Nehemias 10 - Samarenyo Meaning-Based Bible (1984)

¹ An syahan nga nagpirma amo an gobernador, hi Nehemias, nga anak ni Hacalias, ngan sunod nagpirma hi Sedekias. Nagpirma liwat an mga nasunod:

^2-8 Kapadian: Hira Seraias, Azarias, Jeremias, Fasur, Amarias, Malquias, Hatus, Sebanias, Maluc, Harim, Merimot, Obadias, Daniel, Ginton, Baruc, Mesolam, Abias, Miamin, Maasias, Belgai, ug Semias.

^9-13 Mga Levita: Hira Josue nga anak ni Asanias, Binui han banay ni Henadad, Cadmiel, Sebanias, Odias, Kelita, Pelias, Hanan, Mica, Rehob, Hasebias, Sacur, Serebias, Sebanias, Odias, Bani, ug Beninu.

^14-27 Mga Pangulo han mga Tawo: Hira Faros, Paatmoab, Elam, Satu, Bani, Boni, Azgad, Bebai, Adonias, Begvai, Adin, Ater, Ezequias, Asur, Odias, Hasum, Besai, Harif, Anatot, Nebai, Migfias, Mesolam, Hasir, Mesesabel, Sadoc, Jadua, Feltias, Hanan, Anaias, Oseas, Hananias, Hasub, Halohes, Falias, Sobec, Rehum, Hasebna, Maasias, Ahias, Hanan, Anan, Maluc, Haran, ug Baana.

Ini an Katangdoan

²⁸ Kami nga mga tawo han Israel, an kapadian, an mga Levita, an mga gwardya han Templo, an mga musikero han Templo, an mga trabahador han Templo, ngan an ngatanan nga ha pagsugot han Balaod han Dyos binmulag han mga lumalangyaw nga nag-uokoy dida han amon tuna, kami kaupod an amon mga asawa ngan an ngatanan namon nga mga anak nga may igo na nga pagsabot,

²⁹ naduyog han amon mga pangulo hin pagsumpa, nga sisiratan kami hin paghigabai kon pagsupakon namon ini; nga mag-uokoy kami hin kinabuhi sumala han Balaod han Dyos, nga iginhatag han Dyos pinaagi kan Moises nga iya surugoon; nga magsusugot kami han ngatanan nga iginsusugo ha amon han Ginoo nga amon Ginoo; ngan nga magtutuman kami han ngatanan niya nga mga balaod ngan mga turumanon.

³⁰ Diri kami makikig-asawa han mga taga langyaw nga nag-uokoy dida han amon tuna.

³¹ Kon magdara in mga taga langyaw hin mga inani nga pugas o bisan ano nga butang nga igbabaligya ha amon dida han Adlaw nga Iparahuway o han bisan ano nga baraan nga adlaw, diri kami mapalit tikang ha ira. Diri kami mag-uuma han tuna ha kada ikapito ka tuig, ngan diri kami masukot han ngatanan nga mga utang.

³² Kada tuig maamot an kada usa ha amon hin upat ka gramo nga salapi nga ibubulig hin pagbayad han mga gasto han Templo.

³³ Tatalinguhaon namon nga masangkap an Templo para hin pagsingba hini masunod nga mga tinmangnoan: an baraan nga tinapay, an ikinaadlaw nga halad nga inani nga pugas, an mga hayop han ikinaadlaw nga mga unong nga tutuboron, an baraan nga mga halad para han mga Adlaw nga Iparahuway, mga Pyesta han Subang nga Bulan, ngan iba pa nga mga pyesta, an iba nga baraan nga mga halad, an mga halad hin pagkuha han mga sala han Israel, ngan an bisan ano nga iba pa nga ginkikinahanglan para han Templo.

³⁴ Kami, an mga tawo, kapadian, ngan mga Levita, magriripa kada tuig basi hisabotan kon hain nga banay an mahatag hin mga sungo para pagtubod han mga unong nga halad ngadto han Ginoo nga amon Dyos, sumala han mga ginkikinahanglan han Balaod.

³⁵ Pagdadad-on namon ngadto han Templo kada tuig in halad han syahan nga inani nga pugas ngan han syahan nga mga bunga nga mahihinog dida han amon mga kakahoyan.

³⁶ Pagdadad-on namon ngadto han kapadian han Templo an suhag nga lalake nga matawo ha kada usa ha amon, ngan didto ighahalad hiya namon ngadto ha Dyos sumala han ginkikinahanglan han Balaod. Ighahalad liwat namon an suhag nga baka nga ig-anak han kada usa han amon mga baka, ngan an suhag nga karnero o kanding nga ig-anak han kada usa han amon mga karnero o mga kanding.

³⁷ Pagdadad-on namon ngadto han kapadian han Templo an minasa nga hinimo tikang han syahan nga inani nga pugas ha kada tuig ngan an amon iba nga mga halad nga bino, lana hin olibo, ngan ngatanan nga mga bunga hin kahoy. Pagdadad-on namon an mga ikanapulo ka bahin tikang han mga abot han amon tuna ngadto han mga Levita nga tinaporan hin pagkarawat han mga ikanapulo ka bahin didto han amon kabaryohan ngan kaumhan.

³⁸ Maupod han mga Levita an kapadian nga tulin ni Aaron kon mangaro na hira han mga ikanapulo ka bahin, ngan para han paggamit didto han Templo, dadad-on han mga Levita ngadto han hirimosan nga mga kwarto han Templo an ikanapulo nga bahin han ngatanan nga nakuha nira nga mga ikanapulo ka bahin han mga abot han tawo.

³⁹ Dadad-on han mga tawo han Israel ngan han mga Levita an mga amot nga inani nga pugas, bino, ug lana hin olibo ngadto han hirimosan nga mga kwarto diin ginhihipos an mga kasangkapan han Templo ngan diin nag-uokoy an nag-aalagad nga kapadian hito nga adlaw, an mga gwardya han Templo, ngan an mga magkaranta han Templo. Diri namon pagpapasibay-an an balay han amon Dyos.