Nehemias 3 - Samarenyo Meaning-Based Bible (1984)

Gintindog na Liwat an Pader han Jerusalem

¹ Sugad hini an pagtindog na liwat han pader han syudad. Gintindog na liwat nira Eliasib nga Labaw nga Padi ngan han iya igkasi kapadian an ganghaan nga ginngaranan an Ganghaan han mga Karnero, iginhalad ini nira, ngan iginpahimutang an mga portahan. Iginhalad nira an pader tubtob han Lantawan nga ginngaranan an Lantawan han Usa ka Gatos ngan han Torre ni Hananel.

² Gintindog han mga tawo han Jerico an sapit nga bahin han pader nga gintindog ni Eliasib. Sunod han mga taga-Jerico, nagtindog liwat hi Sacur nga anak ni Amri.

³ Gintindog han banay ni Hasana an Ganghaan han Isda. Ginpahimutang nira an mga baybayan ngan an mga ganghaan, ngan igintaod an mga sira ngan mga trangka han ganghaan.

⁴ Sunod ha ira, nagtindog liwat hi Meremot nga anak ni Urias ngan apo ni Acos. Sunod ha iya, hi Mesolam, nga anak ni Baraquias ngan apo ni Mesesabel nag-ayad liwat. Sunod ha kan Mesolam, nagtindog liwat hi Sadoc nga anak ni Baana.

⁵ Gintindog han mga tawo han Tecoa an sunod nga bahin, kundi dinmiri an dumagko nga mga tawo han bungto han kinamot nga trabaho nga iginhatag ha ira han mga kapatas.

⁶ Gintindog liwat nira Joyada nga anak ni Fasea ug Mesolam nga anak ni Besodia an Ganghaan han Jesana. Ginpahimutang nira an mga baybayon ngan an mga portahan, ngan igintaod an mga sira ngan mga trangka han ganghaan.

⁷ Gintindog nira Meltias nga taga-Gabaon, Jadon nga taga-Meronot, ngan han mga tawo han Gabaon ug Mispa an sapit nga bahin, tubtob han inuokyan han gobernador han Katundan-han-Eufrates.

⁸ Gintindog ni Usiel nga anak ni Araias, nga panday hin bulawan an sapit nga bahin. Gintindog ni Ananias nga parahimo hin mga pahamot an sapit nga bahin tubtob han Pader nga Hiluag.

⁹ Gintindog ni Refaya nga anak ni Hur, nga punoan han katunga nga Distrito han Jerusalem an sapit nga bahin.

¹⁰ Gintindog ni Jedaias nga anak ni Haromat an sapit nga bahin nga hirani han iya kalugaringon nga balay. Sunod kan Jedaias, nagtindog liwat hi Hatus nga anak ni Hasebnias.

¹¹ Gintindog nira Melquias nga anak ni Harim ug Hasub nga anak ni Pahat Moab an sunod nga bahin ngan an Torre han mga Hudno.

¹² Sunod ha ira, nagtindog liwat hi Salum nga anak ni Halohes, nga punoan han lain nga katunga nga Distrito han Jerusalem, han sapit nga bahin. (Binmulig pagtrabaho an iya mga anak nga kababayen-an.)

¹³ Gintindog liwat nira Hanun ngan han mga umurokoy han syudad han Sanoa an Ganghaan Kahamub-an. Iginpahimutang nira an mga ganghaan ngan igintaod an mga sira ngan an mga trangka han ganghaan, ngan gin-ayad nira in 1,500 ka pyi han pader, tubtob han Ganghaan nga Harapilan.

¹⁴ Gintindog liwat ni Melquias nga anak ni Recab, nga punoan han Distrito han Betakerim an Ganghaan nga Harapilan. Iginpahimutang niya an mga ganghaan ngan igintaod an mga sira ngan an mga trangka han ganghaan.

¹⁵ Gintindog liwat ni Salum nga anak ni Colhose, nga punoan han Distrito han Mispa, an Ganghaan han Busay. Gin-atpan niya an aragian, iginpahimutang an mga ganghaan, ngan igintaod an mga sira ngan an mga trangka. Didto han Linaw Siloe gintindog niya an pader nga sapit han tanaman han hadi, tubtob han mga hagdan nga nalugsong tikang han Syudad ni David.

¹⁶ Gintindog ni Nehemias nga anak ni Asboc, nga punoan han katunga nga Distrito han Betsur, an sunod nga bahin tubtob han lubnganan ni David, han linaw, ngan han balay han kasondalohan.

Nagtrabaho han Pader an mga Levita

¹⁷ Inin nasunod nga mga Levita nagbag-o hin pagtindog han sunod nga pipira nga mga bahin han pader: Gintindog ni Rehum nga anak ni Bani an sunod nga bahin. Sunod kan Rehum gintindog ni Hasabias nga punoan han katunga nga Distrito han Keila an sapit nga bahin para han iya distrito.

¹⁸ Gintindog ni Bavai nga anak ni Enadad, nga punoan han lain nga katunga nga Distrito han Keila, an sapit nga bahin ni Hasabias.

¹⁹ Gintindog ni Ezer nga anak ni Josue, nga punoan han Mispa an sapit nga bahin ha atubangan han hirimosan han mga hinganiban tubtob han dapit nga linilikoan han pader.

²⁰ Gintindog ni Baruc nga anak ni Sabai an sapit nga bahin tubtob han aragian ngadto han balay ni Eliasib an Labaw nga Padi.

²¹ Gintindog ni Meremot nga anak ni Urias ngan apo ni Acos an sapit nga bahin tubtob han kataposan han balay ni Eliasib.

Nagtrabaho han Pader in Kapadian

²² Gin-otro hin pagtindog hinin nasunod nga kapadian an sunod nga pipira nga mga bahin han pader: Gintindog han kapadian nga tikang han mga dapit harani han Jerusalem an sunod nga bahin.

²³ Gintindog nira Benjamin ug Hasub an sapit nga bahin nga atubangan la han ira mga balay. Gintindog ni Asarias nga anak ni Maasias ngan apo ni Ananias an sapit nga bahin nga atubangan han iya balay.

²⁴ Gintindog ni Binui nga anak ni Enadad an sapit nga bahin, tikang han balay ni Asarias ngadto han kanto han pader.

^25-26 Gintindog ni Palal nga anak ni Osai an sapit nga bahin, tikang han kanto han pader ngan han torre han uruigbaw nga palasyo nga hirani han bungsaran han gwardya. Gintindog ni Padayas nga anak ni Faros an sapit nga bahin tubtob hin dapit didto ha sinirangan nga hirani han Ganghaan Tubig ngan han lantawan nga nagbabantay han Templo. (Hirani ini hito nga bahin han syudad nga gintatawag nga Ofel nga gin-ukyan han mga trabahador han Templo.)

May Iba pa nga mga Magtirindog

²⁷ Gintindog han mga tawo han Tecoa an sapit nga bahin, ug ikaduha na nira ini nga gintindog, tikang hin dapit nga tugbang han dako nga lantawan nga nagbabantay han Templo tubtob han pader nga hirani han Ofel.

²⁸ Gintindog hin usa ka hugpo hin kapadian an sapit nga bahin nga tipaamihanan tikang han Ganghaan Kabayo; an kada usa ha ira nagtindog ha atubangan han iya kalugaringon nga balay.

²⁹ Gintindog ni Sadoc nga anak ni Emer an sapit nga bahin nga atubangan han iya balay. Gintindog ni Semias nga anak ni Seconias, nga bantay han Ganghaan ha Sinirangan, an sapit nga bahin.

³⁰ Gintindog nira Ananias nga anak ni Selemias ug Hanun nga ikaunom nga anak ni Selef an sapit nga bahin, ug ikaduha na ini nga ira gintindog. Gintindog ni Mesolam nga anak ni Baraquias an sapit nga bahin nga atubangan han iya balay.

³¹ Gintindog ni Melquias nga panday hin bulawan an sapit nga bahin tubtob han balay nga ginggamit han mga trabahador han Templo ngan han mga magparatigayon nga nakada ha ligid han Ganghaan Mifcad ngadto han Templo nga hirani han kwarto ha bawbaw han amihan-sinirangan nga kanto han pader.

³² Gintindog han mga panday hin bulawan ngan han mga magparatigayon an kataposan nga bahin tikang han kwarto dida han kanto tubtob han Ganghaan Karnero.