Numero 17 - Samarenyo Meaning-Based Bible (1984)

Namukad ngan Namunga an Tungkod ni Aaron

¹ Nagsiring kan Moises an Ginoo,

² “Sidnga an mga tawo han Israel nga tagan ka hin 12 nga mga tungkod, usa tikang han pangulo han kada tribo. Igsurat an ngaran han tagsa nga tawo dida han iya tungkod,

³ ngan igsurat an ngaran ni Aaron dida han tungkod han tribo ni Levi. Magkakamay-ada usa nga tungkod para han kada usa nga pangulo han tribo.

⁴ Dad-a ini ngadto han akon Tulda ngan igbutang ini ha atubangan han Kahon han Ginsaaran diin magkikita kita.

⁵ Niyan mananaringsing an tungkod han tawo nga akon ginpili. Dida hini nga paagi pahuhunongon ko an dayuday nga pagnginurutob hini nga mga Israelita kontra ha imo.”

⁶ Sanglit naghimangraw hi Moises ha mga Israelita, ngan gintagan hiya hin tag usa nga tungkod han kada usa han ira mga pangulo, usa para han kada tribo, 12 ngatanan, ngan an usa hadto nga mga tungkod amo an tungkod ni Aaron.

⁷ Niyan ibinutang ni Moises an ngatanan nga mga tungkod didto han Tulda, ha atubangan han Kahon han Ginsaaran han Ginoo.

⁸ Han pagkabuwas, han pagsulod ni Moises han Tulda, hinkit-an niya nga nanaringsing na an tungkod ni Aaron nga natindog han tribo ni Levi. Namiyuos, namukad, ngan namunga ini hin hinog nga mga almendras!

⁹ Gindara ni Moises an ngatanan nga mga tungkod ngan iginpakita ini han mga Israelita. Hinkit-an nira an nahinabo ngan ginkuha han kada pangulo an iya kalugaringon nga tungkod.

¹⁰ Nagsiring kan Moises an Ginoo, “Ibalik an tungkod ni Aaron ngadto ha atubangan han Kahon han Ginsaaran. Hihiposon ini nga usa nga pahimatngon para han magsinupilon nga mga Israelita, nga kon diri umundang an ira pagnginurutob magkakamatay hira.”

¹¹ Ginbuhat ni Moises sumala han iginsugo han Ginoo.

¹² Nagsiring kan Moises an mga tawo han Israel, “Ta, kon amo ito, mapatay kami ngatanan!

¹³ Kon mapatay an bisan hin-o nga mahirani han Tulda, gabay na la kami mamatay!”