Nahum 1 - Samarenyo Meaning-Based Bible (1984)

¹ Mensahe ini hiunong han Ninibe, an kasaysayan hin usa nga panan-awon nga hinkit-an ni Nahum nga taga-Elcos.

Nasina han Ninibe an Ginoo

² Diri pinapasagdan han Ginoo nga Dyos an iya mga pangontra; sinisirotan niya adton mga naato ha iya. Ha iya kasina binubulos niya hira.

³ Diri an Ginoo nasisina dayon, kundi gamhanan hiya ngan diri gud hiya natugot nga an salaan diri makastigo. Nabutho in mga bagyo dida han dapit nga ginlalaktan han Ginoo; an mga dampog amo an tapotapo nga ginpatapwad han iya mga tiil!

⁴ Sinusugo niya an dagat ngan nagmamara ini! Amo man liwat an mga salog. Nalalaya an kaumhan han Basan, nauuga an Bukid Carmelo, ngan nararapdag an mga bukad han Libano.

⁵ Nababay-og an kabukiran ha atubangan han Ginoo; natutunaw an kapungtoran ha iya atubangan. Nalinog an tuna kon napakita an Ginoo; nangungurog an kalibutan ngan an ngatanan nga mga tawo hini.

⁶ Hin-o an mabubuhi kon nasisina hiya? Hin-o an makakailob han iya makalilisang nga kapungot? Hinuhuwad niya an iya naglalaga nga kasina; napupusak an mga bato ha iya atubangan ngadto hin katapotapo.

⁷ Maupay an Ginoo; iya sinasalipdan an iya mga tawo ha mga panahon hin kakurian; minamangnoan niya adton mga nadangop ha iya.

⁸ Pinupuo niya an iya mga kaaway sugad hin masulog nga daralwa; ipinadadara niya ngadto han ira kamatayon adton mga naato ha iya.

⁹ Ano an iyo ginhuhunahuna kontra han Ginoo? Pupuohon kamo niya. Waray nakakaato ha iya hin makaduha.

¹⁰ Sugad hin gumok nga mga tunok ngan mamara nga dagami pag-uugtangon kamo!

¹¹ Tikang ha imo, Ninibe, inmabot in tawo nga puno hin magraot nga mga panuyo, nga naghunahuna hin maraot kontra han Ginoo.

¹² Amo ini an sinisiring han Ginoo ha iya mga tawo nga Israel: “Bisan kon magkusog ngan damo an mga Asiriahanon, mapupuo ngan mapapara hira. Mga tawo ko, ginpaantos ko kamo, kundi diri ko na pagbubuhaton ini.

¹³ Tataposon ko na an kanan Asiria gahom dida ha iyo ngan uutdon ko an mga kadena nga naggagapos ha iyo.”

¹⁴ Amo ini an ginsugo han Ginoo hiunong han mga Asiriahanon: “Mawawaray hira mga tulin nga magpapadayon hin pagdara han ira ngaran. Pagdudugmokon ko an mga diyosdiyos nga aadto han mga templo han ira kadiyosan. Mag-aandam ako hin lubnganan para han mga Asiriahanon—diri hira angay mabuhi!”

¹⁵ Tan-awa, naabot dida han kabukiran in magsarangyaw nga may maupay nga sumat! Aada na hiya han iya dalan hin pagpahibaro han pagdarag-an! Mga tawo han Juda, sauroga niyo an iyo mga pyesta ngan tagi an Dyos han iyo ginsumpa ha iya. Diri na gud susulongon han mga magraogdaog an iyo tuna. Ginpuo na gud hira!