Pagnguyngoy 5 - Samarenyo Meaning-Based Bible (1984)

Nag-ampo nga Kalooyan

¹ Hinumdomi, O Ginoo, an nahinabo ha amon. Tan-awa kami, ngan kitaa an pagpakaalohi ha amon.

² Iginhatag ha mga lumalangyaw an amon mga hiagi. Mga lumalangyaw an nag-uokoy didto han amon mga tuna.

³ Pinanmatay han kaaway an amon mga amay; ngan yana mga balo na an amon mga iroy.

⁴ Kinahanglan pagbaydan namon an tubig nga amon iniinom. Kinahanglan paliton namon an kahoy nga amon isurungo.

⁵ Ginpataksan kami hin trabaho sugad hin mga asno o mga kamelyo. Kinakapoy kami, ngan waray namon pagpahuway.

⁶ Basi la kami mabuhi, namiling kami hin igo nga pagkaon, kinmadto kami hin pakilimos ha Ehipto ug Asiria.

⁷ Mga patay na an amon nakasala nga mga ginikanan, ngan nag-aantos kami tungod han ira mga sala.

⁸ Ginhahadian kami hin mga oripon, ngan waray makakatabang ha amon tikang han ira gahom.

⁹ Nagsusudoy ha kaumhan in mga magraogdaog. Diri kami murayaw hin pagmiling hin pagkaon.

¹⁰ Hinirantan kami tungod hin gutom, uraura hin kapaso han amon lawas sugad hin binangga nga hudno.

¹¹ Pinanlugos an amon mga asawa didto ha Bukid Sion. Ug an amon mga anak nga kababayen-an didto han mga bungto han Juda.

¹² Gindakop ngan ginbitay an amon mga pangulo; diri na tinatahod an amon mga tigurang.

¹³ Ginpugos hin pagdara han gilingan an amon mga batan-on nga kalalaken-an, hin pagpas-an han mabug-at nga kahoy an amon mga kabataan nga kalalaken-an.

¹⁴ Diri na nalingkod dida han ganghaan han syudad, an mga kalagasan. Ngan diri na nagtotokar an mga batan-on.

¹⁵ Binmaya na an kalipayan tikang han amon kinabuhi. Kabidoan an sinmaliwan han amon mga sarayaw.

¹⁶ Waray nahibilin han ngatanan nga amon ipinaparayaw. Nakasala kami, ngan makalolooy na kami yana.

¹⁷ Unob ha kasingkasing an kasakit namon, ngan haros diri kami makakita tungod han amon mga luha,

¹⁸ kay kamingawan na ngan nag-uusaan an Bukid Sion, ngan ihalas nga mga lubo an naglalakatlakat didto.

¹⁹ Kundi hadi ka ha kadayonan, O Ginoo, ngan maghahadi ka ha dayon nga mga katuigan.

²⁰ Kay ano nga ginpasibay-an mo kami hin maiha? Manunumdom ka pa ba ha amon?

²¹ Pabalika kami ha imo, O Ginoo! Pabalika kami! Igpahiuli an kadaan namon nga himaya.

²² O ginsalikway mo na ba kami ha kadayonan? Waray ba katubtoban an imo kasina?