Miqueas 5 - Samarenyo Meaning-Based Bible (1984)

¹ Mga tawo han Jerusalem, tiroka an iyo mga kasondalohan! Ginpapalibotan kita! Sinusulong nira an pangulo han Israel!

Nagsaad an Dyos hin Pangulo nga taga-Betlehem

² Nasiring an Ginoo, “Betlehem Efrata, usa ka han gigugutiayi nga mga bungto han Juda, kundi tikang ha imo paguguwaon ko in punoan para han Israel, kanay mga ginikanan natikang pa han kadaan nga mga katuigan.”

³ Sanglit itutubyan han Ginoo an iya mga tawo ngadto han ira mga kaaway tubtob han pag-anak han babaye nga tipag-aranak han iya anak nga lalake. Niyan magkakausa na liwat an ira kalugaringon nga mga tawo ngan an ira igkasi taga nasod nga aadto ha pagkabihag.

⁴ Kon umabot hiya, paghahadian niya an iya mga tawo pinaagi han kusog nga natikang han Ginoo ngan pinaagi han pagkaharangdon han Ginoo nga Dyos. Mag-uokoy nga murayaw an iya mga tawo kay an mga tawo ha bug-os nga kalibutan makilala han iya pagkagamhanan,

⁵ ngan magdadara hiya hin kalinaw. Kon sulongon na han mga Asiriahanon an aton nasod ngan masulod nira an aton mga kota, susugoon ta hin pakiaway ha ira an aton gikukusogi nga mga pangulo.

May Katalwasan ug Kastigo

⁶ Pinaagi han kusog han mga hinganiban, sasakopon nira an Asiria nga tuna ni Nimrod, ngan tatalwason kita nira tikang han mga Asiriahanon kon sulongon nira an aton katunaan.

⁷ An mga tawo han Israel nga mahisalin nga buhi masusugad hin nakakapahalibway nga tun-og nga ginpadara han Ginoo para hin damo nga mga nasod, sugad hin tarahiti para hin nagtutubo nga mga tanom. Matapod hira han Dyos, diri han tawo.

⁸ Adton mga nanhisalin pa dida han mga nasod masusugad hira hin liyon nga namimiling hin pagkaon didto ha kagurangan o ha panabsaban. Natampo ini hiya dida han mga karnero, binabanghag ngan ginpipikaspikas an mga karnero—ngan waray na gud ini hira paglaom hin katalwas.

⁹ Dadag-on han Israel an iya mga kaaway ngan pupuohon hira ngatanan.

¹⁰ Nasiring an Ginoo, “Hito nga panahon kukuhaon ko an iyo mga kabayo ngan gugubaon ko an iyo mga karuwahe.

¹¹ Pupukanon ko an mga syudad didto han iyo tuna ngan pagrurub-on ko an ngatanan nga iyo mga kota.

¹² Pagdadaoton ko an mga anting-anting nga iyo ginagamit ngan diri ko kamo sasalinan hin mga paratigo.

¹³ Pagdudugmokon ko an iyo mga diyosdiyos ngan an baraan nga mga harigi nga bato nga iyo ginsisingba. Diri na kamo magsisingba han mga butang nga kamo la ngahaw an naghimo.

¹⁴ Pagpupukanon ko an mga ladawan han diyosa nga hi Asera didto han iyo tuna, ngan pagbubungkagon ko an iyo mga syudad.

¹⁵ Ngan ha akon dako nga kapungot sisirotan ko an mga nasod nga waray magsugot ha akon.”