Mga Salmo 99 - Samarenyo Meaning-Based Bible (1984)

Gilalabawi nga Hadi an Dyos

¹ An naghahadi amo na an Ginoo, yana pakuroga na an mga tawo igbaw'n mga kerubin an iya trono, hiya nalingkod, tuna bay-og hin duro.

² Gamhanan an Ginoo didto ha Sion, hiya'n labaw han tanan nga mga nasod.

³ Tanan magdayaw ngaran n'ya nga harangdon ngan dako ug hiya baraan gihapon.

⁴ Gamhanan hadi, higugma mo'n matadong, ha Israel hustisya im' ginparig-on; ikaw an nagdara han pagkamatadong, ngan pagtagad han ngatanan nga turopong.

⁵ An Ginoo aton gud nga pagdayawon, amo hiya an Ginoo nga Dyos naton, didto han iyo trono aton singbahon, pagkabaraan niya, aton pagdaygon!

⁶ Moises ug Aaron iya kapadian, ngan hi Samuel usa liwat han kadam-an nga nag-ampo, nagsangpit han iya ngaran, nagsangpit han Ginoo ngan ginbaton man.

⁷ An iya paagi ha ira pagyakan, harigi nga dampog an gintitikangan; mga balaod niya ira gintuman, an ginhatag niya nga kasugoanan.

⁸ At' Ginoo nga Dyos ha ira nagbaton, ikaw nga Dyos, ha ira mapasayloon; kundi ikaw an nakastigo gihapon hadton ira mga pagkamasal-anon.

⁹ An Ginoo nga aton Dyos pagdayawon, didto han iya baraan gud nga pungtod ngan angay gud hiya naton pagsingbahon, kay baraan an Ginoo nga Dyos naton.