Zacarias 12 - Samarenyo Meaning-Based Bible (1984)

Matatalwas an Jerusalem ha Panahon nga Tiarabot

¹ Mensahe ini tikang han Ginoo hiunong han Israel, an Ginoo nga nagbitad han kalangitan, nagtuha han tuna, ngan naghatag hin kinabuhi han tawo. Nasiring hiya,

² “Hihimoon ko an Jerusalem nga sugad hin kopa hin bino; mainom an mga nasod nga hirani ha iya ngan magruruogduog sugad hin mga hubog. Ngan kon sumulong an mga nasod han Jerusalem, susulongon man liwat an iba nga mga syudad han Juda.

³ Kundi kon umabot na ito nga panahon, hihimoon ko an Jerusalem nga sugad hin mabug-at nga bato—masasamad an bisan ano nga nasod nga magpasipara hin pag-alsa hini. Mag-uurosa han ira mga kusog an ngatanan nga kanasoran han kalibutan hin pagsulong han Jerusalem.

⁴ Dida hito nga panahon hihimoon ko nga magkalilisang an mga kabayo ngan hihimoon ko nga mga tuyaw an ngatanan nira nga mga nasakay han kabayo. Babantayan ko an mga tawo han Juda, kundi bubutahon an mga kabayo han ira mga kaaway.

⁵ Niyan masiring ha ira la ngahaw an mga banay han Juda, ‘An Ginoo nga Dyos nga Labi Kamakagarahum nahatag hin kusog ngadto han iya mga tawo nga nag-uokoy didto ha Jerusalem.’

⁶ “Dida hito nga panahon hihimoon ko an mga banay han Juda nga sugad hin kalayo didto hin kagurangan o didto hin uma nga hinog para hin pag-ani—pagbubungkagon nira an ngatanan nga higrani nga mga nasod. Magpapabilin an mga tawo han Jerusalem nga waray kataragman didto ha sakob han syudad.

⁷ “Ako nga Ginoo an mahatag hin pagdarag-an syahan ngadto han mga kasondalohan han Juda, basi an kadungganan nga kakarawaton han mga tulin ni David ngan han mga tawo han Jerusalem diri lumabaw han iba didto ha Juda.

⁸ Dida hito nga panahon pananalipdan han Ginoo adton mga nag-uokoy didto ha Jerusalem, ngan masusugad kan David ka makusog bisan an labi hin kamaluya dida ha ira. An mga tulin ni David magmamando ha ira sugad han anghel han Ginoo, sugad han Dyos ngahaw.

⁹ Dida hito nga panahon bubungkagon ko an tagsa nga nasod nga magtalinguha hin pagsulong han Jerusalem.

¹⁰ “Pupun-on ko an mga tulin ni David ngan an iba nga mga tawo han Jerusalem han espiritu han pagkalooy ngan han espiritu han pag-ampo. Tatan-awon nira adton ira ginbuno ngan magmamabidoon hira tungod ha iya sugad hadton mga nagmamasulob-on tungod hin uusa la nga anak. Magmamasulob-on gud hira sugad hadton mga nawad-an han ira suhag nga lalake.

¹¹ Dida hito nga panahon masusugad ka dako an kasubo didto ha Jerusalem han kasubo para kan Hadadrimon didto ha kapatagan han Meguido.

^12-14 Maglulugaring la hin pagkamasulob-on an kada panimalay didto han tuna: an panimalay nga tinmikang kan David, an panimalay nga tinmikang kan Natan, an panimalay nga tinmikang kan Levi, an panimalay nga tinmikang kan Simei, ngan an ngatanan nga iba nga mga panimalay. Maglulugaring la hin kamasulob-on an kada panimalay, ngan an kalalaken-an han kada panimalay malain han kababayen-an hin pagkamasulob-on.