Numero 4 - Samarenyo Meaning-Based Bible (1984)

Iginhatag an mga Katungdanan han Banay ni Coat

¹ Ginsiring han Ginoo hira Moises ug Aaron

² nga pag-ihapon an Levita nga banay ni Coat pinaagi hin gurugudti nga mga banay ngan pinaagi hin mga panimalay,

³ ngan iglista an ngatanan nga kalalaken-an nga 30 ngadto ha 50 an panuigon nga angay magtrabaho didto han Tulda han Ginoo.

⁴ Nasasakop han ira pag-alagad an labi ka baraan nga mga butang.

⁵ Iginhatag han Ginoo kan Moises an masunod nga mga tugon. Kon panahon na hin pagbalhin hin kampo, masulod han Tulda hi Aaron ngan an iya mga anak nga kalalaken-an, papaloson nira an biray ha atubangan han Kahon han Ginsaaran, ngan tatahoban hini an Kahon.

⁶ Babawbawan nira ini hin tahob nga anit nga pino, tatahoban hin dugnit nga puros asul, ngan niyan igsusul-ot an mga parasgan.

⁷ Tatahoban nira hin dugnit nga asul an lamesa para han tinapay nga iginhalad ha Ginoo ngan igbubutang dida hini an mga plato, an mga surudlan hin insyenso, an mga surudlan hin halad, ngan an mga tibod para hin halad nga bino. Kinahanglan dayuday may tinapay dida han lamesa.

⁸ Tatahoban nira hin pula nga dugnit ini ngatanan, babawbawan ini hin tahob nga anit nga pino ngan niyan igsusul-ot an mga parasgan.

⁹ Makuha hira hin asul nga dugnit ngan tatahoban an kandilero upod an mga lampara hini, mga kimpit, mga karaha, ngan an ngatanan nga mga surudlan hin lana hin olibo.

¹⁰ Puputson nira ini ngan an ngatanan nga kasangkapan hini dida hin tahob nga anit nga pino ngan igbubutang ini dida hin ginpapasag nga papag.

¹¹ Sunod tatahoban nira hin dugnit nga asul an altar nga bulawan, babawbawan ini hin tahob nga anit nga pino, ngan niyan igsusul-ot an mga parasgan.

¹² Kukuhaon nira an ngatanan nga mga garamiton nga ginagamit didto han Baraan nga Dapit, puputson ini hin dugnit nga asul, babawbawan ini hin tahob nga anit nga pino, ngan igbubutang ini dida hin ginpapasag nga papag.

¹³ Kukuhaon nira an agiw tikang han altar ngan tatahoban ini hin dugnit nga mapulapula.

¹⁴ Ibubutang nira dida hini an ngatanan nga mga kasangkapan nga ginagamit ha pag-alagad didto han altar: mga karaha, mga iturugsok, mga pala, ngan mga palanggana. Niyan babawbawan ini nira hin tahob nga anit nga pino ngan igsusul-ot an mga parasgan.

¹⁵ Kon panahon na hin pagbalhin hin kampo, makada an banay ni Coat hin pagdara han mga butang nga baraan dida la kon tapos na ni Aaron ngan han iya mga anak nga kalalaken-an pagtahobi ini ngan an ngatanan nga mga kasangkapan hini. Kinahanglan diri pagkaptan han banay ni Coat an mga butang nga baraan kay bangin hira mamatay. Amo ini an mga katungdanan han banay ni Coat ha kada pagbabalhina han Tulda.

¹⁶ Katungdanan ni Eleazar nga anak ni Aaron an panimangno han bug-os nga Tulda ngan han lana para han mga lampara, an insyenso, an mga halad nga pagkaon, an lana nga igdirihog, ngan an iba pa nga mga butang didto ha sulod han Tulda nga iginhalad ngadto ha Ginoo.

¹⁷ Nagsiring an Ginoo kanda Moises ug Aaron,

^18-19 “Ayaw niyo pagtugoti nga mamatay an banay ni Coat pinaagi hin paghirani hini nga labi ka baraan nga mga butang. Basi diri mahinabo ini, masulod hira Aaron ngan an iya mga anak nga kalalaken-an ngan tatagan an kada tawo han iya buruhaton ngan susumatan hiya kon ano an iya pagdadad-on.

²⁰ Kundi kon sumulod han Tulda an mga sakop ni Coat ngan kumita han kapadian nga nag-aandam han mga butang nga baraan para hin pagbalhin, magkakamatay hira.”

Iginhatag an mga Katungdanan han Banay ni Gerson

²¹ Ginsiring han Ginoo hi Moises

²² nga pag-ihapon an Levita nga banay ni Gerson pinaagi hin gurugudti nga mga banay ngan pinaagi hin mga panimalay,

²³ ngan iglista an ngatanan nga kalalaken-an nga 30 ngadto ha 50 an panuigon nga angay magtrabaho didto han Tulda han Ginoo.

²⁴ Katungdanan nira an pagdara han masunod nga mga butang:

²⁵ an Tulda, an mga tahob ha sakob ngan ha gawas hini, an tahob nga anit nga pino ha bawbaw hini, an biray para han agian,

²⁶ an mga biray ngan mga pisi para han bungsaran palibot han Tulda ngan han altar, an mga biray para han agian han bungsaran, ngan an ngatanan nga mga garamiton nga ginagamit hin pagpahimutang hini nga mga butang. Tutumanon nira an ngatanan nga mga buruhaton nga ginkikinahanglan para hini nga mga butang.

²⁷ Kikitaon gud nira Moises ug Aaron nga pagtutumanon han mga sakop ni Gerson an ngatanan nga mga katungdanan ngan pagdadad-on nira an ngatanan nga pinapagdara ha ira nira Aaron ngan han iya mga anak.

²⁸ Amo ini an mga katungdanan han banay ni Gerson didto han Tulda; bubuhaton ini nira ha ubos han pagmando ni Itamar nga anak ni Aaron nga padi.

Iginhatag an mga Katungdanan han Banay ni Merari

²⁹ Ginsiring han Ginoo hi Moises nga pag-ihapon an Levita nga banay ni Merari pinaagi hin gurugudti nga mga banay ngan pinaagi hin mga panimalay,

³⁰ ngan iglista an ngatanan nga mga kalalaken-an tikang ha 30 ngadto ha 50 an panuigon nga angay magtrabaho didto han Tulda han Ginoo.

³¹ Katungdanan nira an pagdara han mga balayan, mga trangka, mga harigi, ngan mga tungtongan han Tulda,

³² ngan han mga harigi, mga tungtongan, mga usok, ngan mga pisi han bungsaran palibot han Tulda, upod an ngatanan nga mga garamiton nga ginagamit hin pagpahimutang hini. Katungdanan han kada tawo an pagdara han mga butang nga igintudlok ha iya.

³³ Amo ini an mga katungdanan han banay ni Merari ha ira pag-alagad didto han Tulda; bubuhaton ini nira ha ubos han pagmando ni Itamar nga anak ni Aaron nga Padi.

Gin-ihap an mga Levita

^34-48 Ha pagsunod han sugo han Ginoo, gin-ihap nira Moises, Aaron, ngan mga pangulo han bungto, an tulo nga mga banay nga Levita nira Coat, Gerson, ug Merari. Ginbuhat nira ini pinaagi hin gurugudti nga mga banay ngan pinaagi hin mga panimalay, ngan iginlista nira an ngatanan nga kalalaken-an nga 30 ngadto ha 50 an panuigon nga angay magtrabaho didto han Tulda han Ginoo, sumala han masunod: Hugpo hin mga Panimalay Kadamo Coat 2,750 Gerson 2,630 Merari 3,200 Total: 8,580

Hugpo hin mga Panimalay Kadamo

⁴⁹ Iginlista an kada tawo sumala han iginsugo han Ginoo kan Moises; ngan ha pagsugo han Ginoo pinaagi kan Moises, gintagan an kada tawo han iya buruhaton hin pag-alagad o pagdara.