Oseas 5 - Samarenyo Meaning-Based Bible (1984)

¹ “Pamati hini, kamo nga kapadian! Pamati, katawhan han Israel! Pamati, kamo nga mga sakop han panimalay nga hadianon! Angay unta kamo maghukom hin matadong—sanglit paghuhukman kamo! Nahimo kamo nga bitik didto ha Mispa, usa nga pukot nga ginbitad didto ha Bukid Tabor,

² usa nga hilarom nga luong didto ha Syudad han Akasya, ngan kakastigohon ko kamo ngatanan.

³ Sayod ako han Israel—diri hiya makakatago ha akon. Naglingo hiya ha akon ngan diri angay an iya katawhan hin pagsingba ha akon.”

Nagpahimatngon hi Oseas Kontra han Pagsingba hin mga Diyosdiyos

⁴ An karat-an nga ginbuhat han katawhan amo an nagpupugong han ira pagbalik ngadto han ira Dyos. Makuri na hira makabul-iw han pagsingba hin mga diyosdiyos ngan diri nira kinikilala an Ginoo.

⁵ An kamapahitas-on han katawhan han Israel nasinggit kontra ha ira. Nakakapapakdol ngan nakakapatumba ha ira an ira mga sala, ngan natutumba upod ha ira an katawhan han Juda.

⁶ Gindadara nira an ira mga karnero ngan mga baka ha paghalad nira ngadto han Ginoo sugad nga mga halad nga tinubod, kundi diri ini nakakaupay ha ira. Diri hira makakaagi ha iya kay iya binayaan hira.

⁷ Ginlingo nira an Ginoo; diri sakop niya an ira mga anak. Sanglit yana ha diri maiha pagpupukanon hira ngan an ira mga tuna.

Nag-away an Juda ug Israel

⁸ Patungga an mga trompeta didto ha Gabaa! Patungga an mga budyong hin pagpahimatngon didto ha Rama! Igoliat an pakig-away didto ha Betaben! Ngadto ha pag-awayan, mga tawo han Benjamin!

⁹ Maabot na an adlaw hin pagkastigo ngan mapupukan an Israel. Katawhan han Israel, mahinanabo gud ini!

¹⁰ Nasiring an Ginoo, “Nasisina ako kay ginsulong han mga pangulo han Juda an Israel ngan gintikas an iya tuna. Sanglit ihuhuwad ko ha ira in kastigo sugad hin baha.

¹¹ Nag-aantos hin pagraogdaoga an Israel; nawad-an hiya han iya kalugaringon nga tuna kay nagpirit hiya hin pangaro hin bulig tikang hadton waray sadang mahatag nga bulig.

¹² Pupukanon ko an Israel ngan pupuohon ko an katawhan han Juda.

¹³ “Han pakakita han Israel nga masakiton na hiya ngan han pakakita han Juda han iya kalugaringon nga mga kasamdan, kinmadto ha Asiria an Israel pangaro hin bulig han gamhanan nga emperador, kundi waray an emperador makatambal ha ira o makaupay han ira mga kasamdan.

¹⁴ Susulongon ko sugad hin liyon an katawhan han Israel ug Juda. Ako ngahaw an magpipikaspikas ha ira ngan katapos babayaan ko hira. Kon danason ko hira, waray gud makakatalwas ha ira.

¹⁵ “Pababay-an ko an akon katawhan ngada han pag-antos nira hin igo tungod han ira mga sala, ngan ngada han ira pagkanhi hin pamiling ha akon. Bangin dida han ira pag-antos magtalinguha hira hin pagbiling ha akon.”