Oseas 11 - Samarenyo Meaning-Based Bible (1984)

Nahigugma an Dyos han Iya Masinupilon nga Katawhan

¹ Nasiring an Ginoo, “Han bata pa an Israel ginhigugma ko hiya, ngan gintawag ko hiya tikang ha Ehipto nga akon anak.

² Kundi ha ikinapagtawag ko ha iya, napahirayo lugod hiya tikang ha akon. Naghalad hin hayop nga tinubod ngadto kan Baal an akon katawhan. Nagtubod hira hin insyenso ngadto hin mga diyosdiyos.

³ Kundi ako amo an nagtutdo han Israel hin paglakat. Ginkugos ko an akon katawhan, kundi waray hira magmatuod nga ako an nagmangno ha ira.

⁴ Ginpaawil ko hira pinaagi hin pagpalangga ug paghigugma. Ginpurot ngan ginkugos ko hira suok han akon bayhon; inmubo ako hin pagpakaon ha ira.

⁵ “Nadiri hira pagbalik ha akon, sanglit kinahanglan bumalik hira ngadto ha Ehipto, ngan paghahadian hira han Asiria.

⁶ Maluluob hin araway an ira mga syudad ngan babarion an mga trangka han mga ganghaan han syudad. Pupukanon an akon katawhan kay nagbuhat hira nga ha ira hunahuna amo an gimamaupayi.

⁷ Nagdig-on hira hin pagbaya ha akon. Magoliat hira tungod han yugo nga aada ha ira, kundi waray maghuhukas hini tikang ha ira.

⁸ “Uunanhon ko hin pagpasibaya ha imo, Israel? Uunanhon ko hin pakabaya ha imo? Makakahimo ba ako hin pagpuo ha imo sugad han akon pagpuoha han Adma, o pagdumara ha imo sugad han akon pagdumara han Zeboim? Diri matugot hini an akon kasingkasing! Mapaso gud an akon paghigugma ha imo.

⁹ Diri ko ikaw kakastigohon ha akon kasina; diri ko na pagbubungkagon an Israel. Kay Dyos ako ngan diri tawo. Aada ha imo ako nga Baraan. Diri ako makada nga nasisina ha imo.

¹⁰ “Masunod ha akon an akon katawhan kon magngurob ako sugad hin liyon han ira mga kaaway. Magdadagmit hira ngadi ha akon tikang ha katundan.

¹¹ Maabot hira tikang ha Ehipto kalaksi sugad hin mga tamsi, ngan tikang ha Asiria sugad hin mga sarapati. Ibabalik ko na liwat hira ngadto han ira mga puroy-anan. Ako nga Ginoo an nagyakan.”

Ginhukman ha Karat-an an Israel ug Juda

¹² Nasiring an Ginoo, “Ginpalibotan ako han katawhan han Israel hin mga buwa ngan mga limbong, ngan an katawhan han Juda nasupil pa gihapon ha akon, an matinumanon nga baraan nga Dyos.