Mga Salmo 92 - Samarenyo Meaning-Based Bible (1984)

Pagkanta hin Pagdayaw

¹ Kamakaruruyag hinin aton buhat, ngadto ha Ginoo hin pagpasalamat; pagkanta hin mga pagdayaw ha imo, pagtahod han Gilalabawi nga Dyos ko.

² Pagsangyaw ha aga han dayon gugma mo, ha gab-i han kamatinumanon nimo.

³ Duyog dinulosan mga instrumento, ngan duyog man liwat kanan arpa tono.

⁴ Ginoo, im' mga buhat nga gamhanan, amo'n nakalipay hinin akon dughan; tungod hadton imo mga binuhatan, nagkakanta ako nga may kalipayan.

⁵ Pagkaurosahon buhat mo, Ginoo! kahaglarom mga panghunahuna mo!

⁶ Mga tapang hini di' mahibabaro, diri masasayod in lurong nga tawo:

⁷ an magraogdaog magdamo daw banwa, ngan mga magraot umuswag ha tuna; Kundi uuboson kapuo gud hira,

⁸ kay ha kadayonan, Ginoo, labaw ka.

⁹ Maaram gud kami, am' hinbabaroan, im' mga kaaway magkakamatay man. Adton mga magraot nga katawhan, mapupukan, mapipirde gud ngatanan.

¹⁰ Ginpakusog ako daw baka nga todo, ngan hin kalipayan tinagan pa nimo.

¹¹ Kapirde han kaaway ko ak' hinkit-an, pagnguyngoy han magraot ak' hinbatian.

¹² Nalangbo daw lubi an mga magtadong, matubo daw tuog didto ha Libano.

¹³ Daw kakahuyan ha balay han Ginoo, nga narampag dida han kanan Dyos Templo.

¹⁴ Nabunga pa bisan kon mga lanyog na, ngan pirme magdig-on ngan dahonan hira.

¹⁵ Tigaman ini matadong an Ginoo, waray sayop hiya nga panalipod ko.