Numero 13 - Samarenyo Meaning-Based Bible (1984)

Iginpadara an mga Espiya

¹ Nagsiring kan Moises an Ginoo,

² “Pagpili hin usa han mga pangulo ha kada usa han dose nga mga tribo, ngan sugoa hira nga mga espiya hin pag-usisa han tuna han Canaan nga akon ihahatag han mga Israelita.”

^3-15 Sinmugot hi Moises ngan tikang han kamingawan han Paran ginsugo niya inin masunod nga mga pangulo: Tribo Pangulo Ruben Hi Semua nga anak ni Secor Simeon Hi Safat nga anak ni Hori Juda Hi Caleb nga anak ni Jefone Isacar Hi Igal nga anak ni Jose Efraim Hi Oseas nga anak ni Nun Benjamin Hi Falti nga anak ni Rafu Zabulon Hi Zadiel nga anak ni Sodi Manases Hi Gadi nga anak ni Susi Dan Hi Amiel nga anak ni Gemali Aser Hi Setur nga anak ni Miguel Neftali Hi Nabi nga anak ni Bapsi Gad Hi Guel nga anak ni Maqui

Tribo Pangulo

¹⁶ Amo ini an mga espiya nga ginsugo ni Moises hin pag-usisa han tuna. Ginliwanan niya hin Josue an ngaran ni Oseas nga anak ni Nun.

¹⁷ Han pagsugoa na ha ira ni Moises, iya ginsiring hira, “Tikang dinhe pakadto kamo ha amihanan, kahuman ngadto ha timogan nga bahin han tuna han Canaan, ngan pagpadayon kamo ngadto han sagkahon nga katunaan.

¹⁸ Panginanoa niyo kon ano ini nga tuna, kon damo ba an mga tawo nga nag-uokoy didto, ngan kon matiunan-o hin kamagkusog hira.

¹⁹ Usisaha niyo kon maupay ba o maraot an tuna, ngan kon nag-uokoy an mga tawo dida hin mga bungto nga waray mga pader o dida ba hin pinaderan nga mga syudad.

²⁰ Usisaha niyo kon malangbo ba an tuna, ngan kon damo ba an mga kahoy. Ngan pagdara gud kamo hin mga bunga hin mga kahoy nga naturok didto.” (Panahon adto nga natikang pa la hin pagkahinog an mga ubas.)

²¹ Sanglit napakadto ha amihanan an mga tawo ngan gin-usisa nira an tuna tikang han kamingawan han Zin didto ha timogan asta ngadto ha Rehob, nga hirani han Agianan han Hamat didto ha amihanan.

²² Kinmadto hira anay ha timogan nga bahin han tuna, ngan inmabot ngadto ha Hebreo diin nag-ukoy an mga hugpo hin mga panimalay nira Ahiman, Sesai, ug Talmai nga mga tulin ni Anak nga higante. (Gintukod an Hebron hin pito ka tuig una pa han Zoan didto ha Ehipto.)

²³ Inmabot hira ngadto han Kahamub-an han Escol, ngan didto nag-utod hira hin sanga nga may usa ka urapong hin mga ubas nga mabug-at hin duro nga nagkinahanglan hin duha ka tawo hin pagpasag hini. Nagdara liwat hira ha ira pagbalik hin mga granada ngan mga igos. (

²⁴ Ginngaranan adto nga dapit nga Kahamub-an han Escol tungod han urapong hin mga ubas nga gin-utod didto han mga Israelita.)

²⁵ Katapos nira pag-usisaha han tuna sulod hin kwarenta ka adlaw, binmalik an mga espiya

²⁶ ngadto kan Moises, Aaron, ngan han bug-os nga bungto han Israel didto ha Cades ha kamingawan han Paran. Iginsumat nira an ira hinkit-an ngan iginpakita nira an bunga nga ira gindara.

²⁷ Ginsumatan nira hi Moises, “Gin-usisa namon an tuna ngan hinbaroan namon nga maupay ngan malangbo ini; ngan iini in amon dara nga mga bunga.

²⁸ Kundi gamhanan an mga tawo nga nag-uokoy didto, ngan dagko hin duro ngan pinaderan an ira mga syudad. An maraot pa kay hinkit-an namon didto an mga tulin han mga higante.

²⁹ Nag-uokoy an mga Amalekanhon didto han timogan nga bahin han tuna; an mga Hiteohanon, mga Jebuseohanon, ngan mga Amoreohanon didto han sagkahon nga tuna; ngan an mga Canaanhon ha ligid han Dagat Mediteraneo ngan ha ligid han Salog Jordan.”

³⁰ Ginpahilom ni Caleb an mga tawo nga nagnginginurutob kontra kan Moises, ngan nagsiring hiya, “Kinahanglan sulongon ta yana an tuna ngan kuhaon ta ini; igo an aton kakusog hin pakakuha han tuna.”

³¹ Kundi nagsiring an mga tawo nga inmupod kan Caleb, “Ayaw, diri pa kita igo kakusog hin pagsulong ha ira; mas gamhanan kay ha aton an mga tawo didto.”

³² Sanglit ginpasarang nira in buwa nga sumat dida han mga Israelita mahitungod han tuna nga ira gin-usisa. Nagsiring hira, “Diri ngani igo an abot hito nga tuna hin pagpakaon han mga tawo nga nag-uokoy didto. Higtaas hin duro an ngatanan nga mga tawo nga amon hinkit-an,

³³ ngan hinkit-an pa ngani namon didto an mga higante nga tulin ni Anak. Inabat namon nga sugad la kami hin mga apan ka gudtiay, ngan amo gud ada an ira pagkita ha amon.”