Ruth 3 - Samarenyo Meaning-Based Bible (1984)

Nakaagi hin Bana hi Ruth

¹ Paghagos hin pira kaadlaw nagsiring kan Ruth hi Naomi, “Kinahanglan magbiling ako hin bana para ha imo, basi magkamay-ada ka hin imo kalugaringon nga panimalay.

² Panumdom nga amon uropod ini hi Boos, kanay kababayen-an imo inupdan hin pag-ani. Pamati. Yana nga gab-i maggigiok hiya han sebada.

³ Sanglit karigos, pagpahamot, ngan pagbado han imo gimamaupayi nga panapton. Niyan pakadto han iya giriokan, kundi ayaw hiya pasabta nga aadto ka tubtob han kahuman niya pagkaon ngan pag-inom.

⁴ Inawa hin maupay an dapit nga hinihigdaan niya, ngan kon nahingangaturog na hiya, kadtoa, buksa an iya taplak, ngan higda ha iya tiilan. Susumatan ka niya han imo pagbubuhaton.”

⁵ Binmaton hi Ruth, “Bubuhaton ko an ngatanan nga imo ginsiring.”

⁶ Sanglit kinmadto hi Ruth ha giriokan ngan ginbuhat niya sumala han ginsiring ha iya han iya ugangan nga babaye.

⁷ Katapos ni Boos pagkaon ngan pag-inom, nagmalipayon hiya. Kinmadto hiya han tinambak nga sebada ngan hinmigda hiya hin pagkaturog. Dinmaop hi Ruth hin hinay-hinay, ginbukas niya an taplak, ngan hinmigda ha iya tiilan.

⁸ Hito nga gab-i tigda hiya nga nagmata, linmimbag hiya, ngan nahipausa nga may babaye nga nahigda ha iya tiilan.

⁹ “Hin-o ka?” pinmakiana hiya. “Hi Ruth ako,” binmaton hiya. “Tungod kay suok ka nga uropod, ikaw an may katungod hin pagmangno ha akon. Sanglit pangasaw-a gad ako.”

¹⁰ Nagsiring hiya, “Bendisyonan ka unta han Ginoo. Ginpakita mo an imo labaw nga kamaunongon hin panimalay dida hini nga imo binubuhat yana kay han imo ginbuhat para han imo ugangan nga babaye. Makakahimo ka unta hin pamiling hin batan-on nga lalake, ma riko o ma kablas hiya. Kundi waray mo ini buhata.

¹¹ Sanglit ayaw kabaraka, Ruth. Akon bubuhaton an ngatanan nga imo pinangangaro. An ngatanan dinhe ha bungto nakilala nga maupay ka nga babaye.

¹² Matuod nga suok ako nimo nga uropod, ngan may katungod ko hin pagmangno ha imo, kundi may-ada surusuok pa kay ha akon nga imo uropod.

¹³ Pabilin dinhe ha bug-os nga gab-i, ngan ha pagkaaga aton hisasabtan kon maninimangno ba hiya ha imo. Kon maruyag hiya, maupay man; kon diri, nagsusumpa ako pinaagi han buhi nga Dyos nga ako an maninimangno ha imo. Higda la yana ngan pabilin dinhe ngada han pagkaaga.”

¹⁴ Sanglit hinmigda hiya ha iya tiilan ngada han pagkaaga, kundi binmangon hiya nga masirom pa basi diri hiya hikit-an, kay diri karuyag ni Boos nga may mahibaro nga nakadto hiya.

¹⁵ Nagsiring ha iya hi Boos, “Huboa an imo kurugpos ngan bitara didi.” Iya ini ginbuhat, ngan ginsudlan ini ni Boos hin mga baynte ka kilo nga sebada, ngan ginbuligan hiya hin pagpas-an hini. Niyan inmoli hiya ngadto ha bungto ngan dara niya ini.

¹⁶ Han pag-abot niya ha balay, ginpakianhan hiya han iya ugangan nga babaye, “Kumosta an imo lakat, anak?” Ginsumatan hiya ni Ruth han ngatanan nga ginbuhat ha iya ni Boos.

¹⁷ Nagsiring pa hiya, “Ginsiring ako niya nga kinahanglan diri ako bumalik nganhi ha imo nga waray dara, sanglit iginhatag niya ha akon ini ngatanan nga sebada.”

¹⁸ Nagsiring ha iya hi Naomi, “Hulat la anay, Ruth, tubtob nga kumita ka kon ano an dadangatan hini. Diri mapahuway hi Boos ngada han katuhay hini nga butang yana nga adlaw.”