Pagnguyngoy 4 - Samarenyo Meaning-Based Bible (1984)

Katapos han Pagkapukan han Jerusalem

¹ Nakuhaan na hin kainggat an aton bulawan; nagsasarang an mga bato han Templo dida han kakalsadahan.

² An batan-on nga kalalaken-an han Sion minahal naton sugad hin bulawan. Kundi yana sugad na la hira hin mga daba.

³ Bisan ngani an babayi nga lubo magpapasuso han iya mga nati. Kundi an akon mga tawo sugad hin mga duong nga makuha han iya mga piso.

⁴ Naghihimatay hin gutom ug uhaw an ira mga minasus-an. Nakikilimos an ira kabataan hin pagkaon, nga waray gud mahatag ha ira.

⁵ Nagkakamatay hin gutom dida han kadalanan an mga tawo nga nahiara hin magrasa nga mga pagkaon. Nangangabkab hin pagkaon dida han basurahan adton mga riko an kamutangan.

⁶ Ginkastigo an akon mga tawo hin labaw pa kay han mga umurokoy han Sodoma, nga tigda an kapukan dida han mga kamot han Dyos.

⁷ Maglinis ngan puraw sugad hin yelo an amon mga prinsipe, magtibaksi ngan magkusog, nga maglibsog an panlawas.

⁸ Yana diri hira kinikilala dida han kadalanan, nangingitom an ira mga bayhon kay aada ha ira an kamatayon. Maggasaay hira sugad hin mamara nga kahoy an ira panit.

⁹ Mauruupay pa adton mga nagkamatay didto han pag-awayan kay hadton mga hinayhinay an kamatay. Namatay hira tungod hin gutom kay waray man sadang makaon basi mabuhi la hira.

¹⁰ Nakapahadlok hin duro an kapukan nga inmabot han akon mga tawo. Ginlaga han mahigugmaon nga mga iroy an ira kalugaringon nga mga anak basi la hira makakaon.

¹¹ Ipinakita han Ginoo an makalilisang niya nga kapungot. Ginsunog ngan gin-ugtang gud niya an Sion.

¹² Waray bisan hin-o dinhe ha tuna, bisan pa ngani mga punoan hin langyaw nga mga nasod, nga tinmuo nga an mga kaaway makakasulod han mga ganghaan han Jerusalem.

¹³ Kundi nahinabo ini tungod han mga sala han mga manaragna ngan han pamatay han kapadian hin waray sala nga mga tawo.

¹⁴ Nagsudoy dida han kadalanan an iya mga pangulo sugad hin mga buta, ngan naluob hira hin dugo sanglit an mga tawo diri nakamkam ha ira.

¹⁵ “Pahirayo kamo!” naggogliat an mga tawo, “Mahugaw kamo! Ayaw pagkamkam ha akon!” Sanglit nagsudoy hira han kanasoran, ngan waray may nakarawat ha ira.

¹⁶ Waray na an Ginoo manginlabot ha ira; ginpasarang hira ha kanasoran. Waray na hiya maglagad han amon kapadian ngan mga pangulo.

¹⁷ Tinmakas kami hin pamiling hin tambulig ngan waray man namon hin-agian. Naghinulat kami hin bulig tikang hin nasod nga waray sadang paglaoman.

¹⁸ Ginbantayan kami han amon kaaway; makuri na ngani kami makalakat dida han kadalanan. Tapos na an amon mga adlaw; inmabot na an kataposan.

¹⁹ An nagbubukod ha amon maglarulaksi pa kay hin mga agila nga nasulinap tikang ha langit. Ginggamaan kami nira didto ha kapungtoran; kinalitan kami nira didto ha kamingawan.

²⁰ Hindakpan nira an burabod han amon kinabuhi, an hadi nga ginpili han Ginoo, an amon ginsarigan hin pagpanalipod ha amon ha amon mga kaaway.

²¹ Bisan kon maglipay ngan magrayhak kamo, mga tawo han Edom ug Uz. Maabot liwat an iyo pagkapukan diri kamo makakatoltol han dalan, mga hubo kamo ngan aada ha iyo an kaarawdan.

²² Ginbaydan na han Sion an iya sala; diri na ipapadayon han Ginoo an iyo pagkabihag. Kundi Edumea, pagkakastigohon ka han Ginoo; igpapadayag niya an imo mga kasal-anan.