Nehemias 8 - Samarenyo Meaning-Based Bible (1984)

Ginbasa ni Esdras an Balaod ngadto han mga Tawo

¹ Dida han ikapito nga bulan napahimutang na an ngatanan nga mga tawo han Israel dida han ira mga bungto. Dida han syahan nga adlaw hito nga bulan nagtitirok hira ngatanan didto ha Jerusalem, didto han plasa ha sulod gudla han Ganghaan Tubig. Ginhangyo nira hin pagkuha han basahan han Balaod hi Esdras nga padi ngan batid han Balaod nga iginhatag han Ginoo ha Israel pinaagi kan Moises.

² Sanglit gindara ini ni Esdras ngadto han dapit nga ginkatirokan han mga tawo—kalalaken-an, kababayen-an, ngan an kabataan nga igo na hin pakasabot.

³ Didto han plasa ha ligid han ganghaan iya ginbasa ha ira an Balaod tikang ha maagahon pa ngadto han pagkaudto, ngan namati hin maupay hira ngatanan.

⁴ Nagtindog hi Esdras dida hin kahoy nga entablado nga gintindog para hini nga higayon. Nagtindog ha iyo tuo inin nasunod nga mga tawo: hira Matatias, Semaya, Anaias, Urias, Hilkias, ug Maasias; ngan nagtindog ha iya wala inin nasunod: hira Pedaias, Misael, Melquias, Hasum, Hasbadana, Zacarias, ug Mesolam.

⁵ Han natindog hi Esdras didto han entablado nga hiruhitaas han mga tawo, tinmutok ha iya an ngatanan nga mga tawo. Han pagbuklad gud niya han basahan, nagkatukdaw hira ngatanan.

⁶ Nagsiring hi Esdras, “Dayawon an Ginoo, an gamhanan nga Dyos!” Gin-alsa han ngatanan nga mga tawo an ira mga kamot ngan binmaton, “Amen! Amen!” Nanhapa hira ha tuna hin pagsingba.

⁷ Binmangon hira ngan tinmindog hira ngatanan. Ginsaysay ha ira an Balaod hinin nasunod nga mga Levita: hira Josue, Bani, Serebias, Jamin, Acub, Sabetai, Odias, Maasias, Kelita, Azarias, Josabed, Hanan, ug Palaya.

⁸ Ginhubad nira an Balaod han Dyos ngan ginsaysay ini basi makasabot an mga tawo.

⁹ Han pakabati han mga tawo han ginpapagtuman ha ira han Balaod, nagtikang hira pagtangis. Sanglit ginsiring nira Nehemias nga gobernador, Esdras nga padi nga batid han Balaod, ngan han mga Levita nga nagsasaysay han Balaod, an ngatanan nga mga tawo, “Baraan para han Ginoo nga iyo Dyos ini nga adlaw, sanglit diri kamo angay magmabidoon o magtangis.

¹⁰ Yana panguli kamo ngan pagkombite. Bahini han iyo pagkaon ug bino adton mga nagkukulang hin pagkaon. Baraan para han aton Ginoo yana nga adlaw, sanglit ayaw kamo pagmabidoon. Magpapakusog ha iyo an kalipay nga ihinahatag ha iyo han Ginoo.”

¹¹ Naglibot an mga Levita hin pagliaw han mga tawo ngan pagsiring ha ira nga diri hira magmabidoon dida hin sugad nga baraan nga adlaw.

¹² Sanglit nanguli an ngatanan nga mga tawo ngan nangaon ngan nanginom nga malipayon ngan ginbahinan nira adton waray pagkaon kay nasayoran nira an ginbasa ha ira.

Nagsaurog han Pyesta han mga Sirongan

¹³ Han pagkabuwas kinmadto kan Esdras an mga puno han mga banay, upod an kapadian ngan an mga Levita, basi makagtoon hira han Balaod.

¹⁴ Hinbaroan nira nga an Balaod nga iginhatag han Ginoo pinaagi kan Moises nagsugo nga mag-ukoy la anay an mga tawo han Israel dida hin mga payagpayag sulod han Pyesta han mga Sirongan.

¹⁵ Sanglit ira iginhatag inin masunod nga mga tugon ngan iginpadara ini bug-os nga Jerusalem ngan ha iba nga mga syudad ngan mga bungto: “Kadto kamo han kapungtoran ngan panguha kamo hin mga sanga hin mga palotsina, mga olibo, mga mirtel, mga palmera, ngan iba pa nga mga kahoy nga hihimoon nga mga payagpayag sumala han mga tugon nga nahisurat dida han Balaod.”

¹⁶ Sanglit nanguha an mga tawo hin mga sanga ngan naghimo hin mga payagpayag didto han patag nga mga atop han ira kabablayan, didto han ira mga bungsaran, didto han bungsaran han Templo, ngan didto han mga plasa ha ligid han Ganghaan Tubig ngan didto han ligid han Ganghaan ni Efraim.

¹⁷ Nanhimo hin mga payagpayag an ngatanan nga mga tawo nga binalik tikang han pagkahalin nira hin kabihag ngan ira ini gin-ukyan. Syahan pa ini pagbuhaton tikang han mga adlaw ni Josue nga anak ni Nun, ngan malipayon gud an ngatanan.

¹⁸ Tikang han syahan nga adlaw han pyesta ngadto han kataposan nga adlaw ira ginbasa ha kada adlaw in usa nga bahin han Balaod han Dyos. Nagsaurog hira sulod hin pito ka adlaw, ngan dida han ikawalo nga adlaw may-ada pangatapusan nga mga seremonyas sumala han ginkinahanglan han Balaod.