Numero 12 - Samarenyo Meaning-Based Bible (1984)

Ginkastigo hi Miriam

¹ Nangasawa hi Moises hin usa nga babaye nga taga-Cusi ngan tungod hini ginsusnan hiya nira Miriam ug Aaron.

² Nagsiring hira, “Naghimangraw ba an Ginoo pinaagipinaagi la kan Moises? Waray ba liwat hiya maghimangraw pinaagi ha amon?” Hinbatian han Ginoo an ira iginsiring. (

³ Mapinaubsanon nga tawo hi Moises, labaw pa kamapinaubsanon kay hin bisan hin-o dinhe ha tuna.)

⁴ Ha gilayon nagsiring an Ginoo kanda Moises, Aaron, ug Miriam, “Karuyag ko nga gumawas kamo nga tulo ngadto han akon Tulda.” Kinmadto hira,

⁵ ngan linmusad an Ginoo dida hin usa nga harigi nga dampog, tinmindog dida han agian han Tulda, ngan nagtawag, “Aaron! Miriam!” Kinmadto ha atubangan hira nga duha,

⁶ ngan nagsiring an Ginoo, “Yana pamatii an akon igsisiring! Kon may-ada mga manaragna dida ha iyo, nagpapadayag ako ha ira pinaagi hin mga panan-awon ngan naghihimangraw ako ha ira pinaagi hin mga inop.

⁷ Iba ini kon naghihimangraw ako kan Moises nga akon surugoon; igintapod ko ha iya an ngatanan ko nga mga tawo nga Israelita.

⁸ Sanglit nakikighimangraw ako ha iya nga nag-aatubang kami; diri pinaagi hin mga tirigohon; hinkit-an nga ngani niya an akon dagway! Kay ano nga nagpasipara kamo hin pagyakan kontra kan Moises nga akon surugoon?”

⁹ Nasina ha ira an Ginoo; sanglit han pagbulag na han Ginoo,

¹⁰ ngan pagbaya na han dampog tikang han Tulda, naluob dayon an panit ni Miriam hin sanla nga sakit ngan nagburusag ini sugad hin gapas. Han pagsiplat ha iya ni Aaron ngan han paghikit-i nga naluob hi Miriam han sakit nga sanla,

¹¹ nagsiring hiya kan Moises, “Mano, ayaw gad kami pagpaantosa hini nga kastigo tungod han amon linurong nga sala.

¹² Ayaw gad itugot nga masugad hiya hin natawo nga daan patay, kanay lawas hapit na madunot ha paggawas han tiyan ni iya nanay.”

¹³ Sanglit nagtawag hi Moises han Ginoo, “O Dyos, tambala gad hiya!”

¹⁴ Binmaton an Ginoo, “Kon gintuprahan hiya han iya amay dida han iya bayhon, pag-aantoson niya sulod hin pito ka adlaw an iya kaarawdan. Sanglit igawas hiya han kampo sulod hin usa ka semana, ngan katapos hito makakahimo na hiya hin pakasulod.”

¹⁵ Iginggawas hi Miriam han kampo sulod hin pito ka adlaw, ngan waray magbalhin han kampo an mga tawo ngada han pakasulod na liwat ni Miriam han kampo.

¹⁶ Niyan binmaya hira han Hazerot ngan nagkampo hira didto han kamingawan han Paran.