Oseas 14 - Samarenyo Meaning-Based Bible (1984)

Ginhangyo ni Oseas an Israel

¹ Balik ngadto han Ginoo nga iyo Dyos, mga tawo han Israel. An iyo sala amo an nakapahipakdol ngan nakapatumba ha iyo.

² Balik ngadto han Ginoo ngan ighalad niyo ha iya ini nga pag-ampo: “Pasayloa kami han ngatanan nga amon mga sala ngan karawta an amon pag-ampo, ngan pagdadayawon ka namon sumala han amon iginsaad.

³ Diri gud makakatalwas ha amon an Asiria ngan diri makakapanalipod ha amon an mga kabayo hin pakig-away. Diri na gud kami masiring han amon mga diyosdiyos nga amon hira Dyos. O Ginoo, ipakita an imo kalooy hadton waray na gud iba nga sadang kadangpan.”

Nagsaad an Ginoo hin Bag-o nga Kinabuhi para han Israel

⁴ Nasiring an Ginoo, “Pababalikon ko ngadi ha akon an akon mga tawo. Hihigugmaon ko hira hin kinasingkasing; diri na ako masisina ha ira.

⁵ Para han mga tawo han Israel masusugad ako hin uran dida hin mamara nga tuna. Manmumuswak hira sugad hin mga bukad; manggagamot hira hin marig-on sugad han kakahoyan han Libano.

⁶ Mabubuhi hira hin bag-o nga pagtubo, ngan magmamatahom sugad hin mga kahoy nga olibo. Magmamahamot hira sugad han mga sidro han Libano.

⁷ Mag-uokoy na liwat hira ha ubos han akon pagpanalipod. Magtatanom hira ha ira mga uma, ngan magmamabungaon sugad hin urubasan. Masusugad hira kabantogan han bino han Libano.

⁸ Diri na manginginlabot hin mga diyosdiyos an mga tawo han Israel, babatonon ko an ira mga pag-ampo ngan mamangnoan ko hira. Sugad hin marampag nga kahoy pasisirongon ko hira; amo ako an burabod han ngatanan nira nga mga kaupayan.”

Pangataposan

⁹ Masayod unta adton mga makinaadmananon han iginsurat dinhe ngan matugkad unta nira ini. Magtadong an mga paagi han Ginoo ngan nabubuhi an magtadong nga mga tawo pinaagi hin pagsunod hini, kundi mahipapakdol ngan matutumba an mga makasasala kay ginpapasibay-an ini nira.