Miqueas 6 - Samarenyo Meaning-Based Bible (1984)

Iginsumbong han Ginoo an Israel

¹ Pamatii an sumbong han Ginoo kontra han Israel. Tindog, O Ginoo, ngan ipasaka an imo sumbong. Pabatia an kabukiran ngan an kapungtoran han imo igsisiring.

² Kamo nga kabukiran, kamo nga waray kataposan nga mga patukoranan han tuna, pamatii an sumbong han Ginoo! May sumbong an Ginoo kontra han iya mga tawo. Ipapasaka niya in sumbong kontra han Israel.

³ Nasiring an Ginoo, “Mga tawo ko, ano an akon ginbuhat ha iyo? Kay ano nga binubug-atan na man kamo ha akon? Batona ako.

⁴ Ginpagawas ko kamo ha Ehipto. Gintalwas ko kamo han pagkaoripon. Ginsugo ko hira Moises, Aaron, ug Miriam hin pagmando ha iyo.

⁵ Mga tawo ko, hinumdomi an ginlarang ha iyo ni Hadi Balak han Moab, ngan kon gin-unan-o ni Balaam nga anak ni Beor hin pagbaton ha iya. Hinumdomi an mga butang nga nahinabo dida han dalan tikang han kampo didto ha Akasya ngadto ha Gilgal. Hinumdomi ini nga mga butang ngan makakasabot kamo han akon ginbuhat hin pagtalwas ha iyo.”

Ano an Ginkikinahanglan han Ginoo ?

⁶ Ano an akon pagdadad-on ngadto han Ginoo nga Dyos han langit, kon kumanhi ako hin pagsingba ha iya? Magdadara ba ako han gimamag-upayi nga mga nati nga baka nga pagtutuboron nga mga halad ngadto ha iya?

⁷ Malilipay ba an Ginoo kon dad-an ko hiya hin yinukot nga mga karnero o hin waray paghubas nga mga sapa hin lana hin olibo? Ighahalad ko ba ha iya an akon suhag nga anak hin pagbayad han akon mga sala?

⁸ Diri, ginsumatan kita han Ginoo kon ano an maupay. Amo ini an ginkikinahanglan niya ha aton: pagbuhat hin matadong, pagpakita hin dayuday nga paghigugma, ngan pag-ukoy ha mapinaubsanon nga pakigkausa han aton Dyos.

⁹ May kinaadman an tawo nga nahadlok han Ginoo. Nagtatawag hiya ngadto han syudad, “Pamati, kamo nga mga tawo nga nagkakatirok didto han syudad.

¹⁰ Didto han mga balay han magraot nga mga tawo aadto in mga manggad nga ira nakuha hin diri tangkod nga paagi. Nagamit hira hin diri husto nga mga taraksan nga akon napupungtan.

¹¹ Uunanhon ko hin pagpasaylo hin mga tawo nga nagamit hin diri husto nga mga timbangan?

¹² Nasingabot han mga pobre an iyo mga riko, ngan mga buwaon kamo ngatanan.

¹³ Sanglit gintikangan ko na an iyo pagkapukan ug pagkabungkag tungod han iyo mga sala.

¹⁴ Makaon kamo, kundi diri kamo mabubusog—ngani, gugutomon la kamo gihapon. Magdadara kamo hin mga butang, kundi diri kamo makakatipig hini. Bisan ano nga iyo matipigan, aagawon didto ha pag-awayan.

¹⁵ Magpupugas kamo, kundi diri kamo mag-aani. Magpipii kamo hin lana tikang hin mga olibo, kundi diri gud kamo makakagamit hini. Maghihimo kamo hin bino, kundi diri gud kamo makakainom hini.

¹⁶ Mahinanabo ini kay ginsunod niyo an magraot nga mga binuhatan ni Hadi Omri ngan han iya anak nga hi Hadi Acab. Ginpadayon niyo an ira mga paagi, sanglit pagdadaoton ko kamo ngan pagtatamayon kamo han ngatanan. Pagtatamayon kamo han mga tawo ha ngatanan nga mga dapit.”