Nehemias 9 - Samarenyo Meaning-Based Bible (1984)

Nagkompisal an mga Tawo han Ira mga Sala

^1-2 Dida han ika-24 nga adlaw han amo ngahaw nga bulan nagtitirok hin pagpuasa an mga tawo han Israel ha pagpakita hin kabido tungod han ira mga sala. Bulag na hira ngatanan han mga lumalangyaw. Nagbado hira hin sako ngan nagbutang hin tapotapo dida han ira mga ulo sugad nga mga tigaman hin kabidoan. Niyan tinmukdaw hira ngan nagkompisal han ira mga sala nga nabuhat nira ngan han ira kaapoy-apoyan.

³ Ginbasa ha ira an Balaod han Ginoo nga ira Dyos sulod hin mga tulo ka oras, ngan ha sunod nga mga tulo ka oras ginkompisal nira an ira mga sala ngan ginsingba nira an Ginoo nga ira Dyos.

⁴ May entablado para han mga Levita ngan tinmukdaw dida hini hira Josue, Bani, Cadmiel, Sebanias, Boni, Serebias, Bani, ug Kanani. Nag-ampo hira hin dako nga tingog ngadto han Ginoo nga ira Dyos.

⁵ Nagtawag para hin pagsingba inin masunod nga mga Levita: hira Josue, Cadmiel, Bani, Sabanias, Serebias, Odias, Sebanias, ug Fetahias. Nagsiring hira: “Tindog kamo ngan pagdayawa an Ginoo nga iyo Dyos; pagdayawa hiya ha kadayonan! Magdayaw an ngatanan nga mga tawo han iya harangdon nga ngaran, bisan kon diri igo an pagdayaw han tawo.”

Ini an Ira Ginkompisal

⁶ Niyan nag-ampo an mga tawo han Israel hin sugad hini: “Ikaw, O Ginoo, ikaw la an Ginoo; ginhimo mo an kalangitan ngan an kabitun-an han langit. Ginhimo mo an tuna ug dagat ngan an ngatanan nga aada ha ira; iginhatag mo an kinabuhi ngadto han ngatanan. Nayukbo ngan nasingba ha imo an langitnon nga mga kagamhanan.

⁷ Ikaw, O Ginoo nga Dyos, an nagpili kan Abram ngan nagmando ka ha iya hin paggawas han Ur didto ha Babilonia; ginbalhin mo nga Abraham an iya ngaran nga Abram.

⁸ Hinbaroan mo nga matinumanon hiya ha imo, ngan naghimo ka ha iya hin ginsaaran. Nagsaad ka hin paghatag ha iya han tuna han mga Canaanhon, han tuna han mga Hiteohanon, ngan mga Amoreohanon, han tuna han mga Periseohanon, mga Jebuseohanon, mga Gergaseohanon, nga magigin tuna nga pag-uokyan han iya mga tulin. Gintuman mo an imo saad, kay matinumanon ka.

⁹ “Hinkit-an mo an pag-antos han amon kaapoy-apoyan didto ha Ehipto; hinbatian mo an ira pagtawag hin pakibulig didto han Pula nga Dagat.

¹⁰ Ginbuhat mo in urosahon nga mga milagro kontra han hadi, kontra han iya mga opisyal ngan han mga tawo han iya tuna, kay hinbaroan mo an ira pagtalumpigos han imo mga tawo. Sanglit napasidunggan an imo ngaran tubtob ngada yana nga adlaw.

¹¹ Ginbuhag mo an dagat hin paghimo hin agian para han imo mga tawo, ngan gin-unhan mo hira hin paglatas dida hin mamara nga salad han dagat. Nagkalulumos adton mga naglanat ha ira dida han hilarom nga tubig, sugad hira hin bato nga linmunod dida ha higtaas nga balod han dagat.

¹² Ginmandoan mo hira kon adlaw pinaagi hin dampog, ngan gintiwakan mo an ira dalan kon gab-i pinaagi hin kalayo.

¹³ Didto ha Bukid Sinai linmusad ka tikang ha langit; nakighimangraw ka han imo mga tawo ngan gintagan mo hira hin mag-upay nga mga balaod ngan magtadong nga mga pagturon-an.

¹⁴ Gintutdoan mo hira hin paglihe ngan pagsantos han imo Adlaw nga Iparahuway, ngan iginhatag mo ha ira an imo mga balaod pinaagi kan Moises nga imo surugoon.

¹⁵ “Han paggutuma ha ira, gintagan mo hira hin tinapay nga tikang ha langit, ngan tubig nga tikang hin bato han pag-uhawa ha ira. Ginsiring mo hira hin pagtag-iya han tuna nga imo iginsaad hin paghatag ha ira.

¹⁶ Kundi nagmapinahitas-on ngan nagmatig-a an ulo han amon kaapoy-apoyan, ngan dinmiri hira hin pagsugot han imo mga sugo.

¹⁷ Dinmiri hira hin pagsugot; hinngalimtan nira an ngatanan nga imo ginbuhat; hinngalimtan nira an mga milagro nga imo ginbuhat. Ha ira pagpalabilabi nagpili hira hin pangulo nga magdadara ha ira hin pagbalik ngadto hin pagkaoripon ha Ehipto, Kundi Dyos ka nga napasaylo; maloloy-on ngan mahigugmaon ka, mahinay ka masina. Dako an imo pagkalooy; waray mo hira igsalikway.

¹⁸ Naghimo hira hin diyosdiyos nga bulawan nga baka, ngan nagsiring nga amo ini an diyos nga nagmando ha ira tikang ha Ehipto! Hin pagkadako han ira pagpakaalo ha imo, O Ginoo!

¹⁹ Kundi waray mo hira igsalikway didto han kamingawan, kay dako an imo pagkalooy. Waray mo kuhaa an dampog o an kalayo nga nagtutdo ha ira han agian ha adlaw ug gab-i.

²⁰ Ha imo pagkamaupay gintutdoan mo hira han angay nira pagbuhaton, ginpakaon mo hira hin mana ngan gintagan mo hira hin tubig nga irimnon.

²¹ Sulod hin 40 ka tuig didto han kamingawan gintagan mo hira han ngatanan nga ira ginkinahanglan; waray madunot an ira mga panapton, ngan waray manhubag hin kaul-ol an ira mga tiil.

²² “Ginpasakop mo ha ira in mga nasod ngan mga ginhadian, mga tuna nga katakip han ira kalugaringon nga tuna. Ginsakop nira an tuna han Hesebon, diin naghadi hi Sihon, ngan an tuna han Basan, diin naghadi hi Og.

²³ Gintagan mo hira hin mga anak nga sugad kadamo han kabitun-an ha langit, ngan ginpatag-iya ngan ginpaukoy mo hira didto han tuna nga imo iginsaad nga ihahatag ngadto han ira kaapoy-apoyan.

²⁴ Ginsakop nira an tuna han Canaan; gindaog mo an mga tawo nga nag-ukoy didto. Gintagan mo an imo mga tawo han gahom hin pagbuhat han ira mga karuyag pagbuhaton han mga tawo ug kahadian han Canaan.

²⁵ Ginbihag han imo mga tawo in pinarig-on nga mga syudad, maglangbo nga tuna, kabablayan nga puno hin mga manggad, mga atabay nga inukad na, olibo nga kakahoyan, namumunga nga kakahoyan, ngan mga urubasan. Nangaon hira ngatanan ngan nagkabubusog nanambok ug naglipay; tungod han ngatanan nga mag-upay nga mga butang nga imo iginhatag ha ira.

²⁶ “Kundi sinmupil ngan sinmupak ha imo an imo mga tawo; tinalikdan nira an imo Balaod. Pinamatay nira an mga manaragna nga nagpahimatngon ha ira, hin pagbalik ngada ha imo. Nakadamo hira hin pagpakaalo ha imo,

²⁷ sanglit tinugotan mo an ira mga kaaway hin pagsakop ngan paghadi ha ira. Dida han ira kakurian nagtawag hira ha imo hin pakibulig, ngan pinamatian mo hira tikang ha langit. Ha imo dako nga pagkalooy ginpadad-an mo hira hin mga pangulo nga nagtalwas ha ira tikang han ira mga kaaway.

²⁸ Han pagbalik na han kalinaw, nakasala na liwat hira, ngan tinugotan mo na liwat an ira mga kaaway hin pagsakop ha ira. Kundi han pagbasol ngan paghangyo nira nga talwason mo hira, pinamatian mo hira didto ha langit, ngan ha makadamo nga higayon gintalwas mo hira ha imo dako nga pagkalooy.

²⁹ Ginpahimatngon mo hira hin pagsugot han imo mga pagturon-an, kundi ha ira kamagpinahitas-on ginsalikway nira an imo mga balaod bisan kon an pagtuman han imo Balaod amo an dalan ngadto ha kinabuhi. Tungod han kamagtig-a han ira mga ulo, dinmiri hira hin pagsugot.

³⁰ Tuigtuig nagpahimatngon ka nga mailobon ha ira. Gindasig mo an imo mga manaragna hin paghimangraw ha ira, kundi mga bungol an imo mga tawo, sanglit tinugotan mo nga pagsakopon hira hin iba nga mga nasod.

³¹ Kundi tungod nga dako an imo pagkalooy, waray mo igsalikway o pagpuoha hira. Mahigugmaon ngan maloloy-on ka nga Dyos!

³² “O Dyos nga amon Dyos, hin pagkagamhanan nimo! Hin kamakusog ngan angay kahadlokan! Gintuman mo nga mainalagdon an mga saad han imo ginsaaran. Tikang pa han pagraogdaoga ha amon han Asiriahanon nga kahadian, bisan tubtob ngada yana, kamakalilisang han amon gin-antos! Nag-antos an amon kahadian, amon mga pangulo, amon kapadian ngan mga manaragna, amon kaapoy-apoyan ngan an ngatanan namon nga mga tawo. Hinumdomi an makalilisang nga amon gin-antos!

³³ Matadong an imo buhat hin pagkastigo ha amon; nagmatinumanon ka bisan kon nakasala kami.

³⁴ Waray magtuman han imo Balaod an amon kaapoy-apoyan, amon kahadian, amon mga pangulo ngan kapadian. Waray hira mamati han imo mga sugo ngan mga pahimatngon.

³⁵ Tinmugot ka nga paghadian an imo mga tawo han pag-ukoy nira didto han hiluag ngan matambok nga tuna nga imo iginhatag ha ira; kundi waray hira bumaya han ira sala ngan waray hira mag-alagad ha imo.

³⁶ Ngan yana mga oripon kami didto han tuna nga imo iginhatag ha amon, ini nga matambok nga tuna nga naghahatag ha amon hin pagkaon.

³⁷ An mga abot han tuna ihinahatag la ha mga kahadian nga imo iginbutang hin paghadi ha amon, kay nakasala kami, Nagpapasagad la hira han ira karuyag buhaton ha amon ngan han amon kahayopan, ngan makalilisang an amon paghimakuri!”

Nagpirma an mga Tawo hin Katangdoan

³⁸ Tungod han ngatanan nga nahinabo, naghimo kami, an mga tawo han Israel, hin sinurat nga katangdoan, ngan ginsilyohan ini han amon mga pangulo, han amon mga Levita, ngan han amon kapadian.