Mga Salmo 98 - Samarenyo Meaning-Based Bible (1984)

Punoan han Kalibutan an Dyos

¹ Bag-o nga kanta ha Ginoo kantahon, kay ginbuhat niya mga urosahon! Han iya baraan nga kusog ug gahom an pagdarag-an iya na gud naangkon.

² An Ginoo amo'n nagpahibaro na han iya pagdarag-an, iya victorya; ha mga nasod ginpahibaro niya adton iya gahom nga nagtatalwas pa.

³ Saad ha Israel gintuman gud niya upod dayuday pag-unong, paghigugma; pagdarag-an han aton Dyos an nakita han mga katawhan ha tanan nga tuna.

⁴ Magrugyaw ha Ginoo, tanan nga tuna, pagrayhak hin kanta, pagdayawa hiya.

⁵ Ngadto ha Ginoo hin dayaw pagkanta! Ngan pagtokar dida hadton mga arpa.

⁶ Upod hadton tunog han mga trompeta, pati adton mga budyong pagpatungga; ngan gogliat tungod hin kalipay kita ngadto ha Ginoo nga amo'n hadi ta.

⁷ Pangawan na kamo tanan kadagatan, ngan ha iya mga binuhat ngatanan. Pagkanta na kamo, mga katunaan, ngan an ngatanan nga dida an urokyan.

⁸ Pagparakpak kamo, mga kasapaan! Pagkaranta kamo, mga kapungtoran! Pagduruyog kamo nga may kalipayan, didto han aton Ginoo atubangan!

⁹ Kay makanhi hiya, tuna hahadian, iya paghahadian mga katawhan! An bug-os nga tuna hinin kalibutan subay han hustisya ug han kaangayan.