Miqueas 7 - Samarenyo Meaning-Based Bible (1984)

Mahugaw an Ginawian han Israel

¹ Waray na gud paglaom! Sugad ako hin ginugutom nga tawo nga diri nakakaagi hin bunga nga nahisalin dida han mga kahoy ngan mga ubas dida han mga puno han ubas. Pinanmuro na an ngatanan nga mga ubas ngan an ngatanan nga magrasa nga mga igos.

² Waray na gud nahisalin nga tangkod nga tawo dinhe ha tuna, waray na gud maunongon han Dyos. Naghuhulat an kada usa hin higayon hin pagpatay. An kada tawo nagbibiling hin higayon hin pagdakop han iya igkasi taga nasod.

³ Maaram gud hira ngatanan magbuhat hin maraot. Nangangaro hin hukip an mga opisyal ngan mga maghurukom. An tawo nga ira hinangad nasumat ha ira han iya karuyag, sanglit nagkasarabot na la hira hin paglarang hin maraot.

⁴ Bisan an gimamaupayi ug gitatangkori ha ira sugad la han mga banwa hin kawaray pulos. Inmabot na an adlaw nga kakastigohon han Dyos an mga tawo, sumala han iya pagpahimatngoni ha ira pinaagi ha iya mga magbarantay nga mga manaragna. Nagugupong na hira yana.

⁵ Ayaw pagtuod han iyo amyaw o pagsarig han iyo sangkay. Paghirot han iyo iginyayakan bisan ngadto han iyo asawa.

⁶ Hini nga mga panahon sugad la hin mga lurong an pagdara han mga anak nga kalalaken-an han ira mga amay, inaatohan han mga anak nga kababayen-an an mga iroy nira, pinakikiawayan han mga umagad nga kababayen-an an ira mga ugangan nga kababayen-an; an mga kaaway hin usa ka tawo amo an mga sakop han iya kalugaringon nga panimalay.

⁷ Kundi magbabantay ako han Ginoo. Maghuhulat ako nga malaomon han Dyos nga magtatalwas ha akon. Pamamatian ako han akon Dyos.

Nagtatalwas an Ginoo

⁸ Waray katadongan nga an aton mga kaaway maghiyukat ha aton. Natumba kita, kundi mabangon liwat kita. Yana aada kita ha kasisidman, kundi tatagan kita hin kapawa han Ginoo.

⁹ Nakasala kita han Ginoo, sanglit yana kinahanglan ilobon ta hin madaliay an iya kasina. Kundi ha kataposan pananalipdan kita niya ngan tatadongon an mga sayop nga ginbuhat ha aton. Igagawas kita niya ngadto han kapaw-an; mabubuhi kita hin pagkita han iya pagtalwas ha aton.

¹⁰ Niyan hikikit-an ini han aton mga kaaway ngan maaalohan hira—an mga kaaway nga nagsunlog ha aton hin pagsiring, “Hain man an Ginoo nga iyo Dyos?” Hikikit-an ta hira nga mapipirde ngan pagtatamaktamakan sugad hin lapok ha kakalsadahan.

¹¹ Mga tawo han Jerusalem, maabot an panahon hin pag-ayad han mga pader han syudad. Hito nga panahon pagpapahiluagon an iyo katunaan.

¹² Mabalik ngada ha iyo an iyo mga tawo tikang han ngatanan nga mga dapit—tikang ha Asiria didto ha sinirangan, tikang ha Ehipto didto ha salatan, tikang ha katunaan han Salog Eufrates, tikang ha higrayo nga kadagatan ngan kabukiran.

¹³ Kundi mahihimo nga kamingawan an tuna tungod han pagkamaraot hadton mga umurokoy.

Nalooy han Israel an Ginoo

¹⁴ Magin magmarangno ka unta han imo mga tawo, O Ginoo, an mga tawo nga imo ginpili. Bisan kon nag-uokoy hira nga nahibubulag didto han kagurangan, ginlilibotan hira hin matambok nga mga tuna. Pakadtoa ngan pakaona hira didto han matambok nga mga panabsaban han Basan ug Galaad, sugad han ira ginbuhat han maiha na nga panahon.

¹⁵ Pagbuhat hin mga milagro para ha amon, O Ginoo, sugad han imo ginbuhat hadto nga mga adlaw han pagpagawsa mo ha amon han Ehipto.

¹⁶ Hikikit-an ini han mga nasod ngan magtuturaw hira bisan pa ha ira kamagkusog. Ha ira kaawod tatak-omon nira an ira mga baba ngan sasagpoon an ira mga talinga.

¹⁷ Magkakamang hira dida han tapotapo sugad hin mga halas; magkakagawas hira nga nangungurog ngan nahahadlok tikang han ira magrig-on nga mga kota. Ha kahadlok madangop hira han Ginoo nga aton Dyos.

¹⁸ Waray na iba nga diyos nga sugad ha imo, O Ginoo; nagpapasaylo ka han mga sala han imo mga tawo nga nanhisalin nga buhi. Diri ka nagpapabilin hin kasina ha kadayonan, kundi nalilipay ka hin pagpakita ha amon han imo dayuday nga paghigugma.

¹⁹ Magmamaloloy-on ka na liwat ha amon. Pagtatamaktamakan mo an amon mga sala ngan ilalabog mo ini ngadto han kahiladman han dagat!

²⁰ Ipapakita mo an imo kamatinumanon ngan dayuday nga paghigugma han imo mga tawo nga mga tulin ni Abraham ngan ni Jacob, sumala han imo ginsumpa ngadto han amon kaapoy-apoyan ha maiha na nga panahon.