Mga Salmo 94 - Samarenyo Meaning-Based Bible (1984)

Maghurukom han Ngatanan an Dyos

¹ O Ginoo, ikaw Dyos nga nakastigo, ipadayag na gud an pagkasina mo!

² Maghurukom ka han ngatanan nga tawo, mga palabihon balosi hin igo.

³ An kalipay han magraot tubtob san-o? Magpapadayon ba hira, O Ginoo?

⁴ Tubtob san-o'n ira kamapahitas-on? Ngan mga sala nira paghinambogon?

⁵ Katawhan mo dinudugmok, O Ginoo, ginsasakit nira ngatanan nga imo.

⁶ Ginpapatay nira mga ilo, balo, ngan mga langyaw nga dinhe pagpupuyo.

⁷ Ngan amo man ini'n ginyayakan nira, “An Ginoo diri ha aton nakita; an Dyos han Israel, diri manta hiya nga makakasabot han ginbubuhat ta!”

⁸ Katawhan ko, ano hin katapang niyo? San-o pa ba kamo nga mahibabaro?

⁹ Dyos an naghimo han mata ug talinga; diri ba mabati hiya ngan makita?

¹⁰ Hadton mga nasod hiya magmarangno, di' ba hiya ha ira magkakastigo? Hiya magturutdo han tanan nga tawo, sanglit di' ba hiya an mahibabaro?

¹¹ Maaram gud an Ginoo han ngatanan, bisan pa han ira ginhunahunaan; maaram gud hiya bis' han kalurongan han ira paagi hin pangatadongan.

¹² Palaran an tinutdoan mo, Ginoo, an tinututdoan han balaod nimo.

¹³ Ha mga kasamok ginpapahuway mo, tubtob an magraot mahilubong nimo.

¹⁴ Bunyog an Ginoo han iya katawhan, mga sakop niya diri bubulagan.

¹⁵ Magmamatadong na liwat an hukmanan, ngatanan magtadong ito uogopan.

¹⁶ Hin-o ha iyo in inmugop ha akon, supak han magbangis ngan diri magtadong?

¹⁷ Kon di' pa'n Ginoo'n binmulig ha akon, binmaya na ako, ha tuna ginlubong.

¹⁸ Han pagsiring ko, “Nahuhulog na ako,” naghawid, Ginoo, an dayon'g gugma mo.

¹⁹ Kon nababaraka, nagugupong ako, ginliliaw ngan ginlilipay ak' nimo.

²⁰ Waray ka labot han magraot nga hukom, nga ginagamit an balaod panlimbong;

²¹ nga nagsasarabot kontra han magtadong, ngan ginsisirotan hira'n kamatayon.

²² Kundi han Ginoo Dyos ak' sinalipdan.

²³ Tungod han ira karat-an sisirotan; pupuohon tungod ira kasal-anan, Ginoo nga Dyos ta ha ira mapukan.