ngadto ha Jerusalem.

⁸ Adton maghilabot ha iyo, maghihilabot liwat han akon labi kahinigugma.” Sanglit ginsugo ako han Ginoo nga Labi Kamakagarahum dara ini nga mensahe para han mga nasod nga nanikas han iya mga tawo:

⁹ “An Ginoo ngahaw amo an makikiaway kontra ha iyo, ngan paninikasan kamo han mga tawo nga iyo anay hadto mga surugoon.” Kon mahinabo na ini, mahibabaro an ngatanan nga ginsugo ako han Ginoo nga Labi Kamakagarahum.

¹⁰ Nagsiring an Ginoo, “Pagkanta nga malipayon, mga tawo han Jerusalem! Makada ako ha iyo hin pag-ukoy.”

¹¹ Hito nga panahon mapasingadto han Ginoo in damo nga mga nasod ngan mahihimo hira nga iya mga tawo. Mag-uokoy hiya dida ha iyo, ngan mahibabaro kamo nga ginsugo ako ngada ha iyo.

¹² Magigin linain nga bahin han Ginoo an Juda didto han iya baraan nga tuna, ngan hihigugmaon niya an Jerusalem labaw han ngatanan.

¹³ Paghilom kamo ngatanan ha atubangan han Ginoo, kay maabot hiya tikang han iya baraan nga urokyan.