Oseas 8 - Samarenyo Meaning-Based Bible (1984)

Ginhukman ha Karat-an han Ginoo an Israel

¹ Nasiring an Ginoo, “Patungga an pahimatngon! An mga kaaway nanhuhugdon ha akon tuna sugad hin mga agila! Ginsupak han akon katawhan an ginsaaran nga akon ginhimo ha ira, ngan sinmupil hira han akon pagturon-an.

² Bisan kon tinatawag ako nira nga ira Dyos ngan nasiring nga akon hira katawhan ngan nakilala hira ha akon,

³ ginsalikway nira an maupay. Tungod hini pagbubukoron hira han ira mga kaaway.

⁴ “Nagpili hin mga hadi an akon katawhan, kundi ginbuhat nira ini ha ira la kalugaringon. Nagtudlok hira hin mga pangulo, kundi waray ako hini pahibaroa nira. Ginkuha nira an ira salapi ug bulawan ngan naghimo hira hin mga diyosdiyos para han ira kalugaringon nga pagkapukan.

⁵ Napupungot ako han bulawan nga baka nga ginsingba han katawhan han syudad han Samaria. Napupungot gud ako ha ira. San-o pa hira babaya hin pagsingba hin mga diyosdiyos?

⁶ Ginhimo hin panday nga Israelita an diyosdiyos, ngan diri gud ini diyos! Pagdudugmokon an bulawan nga baka nga ginsingba didto ha Samaria!

⁷ Kon magpugas hira hin hangin, mag-aani hira hin bagyo. An aranihon nga diri nahihinog diri gud makakahimo hin tinapay. Kundi bisan kon makahimo ini, kakaonon ini hin mga lumalangyaw.

⁸ Nagin sugad la an Israel hin iba nga nasod, ngan waray la gamit sugad hin buong nga daba.

⁹ Sugad hin ihalas nga asno kamatig-a an ulo, nagpasagad la an katawhan han Israel han ira kalugaringon nga paagi. Kinmadto hira ha Asiria hin pakibulig ngan nagsuhol hira hin iba nga mga nasod hin pagpanalipod ha ira.

¹⁰ Kundi yana pagtitirokon ngan pagkakastigohon ko hira. Diri maiha maglulubag hira tungod hin kamaul-ol kon pagtalumpigoson na hira han emperador han Asiria.

¹¹ “Kon damo an mga altar nga gintitindog han katawhan han Israel hin pagkuha hin sala, damo man an ira mga dapit hin pagpakasala!

¹² Ginsusurat ko in diri maiihap nga mga pagturon-an para han katawhan, kundi sinasalikway nira ini kay malain daw para ha ira.

¹³ Naghahalad hira ha akon hin mga hayop nga tinubod ngan kinakaon nira an karne han mga halad. Kundi ako an Ginoo nga diri nalilipay ha ira, ngan yana hinunumdoman ko an ira mga sala ngan kakastigohon ko hira tungod hini; pababalikon ko hira ngadto ha Ehipto!

¹⁴ “Nagtindog hin mga palasyo an katawhan han Israel, kundi nahingalimtan nira an ira kalugaringon nga Magburuhat. Nagtindog hin pinarig-on nga mga syudad an katawhan han Juda. Kundi magpapadara ako hin kalayo nga magsusunog han ira mga palasyo ngan han ira mga syudad.”