Nahum 2 - Samarenyo Meaning-Based Bible (1984)

Napukan an Ninibe

¹ Ninibe, sinusulong ka! Inmabot na an gahom nga magdudugmok ha imo. Butangi hin mga tawo an mga kota! Bantayi an dalan! Pag-andam para ha pag-awayan! (

² Ipapahiuli na han Ginoo an pagkaharangdon han Israel, sugad hadto han waray pa hiya pagtikasi han iya mga kaaway.)

³ May dara nga magpula nga mga taming an kaaway nga mga sondalo ngan magpula an ira mga bado hin kasondalo. Nag-aandam hira hin pagsulong! Nag-iidlap an ira mga karuwahe sugad hin kalayo! Nagpapanikad an ira mga kabayo!

⁴ Nagdadalagan hin malaksi an mga karuwahe dida han kakalsadahan, maglaksi nga pabalikbalik dida han mga plasa han syudad. Nag-iidlap ini sugad hin mga sulo, ngan maglaksi sugad hin kikidlat.

⁵ Tinatawag an mga opisyal; nanhihipakdol hira han ira pagsulong. Nagdadagmit ngadto han pader an mga nasulong ngan binubutangan hin salipod an mga maso hin pagbungkag.

⁶ Nabukas na an mga ganghaan ha ligid han salog; napuno na hin kahadlok an palasyo.

⁷ Nabihag na an rayna; nag-aaraba an iya mga surugoon sugad hin mga sarapati ngan nagpupukpok han ira mga dughan tungod hin kabidoan.

⁸ Sugad hin tubig tikang hin nabuhang nga linaw nagdadagmit an mga tawo tikang ha Ninibe! “Hunong na! Hunong na!” nanggogliat hira— kundi waray namamati ha ira.

⁹ Tikasa an salapi! Tikasa an bulawan! Puno hin manggad an syudad!

¹⁰ Nabungkag na an Ninibe, binayaan, mamingaw na! Natutunaw hin kahadlok an mga kasingkasing; nangungurog an mga tuhod, maluya na hin duro; ginduduas na an mga bayhon.

¹¹ Hain na man an syudad nga sugad hin luoban hin mga liyon, an dapit diin gintutubongan an nati nga mga liyon, nga kinakadtoan han lalaki ug babayi nga liyon ngan waray pagkahadlok an ira mga nati?

¹² Ginpatay han liyon an iya nadakop, ngan ginpikaspikas ini para han iya kapadis ngan han iya mga nati; ginpuno niya hin pinikaspikas nga unod an iya luoban.

¹³ “Kaaway mo ako!” nasiring an Ginoo nga Labi Kamakagarahum. “Susunogon ko an imo mga karuwahe. Pamamatayon an imo mga sondalo didto ha pag-awayan ngan aagawon ko liwat an ngatanan nga imo gin-agaw ha iba. Diri na gud pamamatian an mga ginkikinahanglan han imo mga sinugo.”