Numero 20 - Samarenyo Meaning-Based Bible (1984)

May Nanhinabo didto ha Cades

¹ Dida han syahan nga bulan inmabot an bug-os nga bungto han Israel ngadto ha kamingawan han Zin ngan nagkampo hira didto ha Cades. Didto namatay hi Miriam ngan iginlubong.

² Waray tubig didto han ira ginkampohan, sanglit gin-alirongan han mga tawo hira Moises ug Aaron,

³ ngan nagsumbong: “Maupay pa ada kon nagkamatay na la kami ha atubangan han Tulda han Ginoo upod han amon mga igkasi Israelita.

⁴ Kay ano nga gindara kami niyo nganhi hini nga kamingawan? Basi la magkamatay kami dinhe upod han amon mga kahayopan?

⁵ Kay ano nga ginpagawas kami niyo ha Ehipto nganhi hini nga makalolooy nga dapit nga waray bisan ano nga naturok? Waray mga pugas, waray mga igos, waray mga ubas, waray mga granada. Waray ngani bisan tubig nga irimnon!”

⁶ Hinmirayo tikang han mga tawo hira Moises ug Aaron ngan tinmindog dida han agian han Tulda. Hinmapa hira ha tuna, ngan pinmakita ha ira an himaya han Ginoo.

⁷ Nagsiring kan Moises an Ginoo,

⁸ “Kuhaa an tungkod nga aadto ha atubangan han Kahon han Ginsaaran ngan tiroka niyo ngan hi Aaron an bug-os nga bungto. Didto ha atubangan nira ngatanan sidnga an bato nga aadto didto nga humatag hin tubig, ngan mabugwak in tubig tikang han bato para han mga tawo, basi uminom hira ngan an ira mga kahayopan.”

⁹ Kinmadto hi Moises ngan ginkuha niya an tungkod sumala han iginsugo han Ginoo.

¹⁰ Gintirok niya ngan hi Aaron an bug-os nga bungto ha atubangan han bato ngan nagsiring hi Moises, “Pamati, kamo nga mga magsinupilon! Makakuha ba kami hin tubig para ha iyo tikang hini nga bato?”

¹¹ Niyan inalsa ni Moises an tungkod ngan ginbalbag niya an bato hin makaduha, ngan binmugwak in dako nga sapa hin tubig, ngan nanginom an ngatanan nga mga tawo ngan mga hayop.

¹² Kundi ginbusaan han Ginoo hira Moises ug Aaron. Nagsiring hiya, “Tungod nga kulang kamo hin pagtoo nga makakapakita ako han akon baraan nga gahom ha atubangan han mga tawo han Israel, diri kamo magpapangulo ha ira ngadto han tuna nga akon iginsaad hin paghatag ha ira.”

¹³ Nahinabo ini didto ha Meriba, diin nagnginurutob an mga tawo han Israel kontra han Ginoo ngan diin iginpakita niya ha ira an iya pagkabaraan.

Dinmiri an Hadi han Edom hin Pagpaagi han Israel

¹⁴ Tikang ha Cades nagpasugo hi Moises ngadto han hadi han Edom. Nagsiring an mga ginsugo, “Tikang ini nga mensahe han iyo kabugtoan nga mga tribo han Israel. Maaram man kamo han kakurian nga amon gin-antos,

¹⁵ kon gin-unan-o han amon mga ginikanan in paghingadto ha Ehipto diin naiha an amon pag-ukoy didto. Ginpakurian han mga Ehiptohanon an amon mga ginikanan ngan kami,

¹⁶ ngan nagsangpit kami han Ginoo hin pakibulig. Hinbatian niya an amon pagsangpit ngan nagsugo hiya hin usa nga anghel nga nagmando ha amon hin paggawas han Ehipto. Yana aadi kami ha Cades nga usa nga bungto hirani han pag-ultan han iyo katunaan.

¹⁷ Tugoti gad kami hin pagtalabok han iyo tuna. Diri kami ngan an amon kabakahan masimang han dalan o mapasingadto han iyo kaumhan o mga urubasan, ngan diri kami mainom ha iyo mga atabay. Magsusulsog la kami han hiluag nga dalan tubtob nga mahigawas kami han iyo katunaan.”

¹⁸ Kundi binmaton an mga Edomitanhon, “Diri kami natugot hin pagpaagi ha iyo dinhe han amon tuna! Kon magpasipara kamo, magawas kami hin pagsulong ha iyo.”

¹⁹ Nagsiring an mga tawo han Israel, “Diri gud kami masimang han hiluag nga dalan, ngan kon kami o an amon mga hayop uminom han iyo tubig, babaydan namon ini—an pagtalabok la an amon kinahanglan.”

²⁰ Nagsiring gihapon an mga Edomitanhon, “Diri kami natugot!” Ngan nagkagawas hira upod in mga kasondalohan hin pagsulong han mga tawo han Israel.

²¹ Tungod nga waray man tumugot an mga Edomitanhon han mga Israelita hin pagtalabok han ira tuna, linmipas an mga Israelita ngan nagbiling hin lain nga dalan.

Namatay hi Aaron

²² Binmaya han Cades an bug-os nga bungto han Israel ngan inmabot hira han Bukid Hor,

²³ ha pag-ultan han Edom. Didto nagsiring an Ginoo kanda Moises ug Aaron,

²⁴ “Diri masulod hi Aaron ngadto han tuna nga akon iginsaad hin paghatag han Israel; mapatay hiya, kay sinmupil kamo nga duha han akon sugo didto ha Meriba.

²⁵ Dad-a ngadto ha igbaw han Bukid Hor hi Aaron ngan hi Eleazar nga iya anak,

²⁶ ngan didto hugkasa an padianon nga mga kapa ni Aaron ngan igsul-ot ini kan Eleazar. Mapatay didto hi Aaron.”

²⁷ Gintuman ni Moises an iginsugo han Ginoo. Sinmagka hira han Bukid Hor ha atubangan han bug-os nga bungto,

²⁸ ngan ginhugkas ni Moises an padianon nga mga kapa ni Aaron ngan iginsul-ot ini kan Eleazar. Didto ha bawbaw han bukid namatay hi Aaron ngan binmalik paglugsong hira Moises ug Eleazar.

²⁹ Hinbaroan han bug-os nga bungto nga namatay hi Aaron, ngan nagmabidoon hira ngatanan tungod ha iya sulod hin 30 ka adlaw.