Pagnguyngoy 2 - Samarenyo Meaning-Based Bible (1984)

Ginkastigo han Ginoo an Jerusalem

¹ Tungod han kasina han Ginoo, iya gintahoban hin kasisidman an Sion. Iya ginbungkag an langitnon nga kamatahom han syudad. Tungod han iya kasina ginpasibay-an niya bisan pa ngani an iya Templo.

² Ginbungkag han Ginoo hin waray kalooy an tagsa nga baryo didto ha Juda. Ngan ginpanas niya an magrig-on nga mga balwarte nga panalipod han tuna. Ginpakaalohan niya an ginhadian ngan an mga punoan hini.

³ Tungod han iya kapungot gin-utod niya an kusog han Israel. Waray hiya bumulig ha aton han pagdasmag han mga kaaway. An iya kangalas ha aton sugad hin kalayo nga nag-uugtang han ngatanan.

⁴ Sugad hin kaaway itinadong niya ha aton an iya mga pana. Ginpatay niya adton ngatanan nga aton kalipay ngan kaliawan. Dinhe ha Jerusalem aton inabat an iya nagngungotngot nga kasina.

⁵ Sugad hin kaaway ginbungkag han Ginoo an Israel. Ginruba niya an magrig-on nga mga balwarte ngan an mga palasyo hini. Pinapag-antos niya an mga tawo han Juda hin waray pagkatapos nga kabidoan.

⁶ Ginpukan niya an Templo nga ginsingbahan naton ha iya. Waray na niya ipadayon an pagsaurog han baraan nga mga adlaw ngan han mga Adlaw nga Iparahuway. Gindumtan niya an hadi ug padi.

⁷ Ginsalikway han Ginoo an iya altar ngan gintalikdan niya an iya baraan nga Templo. Ginparumpag niya han iya kaaway an mga pader han Templo. An mga kaaway naggogliat hira ha pagdarag-an diin hadto anay nagsingba kita nga malipayon.

⁸ Naglarang an Ginoo nga mapukan an mga pader han Sion. Ginsukol niya ini basi maubos karumpag an mga pader. Waray gud yana nahisalin han mga lantawan ngan mga pader.

⁹ Nahilubong ha tuna an mga ganghaan, nagkababari an mga trangka hini. Aadto na yana ha pagkabihag an hadi ngan an dumagko nga mga tawo. Waray na igtutdo an Balaod, ngan waray na mga panan-awon an mga manaragna.

¹⁰ Nalingkod hin hilom ha tuna an mga dumakon-on han Jerusalem. May tapotapo ha ira mga ulo ngan nagbado hin mga sako. Natamod ha tuna an kadaragan-an.

¹¹ Ruthay hin pagtinangis an akon mga mata; mabug-on an akon kasingkasing. Tugob na ako hin kabidoan tungod han pagkabungkag han akon mga tawo. Nahiraraptay an kabataan ngan mga minasus-an didto han kakalsadahan han syudad.

¹² Tungod hin kagutom ngan kauhaw, natawag hira han ira mga nanay. Nahiraraptay hira didto han kakalsadahan sugad hin mga samad nga kalalaken-an, ngan napatay hira hin hinayhinay dida han mga butkon han ira mga nanay.

¹³ O Jerusalem nga akon higugmaon, Jerusalem, ano an akon masisiring? Uunanhon ko hin pagliaw ha imo? Waray pa gud may nag-antos hin sugad han imo gin-antos. An imo karat-an hiluag hin duro sugad han kalalawdan; waray na gud sadang paglaoman.

¹⁴ Lunlon la mga buwa an iginhimangraw han imo mga manaragna. Ginlimbongan ka han ira pagwali kay waray ka pakakilala han imo sala. Ginpahunahuna ka nira nga diri ka kinahanglan magbasol.

¹⁵ Nagbibiaybiay ha imo an mga tawo nga nalabay han syudad. Nagpipilingpiling ngan nagtitinawa hira han mga nagkaruruba han Jerusalem: “Amo ba ini adto nga matahom nga syudad? Amo ba ini an ipinaparayaw han kalibutan?”

¹⁶ Gindudurugasan ka han ngatanan mo nga mga kaaway ngan pinamumudlatan ka upod hin pagdumot. Kinakagat nira an ira mga im-im ngan nanyayam-id ngan nagsusunlog, “Amon na ginbungkag hiya! Amo na ini an adlaw nga amon ginhinulat!”

¹⁷ Ginbuhat gihapon han Ginoo an iya igintarhog. Ginbungkag kita niya hin waray kalooy, sumala han iya iginpahimatngon ha aton hin maiha na. Iginhatag niya ha aton mga kaaway an pagdarag-an ngan pinapaglipay hira han aton pagkapukan.

¹⁸ O Jerusalem, pagoliata ngadto han Ginoo an imo mga pader! Paawasa an imo mga luha sugad hin mga salog adlaw gab-i; Ayaw pagpahuway ngan ayaw pag-undang hin pagtinangis!

¹⁹ Ha bug-os nga gab-i bangon hin makadamo ngan goliat ngadto han Ginoo. Isumat ha iya an imo mga pagbati, ngan pakimalooy ha iya tungod han imo kabataan— Kabataan nga haros mamatay hin gutom ha kada kanto han kalsada!

²⁰ Tan-awa, O Ginoo! Tan-awa adton imo mga ginpapaantos! Itutugot mo ba nga kaonon han mga iroy an ira mga anak pinalangga? Ipapapatay mo ba an mga padi ngan mga manaragna dida han imo Templo?

²¹ An mga batan-on ngan mga tigurang nanlulunay nga patay ha kakalsadahan, kaulitawhan ngan kadaragan-an nga pinanmatay han mga espada han kaaway. Ginpatay mo hira hin waray kalooy tungod han imo kasina.

²² Gindapit mo an akon mga kaaway basi magrisyo hira hin mga kahadlok palibot ha akon. Ngan waray gud makakapalagiw dida hito nga adlaw han kasina han Ginoo. Ginpamatay nira an akon kabataan nga akon ginmangnoan ngan ginhigugma.