Numero 30 - Samarenyo Meaning-Based Bible (1984)

Iginhatag in mga Turumanon Hiunong hin mga Pagsaad

¹ Iginhatag ni Moises an masunod nga mga tugon ngadto han mga pangulo han mga tribo han Israel.

² Kon magsaad ha Ginoo in usa ka tawo, ngan ginsumpaan ini niya, kinahanglan pagtumanon niya an iya saad, ngan talinguhaon niya hin pagbuhat han ngatanan nga iya iginsiring.

³ Kon magsaad ha Ginoo in usa nga batan-on nga babaye nga nalungon pa ha balay han iya amay, ngan iya ini pagsumpaan, sa diri hin,

⁴ kinahanglan pagbuhaton niya an ngatanan nga saad nga iya ginsumpaan, gawas kon ha paghibaroi han iya saad, rumiwa an iya amay.

⁵ Kundi kon pagdid-an hiya han iya amay hin pagtuman han sumpa, ha paghibaro niya hini, diri kinahanglan nga magtuman hiya hini. Pasasayloon hiya han Ginoo kay gindid-an man hiya han iya amay.

⁶ Kon pumaasawa in usa nga babaye samtang may-ada niya panaad nga iya ginsumpaan ngadto han Ginoo, magin tinuyo ini o dinalidalian la,

⁷ kinahanglan pagtumanon niya an ngatanan nga iya saad nga ginsumpaan, gawas kon ha paghibaroi han iya saad, rumiwa an iya bana.

⁸ Kundi kon pagdid-an hiya han iya bana hin pagtuman han sumpa, diri kinahanglan nga magtuman hiya hini. Pasasayloon hiya han Ginoo.

⁹ Kinahanglan pagtumanon hin usa nga balo nga babaye o hin usa nga babaye nga binulagan hin bana, an tagsa nga saad nga iya ginsumpaan.

¹⁰ Kon in usa nga inasaw-an nga babaye may-ada saad ngadto han Ginoo ngan iya ini ginsumpaan,

¹¹ kinahanglan pagbuhaton niya an ngatanan nga saad nga iya ginsumpaan, gawas kon ha paghibaroi han iya saad, rumiwa an iya bana.

¹² Kundi kon pagdid-an hiya han iya bana hin pagtuman han sumpa, diri kinahanglan nga magtuman hiya hini. Pasasayloon hiya han Ginoo, kay ginpugngan man hiya han iya bana hin pagtuman han iya ginsumpaan nga saad.

¹³ May katungod an iya bana hin pagparig-on o pagsikway hin bisan ano nga sumpa o saad nga ginhimo han iya asawa.

¹⁴ Kundi kon waray hiya rumiwa dida han adlaw han paghibaro niya han sumpa, kinahanglan pagbuhaton han iya asawa an ngatanan nga iya saad nga ginsumpaan. Tinugotan hiya han iya bana hin pagpadayon han saad pinaagi hin diri niya pagriwa dida han adlaw nga hinbaroan ini han iya bana.

¹⁵ Kundi kon ha orhe igsikway han bana an saad nga ginsumpaan, kinahanglan mag-antos an bana han sirot nga unta ihahatag ha iya asawa.

¹⁶ Amo ini an mga turumanon nga iginhatag han Ginoo kan Moises mahitungod han mga saad nga ginsumpaan hin diri inasaw-an nga babaye nga nalungon pa ha balay han iya amay o hin inasaw-an nga babaye.