Numero 15 - Samarenyo Meaning-Based Bible (1984)

Iginhatag in mga Balaod Mahitungod hin mga Halad nga Tutuboron

¹ Iginhatag han Ginoo kan Moises

² an masunod nga mga turumanon para han mga tawo han Israel, nga pagtutumanon nira didto han tuna nga iya ighahatag ha ira.

³ Mahihimo pagdad-on ngadto han Ginoo in usa nga todo nga baka, usa nga karnero nga lalaki, usa nga karnero o usa nga kanding sugad nga usa nga halad nga susunogon, o usa nga unong nga tutuboron ha pagtuman hin saad, o hin usa nga kaburot-on nga halad, o hin usa nga halad kon nagsasaurog kamo han mga siringbahon nga pyesta; nakakalipay han Ginoo an alimyon hini nga mga halad.

^4-5 An bisan hin-o nga magdara hin karnero o kanding nga usa nga halad nga susunogon ngadto han Ginoo, kinahanglan magdara upod han kada hayop hin usa ka kilo nga harina nga sinaktan hin usa ka litro nga lana hin olibo nga usa nga halad nga pagkaon, ngan updan ini hin usa ka litro nga bino.

⁶ Kon ighalad in karnero nga lalaki, ighalad liwat in duha ka kilo nga harina nga sinaktan hin 1 1/2 ka litro nga lana hin olibo.

⁷ Usa ini nga halad nga pagkaon, ngan updan ini hin 1 1/2 ka litro nga bino. Nakakalipay han Ginoo an alimyon hini nga mga halad.

⁸ Kon pagdad-on ngadto han Ginoo in todo nga baka nga usa nga halad nga susunogon, o nga usa nga hayop nga tutuboron ha pagtuman hin saad, o nga usa nga halad hin pagkaurosa,

⁹ kinahanglan magdara hin usa nga halad nga pagkaon nga mga 3 ka kilo nga harina nga sinaktan hin mga 2 ka litro nga lana hin olibo,

¹⁰ upod in mga 2 ka litro nga bino. Nakakalipay han Ginoo an alimyon hini nga mga halad.

¹¹ Amo ito an igin-uupod hin paghalad han kada baka nga todo, karnero nga todo, karnero nga babayi, o kanding.

¹² Kon sobra hin usa nga hayop an ighahalad, dudugangan hin angay nga kadamo an upod nga halad nga pagkaon.

¹³ Pagbubuhaton ini han tagsa nga tuminungnong nga Israelita kon maghalad hiya hin usa nga halad nga pagkaon, kanay alimyon nakakalipay han Ginoo.

¹⁴ Ngan kon may-ada usa nga lumalangyaw nga humarapit la o nag-uokoy hin dayon dida ha iyo, nga magdara hin halad nga pagkaon, kanay alimyon nakakalipay han Ginoo, pagtutumanon niya an amo ngahaw nga mga lagda.

¹⁵ Ha ngatanan nga tiarabot nga panahon pagtutumanon niyo ngan han mga lumalangyaw nga nag-uokoy dida ha iyo an amo ngahaw nga mga lagda. Sugad man ha iyo an mga lumalangyaw ha atubangan han Ginoo;

¹⁶ para ha iyo ngan ha ira man an amo ngahaw nga mga balaod ngan mga lagda.

¹⁷ Iginhatag han Ginoo kan Moises

¹⁸ an masunod nga mga turumanon para han mga tawo han Israel nga pagtutumanon nira didto han tuna nga iya ihahatag ha ira.

¹⁹ Kon kumaon kamo han bisan ano nga abot ngan bunga han tuna didto, iglalain in pipira hini nga usa nga linain nga amot ngadto han Ginoo.

²⁰ Kon maghimo kamo hin tinapay, ighahalad nga usa nga linain nga amot ngadto han Ginoo an syahan nga tinapay nga hinimo tikang han bag-o nga inani. Ighahalad ini niyo ha amo ngahaw nga paagi han iyo paghalad han linain nga amot nga iyo ginhimo tikang han inani nga iyo ginggiok.

²¹ Ha ngatanan nga tiarabot nga panahon ighahatag ngadto han Ginoo ini nga linain nga regalo tikang han tinapay nga iyo paghihimoon.

²² Kundi pananglit may tawo nga mangalimot hin pagtuman hin pipira hini nga mga turumanon nga iginhatag han Ginoo kan Moises;

²³ ngan pananglit, ha panahon nga tiarabot diri makatuman an bungto han ngatanan nga iginsugo han Ginoo pinaagi kan Moises;

²⁴ kon nahimo an sayop tungod han katapang han bungto, maghahalad hira hin usa nga baka nga todo nga usa nga halad nga susunogon, kanay alimyon nakakalipay han Ginoo, upod an angay nga halad nga pagkaon ngan halad nga bino. Labot hini maghahalad hira hin usa nga kanding nga lalaki sugad nga usa nga halad tungod hin sala.

²⁵ Pagbubuhaton han padi an seremonyas hin paglinis para han bungto, ngan pasasayloon hira, kay diri man tinuyo an sayop, ngan gindara nira an ira halad tungod hin sala nga usa nga halad nga pagkaon ngadto han Ginoo.

²⁶ Pasasayloon an bug-os nga bungto han Israel ngan an mga lumalangyaw nga nag-uokoy dida ha ira, kay nahiapi an ngatanan dida han pakasayop.

²⁷ Kon makasala hin diri tinuyo in usa ka tawo, maghahalad hiya hin usa nga kanding nga babayi, nga usa ka tuig an panuigon, nga usa nga halad tungod hin sala.

²⁸ Pagbubuhaton han padi didto han altar an seremonyas hin paglinis han tawo tikang han iya sala, ngan pasasayloon hiya.

²⁹ Amo ngahaw nga turumanon an pagsusundon han ngatanan nga nakakasala hin diri tinuyo, ma tuminungnong nga Israelita o lumalangyaw nga nag-uokoy dida ha ira.

³⁰ Kundi bisan hin-o nga tawo nga makasala hin tinuyo, ma tuminungnong o lumalangyaw hiya, salaan hiya hin pagtamay han Ginoo, ngan papatayon hira,

³¹ kay iginsalikway niya an iginsiring han Ginoo ngan gintuyo niya hin pagsupaka an usa han iya mga sugo. Hiya an mabaton han iya kalugaringon nga kamatayon.

Ginsupak an Sugo hiunong han Adlaw nga Igparahuway

³² Makausa, samtang nakadto pa ha kamingawan an mga Israelita, hin-agian in usa ka tawo nga nangangahoy ha Adlaw nga Igparahuway.

³³ Gindara ini nga tawo ngadto kanda Moises, Aaron, ngan han bug-os nga bungto,

³⁴ ngan ginpabantayan la anay hiya kay diri pa man hira sayod hin maupay kon ano an pagbubuhaton ha iya.

³⁵ Niyan nagsiring an Ginoo kan Moises, “Kinahanglan patayon an tawo; pagbabatoon hiya han bug-os nga bungto ngada han kamatay didto ha gawas han kampo.”

³⁶ Sanglit gindara an tawo han bug-os nga bungto ngadto ha gawas han kampo ngan ginbato hiya ngada han kamatay sumala han iginsugo han Ginoo.

Ginhatag in mga Turumanon Mahitungod hin mga Borlas ha Panapton

³⁷ Ginsugo han Ginoo hi Moises

³⁸ nga sidngon an mga tawo han Israel: “Himoi hin mga borlas dida han mga kanto han iyo mga panapton ngan butangi hin asol nga lubid an kada borlas. Pagbubuhaton ini niyo ha ngatanan nga panahon nga tiarabot.

³⁹ Makakapahinumdom ini nga borlas ha iyo. Ha kada pakakakita niyo han borlas, mahinunumdom kamo han ngatanan nga akon mga sugo ngan pagtutumanon niyo ini; niyan diri na kamo mabaya ha akon ngan diri magsusunod han iyo kalugaringon nga mga karuyagon ngan mga ungara.

⁴⁰ Magpapahinumdom ha iyo an mga borlas hin pagtuman han ngatanan ko nga mga sugo, ngan maaakon gud kamo ha ngatanan nga panahon.

⁴¹ Ako amo an Ginoo nga iyo Dyos; ginpagawas ko kamo ha Ehipto basi ako magin iyo Dyos. Ako amo an Ginoo.”