Nehemias 4 - Samarenyo Meaning-Based Bible (1984)

Gindaog ni Nehemias an Nag-ulang han Iya Buruhaton

¹ Han pakabati ni Sanbalat nga gintikangan na namon nga mga Judiyo an pagbag-o hin pagtindog han pader, napungot hiya ngan nagtikang hin pagyubit ha amon.

² Ha atubangan han iya mga kaupod ngan han Samariahanon nga kasondalohan nagsiring hiya, “Ano an nahunahunaan hini nga mga makalolooy nga mga Judiyo hin pagbuhat hini? Naghuhunahuna ba hira hin pagbag-o hin pagtindog han syudad? Naghuhunahuna ba hira nga pinaagi hin paghalad hin mga unong nga tutuboron mahuhuman nira an buruhaton hin usa ka adlaw? Makakahimo ba hira hin itirindog nga mga bato tikang hin mga tambak han nasunog nga mga rinuba?”

³ Tinmupad hi Tobias ha iya, ngan nagsiring hiya, “Ano nga pader an ira pagtitindogon? Makakatumba hini bisan la in usa nga garong!”

⁴ Nag-ampo ako, “Pamatii, O Dyos, an ira pagtamay ha amon! An ira pagtamay umomban unta ngada han ira mga ulo. Itugot nga pagtikasan hira han ngatanan nga ira gintatag-iya ngan ipabihag hira ngadto hin langyaw nga tuna.

⁵ Ayaw hira pagpasayloa han maraot nira nga mga buhat, ngan ayaw hingalimti an ira mga sala, kay ira gintamay kami nga mga magtirindog.”

⁶ Sanglit nagpadayon kami hin pagtindog na liwat han pader, ngan waray pag-iha nahuman an katunga han kahitaas hini, kay nagtinguha gud hin pagtrabaho an mga tawo.

⁷ Hinbatian nira Sanbalat, Tobias, ngan han katawhan han Arabia, Amon, ug Asdod nga mainuswagon an amon pag-ayad han pader han Jerusalem, ngan amon na gintuhusan an mga buhang han pader, ngan napungot hira hin duro.

⁸ Sanglit nagkasarabot hira ngatanan hin pagsulong han Jerusalem ngan paghimo hin kasamok.

⁹ Kundi nag-ampo kami ngadto han amon Dyos ngan nagbutang kami hin mga magbarantay han mga ganghaan adlaw gab-i.

¹⁰ May kanta an mga tawo han Juda: “Naluya kami tungod han mabug-at nga mga darad-on; Uraura ka damo han rinuba nga amon harakoton; An pagtindog han pader yana nga adlaw uunanhon man namon?”

¹¹ Hunahuna han amon mga kaaway nga diri kami nakita ha ira o nga diri kami mahibabaro han nahinanabo tubtob han paghisakbi ha amon pinaagi hin pagpatay ha amon ngan hin pagpaundang han amon buruhaton.

¹² Kundi an mga Judiyo nga nag-uokoy tampo han amon mga kaaway kinmadto ha amon ngan nakadamo pagsumat ha amon nga an amon mga kaaway masulong ha amon.

¹³ Sanglit ginsangkap ko an mga tawo hin mga espada, mga bangkaw, ngan mga pana, ngan iginpahimutang ko hira sumala han ira tagsa nga banay ha luyo han mga dapit han pader nga waray pa maayad.

¹⁴ Hinkit-an ko nga nababaraka an mga tawo, sanglit ginsiring ko hira, an ira mga pangulo, ngan mga opisyal, “Ayaw kamo kahadlok han aton mga kaaway. Hinumdomi niyo nga gamhanan ngan makaharadlok an Ginoo, ngan paki-away kamo para han iyo igkasi mga Israelita, iyo mga anak, iyo mga asawa, ngan iyo mga panimalay.”

¹⁵ Hinbaroan han aton mga kaaway nga aton hinsabtan an ira nahunahunaan ha aton ngan nasayod hira nga an Dyos ngahaw an nagkawang han ira mga maraot nga hunahuna. Niyan binmalik kami ngatanan hin pag-ayad han pader.

¹⁶ Tikang hadto nga adlaw, katunga han akon mga tawo an nagtrabaho ngan an katunga nagbantay ngan may-ada nira mga tabon ha dughan para hin pakig-away ngan sangkap hira hin mga bangkaw, mga taming, ngan mga pana. Ngan iginhatag han amon mga pangulo an ira tim-os nga pagbulig han mga tawo

¹⁷ nga nag-aayad han pader. Bisan adton mga parahakot han itirindog nga mga materyal nagamit han usa nga kamot hin paghakot ngan an usa liwat nga kamot nakapot hin hinganiban,

¹⁸ ngan an ngatanan nga mga magtirindog nagtaklos hin espada ha ira hawak. Kaupod ko an parahuyop han trompeta.

¹⁹ Ginsiring ko an mga tawo, an ira mga opisyal ngan mga pangulo. “Hinmirayo na an aton pag-ayad ngan hiluag na an aton pagkaburublag ha bawbaw han pader.

²⁰ Kon hibatian niyo an trompeta, pag-alirong kamo ha akon. An aton Dyos an makikig-away para ha aton.”

²¹ Sanglit kada adlaw, tikang han maagahon pa ngada han pagsirang han kabitun-an ha gab-i, katunga ha amon an nagtrabaho han pader samtang an katunga nagbantay nga may mga bangkaw.

²² Hini nga panahon ginsiring ko an mga tinaporan nga kinahanglan aanhi ha Jerusalem an pagkaturog kada gab-i hira ngan an ngatanan nira nga mga kabulig basi kabantayan namon an syudad kon gab-i ngan makagtrabaho kami kon adlaw.

²³ Waray ako maglubas han akon mga panapton bisan ha gab-i, sugad man an akon mga kaupod, an akon mga surugoon, ngan an mga magbarantay ha akon, ngan diri namon ibinubulag an amon mga hinganiban.