Numero 33 - Samarenyo Meaning-Based Bible (1984)

Naglakaton tikang ha Ehipto ngadto ha Moab

¹ An masunod nga kasaysayan naghahatag han mga ngaran han mga dapit nga ginkampohan han mga Israelita han pagbaya nira han Ehipto pinaagi han ira mga tribo ha ubos han pagpangulo nira Moises ug Aaron.

² Ha pagsugo han Ginoo, ginsurat ni Moises an ngaran han dapit ha kada pagkakampo nira.

³ Binmaya han Ehipto an mga tawo han Israel dida han ika-15 nga adlaw han syahan nga bulan han tuig, an adlaw nga sunod han syahan nga Paglabay. Ha ubos han pagpanalipod han Ginoo binayaan nira an syudad han Ramses nga hinkikit-an hira han mga Ehiptohanon

⁴ nga naglulubong han ira mga suhag nga kalalaken-an nga pinanmatay han Ginoo. Pinaagi hini iginpakita han Ginoo nga mas gamhanan hiya kay han kadiyosan han Ehipto.

⁵ Binayaan han mga tawo han Israel an Ramses ngan nagkampo hira didto ha Sucot.

⁶ Didto ha Etam ha ligid han kamingawan an sunod nira nga kampo.

⁷ Tikang didto binmalik hira ngadto ha Pihahirot nga sinirangan han Baalsipon, ngan nagkampo hira hirani han Migdol.

⁸ Binayaan nira an Pihahirot ngan naglatas hira han Dagat Pula ngadto han kamingawan han Sur; katapos hin tulo ka adlaw nga pagbinaktas, nagkampo hira didto ha Mara.

⁹ Tikang didto kinmadto hira ha Elim diin nagkampo hira, kay may 12 nga mga burabod hin tubig ngan 70 nga mga kahoy nga palmira didto.

¹⁰ Binayaan nira an Elim ngan nagkampo hira hirani han Dagat Suez.

¹¹ Didto han kamingawan han Sin an sunod nira nga kampo.

¹² Sunod nagkampo hira didto ha Dalfa,

¹³ ngan katapos, didto ha Alus.

¹⁴ An sunod didto ha Rafidim, diin waray nira irimnon nga tubig.

^15-37 Tikang ha Rafidim ngadto ha Bukid Hor nagkampo hira didto han masunod nga mga dapit; ha Kamingawan han Sinai, Kibrotataaba (o “Mga Lubnganan hin Pag-ungara”), Haserot, Retma, Rimonfares, Libna, Resa, Celata, Bukid Sefer, Arada, Macelot, Taat, Tare, Metca, Hermona, Moserot, Benejaacon, Gadgad, Jotebata, Hebrona, Asiongaber, ha kamingawan han Zin (nga amo an Cades), ug Bukid Hor didto ha ligid han tuna han Edumea.

^38-39 Ha pagsugo han Ginoo sinmagka han Bukid Hor hi Aaron nga padi. Namatay hiya didto ha panuigon nga 123, dida han syahan nga adlaw han ikalima nga bulan han ika-40 ka tuig tikang bumaya han Ehipto an mga Israelita.

⁴⁰ Hinbatian han hadi han Arad didto ha timogan han Canaan nga tiarabot an mga Israelita.

^41-49 Tikang ha Bukid Hor ngadto ha kapatagan han Moab nagkampo an mga Israelita didto han masunod nga mga dapit: Salmona, Funon, Obot, han mga ginruba nga Abarim didto ha katunaan han Moab, Dibongad, Halmondeblataim, ha kabukiran han Abarim hirani han Bukid Nebo, ngan didto ha kapatagan han Moab nga tabok han Salog Jordan atbang han Jerico, ha butnga han Betsimot, ug ha Kahamub-an han Akaya.

Gintugon san-o Tumabok han Jordan

⁵⁰ Iginhatag han Ginoo kan Moises didto ha kapatagan han Moab, nga tabok han Jordan atbang han Jerico,

⁵¹ an masunod nga mga tugon para han Israel: “Kon tumabok na kamo han Jordan ngadto ha tuna han Canaan,

⁵² kinahanglan paiwason niyo an ngatanan nga mga umurukoy han tuna. Pagbungkaga niyo an ngatanan nira nga bato ug metal nga mga diyosdiyos ngan an ngatanan nira nga mga dapit hin pagsingba.

⁵³ Pagtag-iyaha niyo an tuna ngan pag-ukoy kamo didto, kay ihinahatag ko ini ha iyo.

⁵⁴ Pagbahinbahina niyo an tuna ngadto han magkalainlain nga mga tribo ngan mga banay pinaagi hin ripa. Tagi hin haluag nga malon in dako nga banay, ngan hin haligot nga malon in gutiay nga banay.

⁵⁵ Kundi kon diri niyo paiwason an mga umurukoy han tuna, adton mga nanhibilin magsisinamok ha iyo sugad hin mga puling ha iyo mga mata ngan mga tunok ha iyo mga kagiliran, ngan makikig-away hira kontra ha iyo.

⁵⁶ Kon diri niyo hira paiwason, pagpupuohon ko kamo sugad nga ako naglarang hin pagpuo ha ira.”