Mga Salmo 97 - Samarenyo Meaning-Based Bible (1984)

Gilalabawi nga Punoan an Dyos

¹ Hadi an Ginoo! Pagkalipay, tuna! Kapupod-an ha dagat, pagkalipay na!

² Magdakmol nga dampog nalibot ha iya; matadong ug husto an paghadi niya.

³ Kalayo amo an ha iya nauna, pag-ugtang han kaaway palibot niya.

⁴ Iya kikidlat lamrag ha kalibutan, nakurog an tuna nga linalamragan.

⁵ Natutunaw bisan adton kabukiran, sugad hin taro ha iya atubangan; kay amo gud hiya an Ginoo gudman, an Ginoo han bug-os nga kalibutan.

⁶ Iginsasangyaw na hadton kalangitan ha ngatanan adton iya katadongan; ngan han mga nasod ini hinkikit-an. An himaya niya kita han katawhan.

⁷ Tanan nga nasingba hin mga ladawan puro hira manta nga kaaalohan; an ngatanan gud nga kadiyosdiyosan hira mayukbo ha iya atubangan.

⁸ An imo katawhan, an bungto han Sion nalilipay hira nagmamalipayon; mga syudad han Juda rayhak gihapon, tungod, O Dyos, han imo mga paghukom.

⁹ Ginoo Makagarahum han Ngatanan, labaw nga punoan hinin kalibutan; larulabaw ka hin duro han ngatanan, han ngatanan gud nga kadiyosdiyosan.

¹⁰ An aton Ginoo nahigugma gudman hadton mga nagdudumot han karat-an; iya mga tawo pinananalipdan, binabawi ha magraot nga katawhan.

¹¹ Nasilaw an lamrag ha mga magtadong, an mga mag-upay nagmamalipayon;

¹² rayhak ha Ginoo, magtadong ngatanan, iya baraan ngaran pasalamatan.