Oseas 9 - Samarenyo Meaning-Based Bible (1984)

Nagpahibaro hi Oseas nga Kakastigohon an Israel

¹ Katawhan han Israel, ayaw na kamo pagsaurog han iyo mga pyesta sugad han mga pagano. Binayaan niyo an iyo Dyos ngan waray kamo magmatinumanon ha iya. Ha bisan diin nga dapit han tuna iginbaligya niyo an iyo kalugaringon sugad hin kababayen-an nga magraot an dungog ngadto han diyos nga hi Baal, ngan ginhigugma niyo an pagkaon nga iyo ginhuhunahuna nga iya iginbayad ha iyo!

² Kundi diri maiha mawawaray kamo igo nga pagkaon ug lana hin olibo ngan mawawaray na bino.

³ Diri magpapabilin an katawhan han Israel dida han tuna han Ginoo, kundi mabalik hira ngadto ha Ehipto ngan makaon hira hin igindidiri nga pagkaon didto ha Asiria.

⁴ Didto hito nga langyaw nga tuna diri hira makakaghalad ngadto han Ginoo hin mga halad nga bino o makakagdara ngadto ha iya han ira mga halad nga tinubod. Makakahugaw an ira pagkaon han ngatanan nga makaon hini, sugad hin pagkaon nga gindudurot kon nagtataguminatay. Gagamiton la ini nga pagkaon hin pagbusog han ira kagutom; waray hini pagdadad-on nga halad ngadto han Templo han Ginoo.

⁵ Ngan kon umabot na an panahon han igintalaan nga mga pyesta ha pagpasidungog han Ginoo, ano man an ira pagbubuhaton?

⁶ Kon umabot na an karat-an ngan magsarang an katawhan, pagtitirokon hira han mga Ehiptohanon—pagtitirokon basi iglubong didto ha Memfis! Tatahoban hin kabanwaan ngan tunokon nga mga tanaman an ira mga manggad nga salapi ngan an mga dapit nga hadto anay hinmutangan han ira mga urokyan.

⁷ Inmabot na an panahon hin pagkastigo, an panahon diin makarawat an katawhan han angay ha ira. Kon mahinabo na ito, mahibabaroan ini han Israel! Masiring kamo, “Lurong ini nga manaragna. Buangbuang ini nga madasigon nga tawo.” Napupungot kamo ha akon, kamo nga katawhan, kay dako man an iyo sala.

⁸ Ginsugo ako han Dyos usa nga manaragna hin pagpahimatngon han Israel. Kundi bisan ngain ako kakadto nagtitinguha kamo hin pagbitik ha akon sugad hin tamsi. Didto han kalugaringon nga tuna han Dyos, an mga tawo amo an mga kaaway han manaragna.

⁹ Magraot gud an ira mga binubuhat, sugad han didto pa hira ha Gabaa. Hinunumdoman han Dyos an ira sala ngan kakastigohon hira tungod hini.

Nakasala an Israel ngan Kakastigohon Hira

¹⁰ Nasiring an Ginoo, “Han syahan nga paghiagii ko han Israel, sugad ini hin pakaagi hin mga ubas nga naturok didto han kamingawan. Han syahan nga paghikit-i ko han iyo kaapoy-apoyan, sugad ini hin pakakita han syahan nga hinog nga mga igos. Kundi han ira pag-abot ngadto ha Bukid Peor, nagtikang hira pagsingba kan Baal, ngan makapupungot gud hira sugad han kadiyosan nga ira ginhigugma.

¹¹ Malupad sugad hin tamsi an pagkagamhanan han Israel ngan waray na mga anak nga matatawo ha ira, waray na magbuburod nga kababayen-an, waray na igpapanamkon nga kabataan.

¹² Kundi bisan pa hira mag-anak, pupuohon ko hira ngan waray ko isasalin nga buhi. Kon bayaan ko ini nga katawhan, makalilisang an mahinanabo ha ira.”

¹³ Ginoo, hinkikit-an ko nga dinadakop ngan pinapatay an ira mga anak.

¹⁴ Ano an akon hahangyoon nga pagbuhaton mo hini nga katawhan? Himoa nga mabaw-as an ira kababayen-an! Himoa nga diri na hira makagpasuso han ira mga minasus-an!

Ginhukman han Dyos an Israel

¹⁵ Nasiring an Ginoo, “Nagtikang didto ha Gilgal an ngatanan nira nga magraot nga mga buhat. Didto pagtikang an akon pagdumot ha ira. Ngan tungod han magraot nga ira ginbuhat, paiiwason ko hira tikang han akon tuna. Diri na gud ako mahigugma ha ira; sinmupil ha akon an ngatanan nira nga mga pangulo.

¹⁶ An katawhan han Israel sugad hin tanom nga nagkauuga an mga gamot ngan diri nabunga. Diri na hira mag-aanak, kundi bisan pa hira mag-anak, papatayon ko an mga anak nga ira mga pinaura.”

Naghimangraw an Manaragna Mahitungod han Israel

¹⁷ An Dyos nga akon gin-aalagad magsasalikway han ira katawhan, kay waray hira mamati ha iya. Magsisinudoysudoy hira dida han mga nasod.