Nehemias 2 - Samarenyo Meaning-Based Bible (1984)

Kinmadto ha Jerusalem hi Nehemias

¹ Usa ka adlaw, paglabay hin upat ka bulan, han nakaon hi emperador Artajerjes, gintagayan ko hiya han bino. Waray pa gud hiya makakita ha akon nga mabidoon,

² sanglit nagpakiana hiya, “Kay ano nga mabidoon ka pagkit-on? Diri ka man masakit. Kay ano nga diri ka man malipayon?” Nahadlok ako

³ ngan ginbaton ko hiya, “Mabuhi unta hin kadayonan an hadi! Uunanhon ko nga diri ako magmabidoon kon naruba man an syudad nga ginlubngan han akon kaapoy-apoyan ngan ginsunog an iya mga ganghaan?”

⁴ Nagpakiana an emperador, “Ano man an imo karuyag?” Nag-ampo ako ngadto han Dyos han Langit,

⁵ ngan katapos nagsiring ako ha emperador, “Kon ikalipay ako han emperador ngan kon pamatian niya an akon hangyo, tugoti ako hin pagkadto han tuna han Juda, ngadto han syudad nga ginlubngan han akon kaapoy-apoyan, basi akon pag-aydon na liwat an syudad.”

⁶ Pinamatian an akon hangyo han emperador (samtang nasapit ha iya an iya asawa). Ginpakianhan ako niya kon maiha ba ako didto ngan kon san-o ako mabalik, ngan ginsumatan ko hiya.

⁷ Niyan naghangyo ako ha iya nga tagan ako niya hin mga surat ngadto han mga gobernador han Lalawigan han Katundan-han-Eufrates, basi ako paagion nira ngadto ha Juda.

⁸ Naghangyo liwat ako hin surat ngadto kan Asaf nga tinaporan han mga kagurangan han hadi basi ako katagan hin kahoy para han mga ganghaan han kota nga nagbabantay han Templo, para han mga pader han syudad, ngan para han balay nga akon pag-uokyan. Iginhatag ha akon han emperador an ngatanan nga akon ginhangyo, kay upod ko man an Dyos.

⁹ Ginpaupdan ako han emperador hin mga opisyal hin kasondalohan ngan hin mga dikabayo nga mga sondalo. Han pag-abot ko ha Katundan-han-Eufrates, iginhatag ko an mga surat han emperador ngadto han mga gobernador.

¹⁰ Kundi nakabati hira Sanbalat nga taga bungto han Betoron ug Tobias nga usa nga opisyal ha lalawigan han Amon, nga may inmabot para hin pagpakaupay han mga tawo han Israel, ngan nangalas gud hira.

¹¹ Nagpadayon ako ngadto ha Jerusalem, ngan sulod hin tulo ka adlaw

¹² waray ako ginsumat nga bisan hin-o han igindasig ha akon han Dyos hin pagpabuhat para han Jerusalem. Niyan dida han katutnga han kagab-ihon binmangon ako ngan ginmawas ako upod in pira han akon mga kaupod. An asno nga akon ginsakyan amo la an hayop nga amon dara.

¹³ Gab-i pa adto han pagbaya ko han syudad pinaagi han Ganghaan Kahamub-an didto ha katundan, ngan nagtipatimogan ako ug linabyan ko an Busay Dragon ngadto han Ganghaan Harapilan. Gin-usisa ko an ruba nga mga pader han syudad ngan an mga ganghaan nga nagkasusunog.

¹⁴ Niyan didto ha sinirangan han syudad nagtipaamihanan ako ngadto han Ganghaan Busay ngan han Lanaw han Hadi. An asno nga akon sinasakyan waray makasulsog hin agian dida han nagkaruruba,

¹⁵ sanglit linmugsong ako ngadto han Kahamub-an Kidron ngan nagpadayon ako pagsakay han asno ngan nagkinita ako han pader. Katapos binmalik ako han dalan nga akon gin-agian ngan inmoli ako ngadto han syudad pinaagi han Ganghaan Kahamub-an.

¹⁶ Waray may nahibaro han mga opisyal hito nga dapit kon napakain ako ngan kon ano an akon ginbuhat, kay waray ko may ginsumatan nga bisan hin-o han akon igkasi mga Judiyo—an kapadian, an mga pangulo, an mga opisyal, o bisan hin-o nga mabulig han buruhaton.

¹⁷ Kundi yana nagsiring ako ha ira, “Kitaa niyo an kamakuri han aton kamutangan, kay nabungkag an Jerusalem ngan mga ruba an iya mga ganghaan! Tindoga ta liwat an mga pader han syudad basi mawaray na an aton kaarawdan.”

¹⁸ Ngan iginsumat ko ha ira nga kaupod ngan kabulig ko an Dyos, ngan an iginsiring ha akon han emperador. Binmaton hira, “Tikangi ta na an pag-ayad liwat han syudad.” Ngan nag-andam hira basi katikangan an buruhaton.

¹⁹ Han paghibaro nira Sanbalat, Tobias, ngan usa nga Arabe nga ginngaranan kan Gesem, han nahunahunaan namon hin pagbuhat, gintawa-an kami nira ngan ginsiring, “Ano ba ini nga iyo nahunahunaan hin pagbuhat? Karuyag ba niyo sidngon nga maato kamo han hadi?”

²⁰ Binmaton ako, “Upod an bulig han Dyos han Langit, magmainuswagon gud kami hini nga amon inaatubang nga buhat. Kundi waray niyo katungod han bisan ano nga hiagi dinhe ha Jerusalem, ngan waray niyo bahin han iya mga handomanan.”