Numero 34 - Samarenyo Meaning-Based Bible (1984)

Bubutangan hin mga Pag-ultan an Tuna

¹ Iginhatag han Ginoo kan Moises

² an masunod nga mga tugon para han mga tawo han Israel: “Kon sumulod na kamo han Canaan nga tuna nga ihinahatag ko ha iyo, an mga pag-ultan han iyo katunaan amo inin masunod:

³ an timogan nga pag-ultan matikang ha kamingawan han Zin ngan magliligid han pag-ultan han Edumea. Matikang ini ha sinirangan didto han timogan nga kataposan han Dagat Patay.

⁴ Niyan maliko ini tipatimogan ngadto ha Aragian han Acrabim, ngan magpapadayon paglatas han Sin tubtob ha Cades Barnea didto ha timogan. Niyan maliko ini tipaamihan-katundan ngadto ha Adar ngan ngadto ha Asemona,

⁵ diin maliko ini tipakadto ha kahamub-an didto han pag-ultan han Ehipto, ngan matatapos didto han Dagat Mediteraneo.

⁶ “An katundan nga pag-ultan amo an Dagat Mediteraneo.

⁷ “An amihan nga pag-ultan matadong tikang ha Dagat Mediteraneo ngadto han Bukid Hor,

⁸ ngan tikang didto ngadto han Agianan han Hamat. Magpapadayon ini ngadto ha Sedad,

⁹ ngan ngadto ha Seprona, ngan matatapos ini didto ha Enan.

¹⁰ “An sinirangan nga pag-ultan matadong tikang ha Enan ngadto ha Sefama.

¹¹ Niyan magtitipatimogan ini ngadto ha Ribla, ha sinirangan han Ain, ngan magpapadayon ngadto han kapungtoran didto ha sinirangan nga baybayon han Lanaw Galilea,

¹² ngan tipatimogan ubay han Salog Jordan ngadto han Dagat Patay. “Amo ini an upat nga mga pag-ultan han iyo katunaan.”

¹³ Sanglit nagsiring hi Moises ha mga Israelita, “Amo ini an tuna nga kakarawaton niyo pinaagi hin ripa, an tuna nga iginhatag han Ginoo ngadto han siyam ngan hin tunga nga mga tribo.

¹⁴ Kinmarawat na han ira malon an mga tribo nira Ruben ug Gad ngan an sinirangan nga katunga han Manases, nga ginbahinbahin sumala han ira mga panimalay,

¹⁵ didto ha sinirangan han Jordan nga tugbang han Jerico.”

Nagpili hin mga Pangulo para hin Pagbahinbahin han Tuna

¹⁶ Nagsiring kan Moises an Ginoo,

¹⁷ “Hira Eleazar nga padi ug Josue nga anak ni Nun amo an magbabahinbahin han tuna para han mga tawo.

¹⁸ Kuha liwat hin usa nga pangulo tikang han kada tribo nga mabulig ha ira hin pagbahinbahin hini.”

^19-28 Amo ini an mga tawo nga ginpili han Ginoo: Tribo Pangulo Juda Hi Caleb nga anak ni Jefone Simeon Hi Selumiel nga anak ni Amiud Benjamin Hi Elidad nga anak ni Caleson Dan Hi Boci nga anak ni Jogli Manases Hi Haniel nga anak ni Efod Efraim Hi Kemuel nga anak ni Seftan Zabulon Hi Elisafan nga anak ni Farnac Isacar Hi Paltiel nga anak ni Asan Aser Hi Ahiud nga anak ni Selomi Neftali Hi Fedel nga anak ni Amiud

Tribo Pangulo

²⁹ Amo ini an mga tawo nga gintudlok han Ginoo hin pagbahinbahin han malon para han mga tawo han Israel didto ha tuna han Canaan.